Mareka 1 - Bibele ye Kenile (Catholic Edition)

Ze lutilwe ki Joani Mukolobezi

¹ Ki ze Litaba ze Nde ze talusa za Jesu Kreste, Mwan'a Mulimu.

² Li kalilwe sina mo ku ñolezwi ki mupolofita Isaya mwa buka ya hae, h'a li, “‘Bona, ni luma numwana wa ka fapil'a hao, ku ku lukiseza nzila,’ ku bulela Muñ'a Bupilo.

³ Ki linzwi la mutu ya huweleza mwa naheñi, ‘Mu bakanye mukwakwa wa Mulena, mu otolole linzila za hae!’ ”

⁴ Cwale Joani a bonahala mwa naheñi, a kolobeza ni ku kutaza batu a nz'a li, “A mu bake, mu kolobezwe, mi Muñ'a Bupilo u ta swalela libi za mina.”

⁵ Mi batu kamukana ba naha ya Judea ni ba munzi wa Jerusalema ne ba taha ku yena. Ba ipulela libi za bona fapil'a nyangela, mi Joani n'a ba kolobeza mwa Nuka ya Jordani.

⁶ Joani n'a apalanga siapalo sa boya bwa kamele ni lukanda lwa litalo mwa teka. N'a pila nzie ni linosi la mwa naheñi.

⁷ Mi n'a kutaza batu, a li, “Wa taha mwamulaho wa ka ya ni fita kwa maata, ye ni sa lukeli nihaiba ku sutelela ni ku tamulula makatulo a hae.

⁸ Na, ni mi kolobeza ka mezi feela, kono yena u ta mi kolobeza ka Moya o Kenile.”

Jesu wa kolobezwa ni ku likwa

⁹ Ka yona nako yeo, Jesu a zwa mwa Nazareta, munzi wa mwa naha ya Galilea. A t'o kolobezwa ki Joani mwa Jordani.

¹⁰ Jesu a sa omboka feela, a bona lihalimu li kwaluluha mi Moya wa shulumukela ku yena inge liiba.

¹¹ Kwa utwahala linzwi le li zwa kwa lihalimu, le li li, “Ki wena Mwan'a ka ye ni lata, ye ni katelwa.”

¹² Kapili-pili, Moya wa Mulimu wa mu isa mwa naheñi.

¹³ A ina mazazi a mashumi a mane mwateñi, mi a likwa ki Satani. N'a pila mwahal'a lifolofolo za mwa naheñi, mi mangeloi n'a mu sebeleza.

Jesu u biza mandui ba bane

¹⁴ Joani ha s'a kenyizwe mwa tolongo, Jesu a ya mwa Galilea, mi a bulela patalaza Litaba ze Nde za Muñ'a Bupilo.

¹⁵ N'a li, “Nako ye ne tomilwe i fitile, mi Mubuso wa Mulimu u s'o li fakaufi! A mu bakele libi za mina, mi mu lumele Litaba ze Nde za Mulimu!”

¹⁶ Jesu ha n'a nz'a kulisa Lisa la Galilea, a bona mandui ba babeli, bo Simoni ni Andreasi munyan'a hae, ba yamba ka tunyandi mwa lisa.

¹⁷ Jesu a li ku bona, “Mu ni latelele, mi ni ta mi luta mo ku yambelwa batu.”

¹⁸ Kapili-pili, ba siya tunyandi twa bona, mi ba mu latelela.

¹⁹ Kwapilinyana, a bona Jakobo ni munyan'a hae Joani, bana ba Zebedea, ba ne ba li mwa mukolo, ba nze ba onga tunyandi twa bona.

²⁰ A sa ba bona feela, Jesu a ba biza, mi kapili ba siya ndat'a bona, Zebedea, mwa mukolo ni babeleki, ba mu latelela.

Ya kenwi ki moya o maswe wa foliswa

²¹ Ba ya mwa munzi o bizwa Kapernauma. Ka Lizazi la Pumulo, Jesu a kena mwa sinagoge, mi a kala ku luta.

