Mateu 1 - Bibele ye Kenile (Catholic Edition)

Lusika lwa Jesu

¹ Wo, ki ona mukoloko wa lusika lwa Jesu Kreste, ya n'a simuluhile ku Davida wa lusika lwa Abrahama.

² Abrahama a pepa Isaka, Isaka a pepa Jakobo, mi Jakobo a pepa Juda ni banyani ba hae.

³ Juda a pepa Faresi ni Zara. M'a bona ne li Tamare. Faresi a pepa Esromi, mi Esromi a pepa Arami.

⁴ Arami a pepa Aminadabi, Aminadabi a pepa Naasoni, mi Naasoni a pepa Salumoni.

⁵ Salumoni a pepa Boazi. M'ahe ne li Rahaba. Boazi a pepa Obedi. Ruti ne li yena m'ahe. Obedi a pepa Jese.

⁶ Jese, yena, a pepa Mulena Davida. Davida a pepa Salumoni. M'ahe n'a kile a ba musal'a Uria.

⁷ Salumoni a pepa Roboami, Roboami a pepa Abia, mi Abia a pepa Asa.

⁸ Asa a pepa Josafati, Josafati a pepa Jorami, mi Jorami a pepa Oziasi.

⁹ Oziasi a pepa Jotami, Jotami a pepa Akazi, mi Akazi a pepa Ezekiasi.

¹⁰ Ezekiasi a pepa Manase, Manase a pepa Amoni, mi Amoni a pepa Josiasi.

¹¹ Josiasi a pepa Jekonia ni banyani ba hae, nako yeo Maisilaele ha ba iswa kwa Babilona.

¹² Maisilaele ha ba se ba isizwe kwa Babilona, Jekonia a pepa Salatiele, mi Salatiele a pepa Zorobabele.

¹³ Zorobabele a pepa Abiudi, Abiudi a pepa Eliakimi, mi Eliakimi a pepa Azoro.

¹⁴ Azoro a pepa Sadoki, Sadoki a pepa Akimi, mi Akimi a pepa Eliudi.

¹⁵ Eliudi a pepa Eliazare, Eliazare a pepa Matani, mi Matani a pepa Jakobo.

¹⁶ Jakobo a pepa Josefa munn'a Maria, yena m'ahe Jesu ya bizwa Mesia.

¹⁷ Cwale, ku na ni masika a lishumi ka a mane a bashemi ni bana ku zwa ku Abrahama ku t'o fita ku Davida, a lishumi ka a mane hape ku zwa ku Davida ku fita ku yona nako yeo Maisilaele ha ba iswa kwa Babilona, ni a lishumi ka a mane ku zwa fo ku t'o fita kwa nako ya ku pepwa kwa Mesia.

Ku pepwa kwa Jesu Kreste

¹⁸ Ku pepwa kwa Jesu Kreste ku tile ka mukwa wo. Maria, m'ahe, n'a beelelizwe ki Josefa. Pili ba si ka nyalana kale, a ipumana kuli u s'a itwezi, ili ka maata a Moya o Kenile.

¹⁹ Josefa, ya n'a mu beelelize, ne li mutu ya n'a lukile, mi n'a sa lati ku swabisa Maria fapil'a batu. Cwale a lela ku kauhana ni yena, batu ba sa zibi.

²⁰ Ha n'a sa nahana zeo, lingeloi la Mulena la taha ku yena kwa buloko, mi la li, “Josefa, mwan'a Davida, u si ke wa saba ku ikungela Maria, kuli a be musal'a hao, kakuli h'a itwezi ki ka maata a Moya o Kenile.

²¹ U ka pepa mwana wa mushimani mi wena u ka mu beya libizo la Jesu, kakuli u ka pilisa sicaba sa hae kwa libi za bona.”

²² Zeo kaufela za ezahala kuli ku talelezwe ze ne bulezwi ki Mulena ka mupolofita, ha n'a ize,

²³ “Kalibe u ta itwala, mi u ta pepa mwana wa mushimani ya ta bizwa Emanuele,” kikuli Mulimu u na ni luna.

²⁴ Cwale Josefa ha s'a pasumuka, a eza sina mw'a n'a bulelezwi ki lingeloi la Mulena, mi a nyala Maria.

²⁵ Kono n'a si ka kopana ni yena ha ku pepwa mwan'a hae wa mushimani, mi Josefa a mu beya libizo la Jesu.