²² Ba ba ne ba mu teeleza ne ba komokiswa ki mukwa w'a n'a luta ka ona, kakuli n'a ba luta ka maata, isiñi ka mukwa wa Baluti ba Mulao.

²³ Ka yona nako yeo, mutu ya n'a kenwi ki moya o maswe a kena mwa sinagoge. A huwa, a li.

²⁴ “U na ni taba mañi ni luna, Jesu wa Nazareta? Kana u til'o lu timeza! Na ku ziba. Ki wena Ya Kenile ya lumilwe ki Mulimu!”

²⁵ Jesu a kalimela moya o maswe, a li, “Kuza! U zwe ku yena!”

²⁶ Moya o maswe kiha u mu wiseza fafasi ka tata, mi wa zwa ku yena a nz'a huwa hahulu.

²⁷ Batu kaufela ba ba ne ba li teñi, ba komoka hahulu-hulu, ba buzana, ba li, “Se si ezahala kiñi? Ki tuto ye nca, ye na ni maata! Mutu yo u laela ni mioya ye maswe, mi ya mu utwa!”

²⁸ Mi kapili libubo la Jesu la hasanela kai ni kai mwa naha ya Galilea.

Jesu u folisa bakuli ba bañata

²⁹ Ba zwa mwa sinagoge, mi ba akufela kwa ndu ya Simoni ni Andreasi, hamoho ni Jakobo ni Joani.

³⁰ Mukwenyan'a Simoni n'a lobezi, a kula fibele, mi Jesu a sa fita feela ba mu taluseza za butuku bo.

³¹ A sutelela ku yena, a mu swala fa lizoho, mi a mu yemisa. Fibele ya mu tuhela, mi a kala ku ba lukiseza lico.

³² Ka swalala, batu ba tisa bakuli ba bona ku Jesu mane ni ba ba ne ba kenwi ki mioya ye maswe.

³³ Batu kamukana ba t'o kubukana fapil'a munyako.

³⁴ Jesu a folisa ba bañata ba ba ne ba kula matuku a mifuta-futa. A lelekisa ni mioya ye maswe ka buñata. N'a hanisa mioya yeo ku bulela se siñwi kakuli ne i mu ziba kuli ki yena mañi.

Jesu u zamaya mwa Galilea

³⁵ Habusa i sa li malungasiku, Jesu a zuha mi a zwa mwa ndu. A ya mwa naheñi ku y'o lapela.

³⁶ Simoni ni mizwale ya hae ba y'o mu bata.

³⁷ Ha ba se ba mu fumani, ba mu bulelela, ba li, “Batu kaufela ba ku bata.”

³⁸ Kono Jesu a li ku bona, “Kambe lu ya ku sili, mwa minzi ye fakaufi. Ni swanezi ku y'o luta ku yona, kakuli ki sona se ni tezi.”

³⁹ Mi a zamaya mwa naha ya Galilea kaufela, a luta mwa masinagoge, ni ku leleka mioya ye maswe.

Jesu u folisa wa mbingwa

⁴⁰ Mutu ya n'a kula mbingwa a taha ku Jesu, a t'o kubama fapil'a hae, a mu lapela, a li, “Ha u lata, wa kona ku ni kenisa.”

⁴¹ Jesu a mu shwela makeke. A otolola lizoho, a mu swala, mi a li ku yena, “Na lata! U kene!”

⁴² Honafo, mbingwa ya mutu yo ya fela, mi a keniswa.

⁴³ Cwalehe, Jesu a mu kutiseza kw'a n'a zwa, kono pili a mu laela ka maata, a li.

⁴⁴ “Utwa! U si ke wa bulelela mutu se siñwi ka nto ye, kono u y'o iponisa ku muprisita kuli a ku tatube, mi u zwise mpo ye laezwi ki Mushe ku kolwisa batu kaufela kuli u kenile.”

⁴⁵ Kono, mutu yo a zamaya a hasanya litaba zeo kai ni kai. Kabakaleo, Jesu n'a palelwa ku kena mwa minzi patalaza. N'a inanga kwa mukunda, kono batu kamukana ne ba tahanga ku yena, ba zwa kwa maneku kaufela.