Malivi 1 - Bibele ye Kenile (Catholic Edition)

Limpo ze ciswa mutumbi

¹ Muñ'a Bupilo a biza Mushe a nz'a li mwa Tende ya Kopano, mi a mu fa milao.

² Se ne ba swanezi ku mamela Maisilaele mwa litabelo za bona, ki milao ye tatama. “Mutu kaufela h'a eza sitabelo sa folofolo, i ka be ye ñwi ya likomu, ya lingu, kamba ya lipuli za hae.

³ Haiba a eza ye ñwi ya likomu za hae sitabelo sa ku cisa, u swanezi ku tisa poho ye si na fo i nyazahala. U lukela ku i tisa kwa munyako wa Tende ya Kopano ili kuli Muñ'a Bupilo a i amuhele.

⁴ U ta beya lizoho la hae fa toho ya yona, mi kihona i ta amuhelwa, i be sitabelo sa swalelo ya libi za hae.

⁵ Cwale a bulaele poho hona fo, mi baprisita ba mba ya Aruni ba ta nga mali a yona, mi ba a fitise ku Muñ'a Bupilo. Kihona ba ta a sela fa maneku a mane a katala ka ka kwa munyako wa Tende.

⁶ Cwale u ta buwa folofolo yeo ni ku i pumaka.

⁷ Baprisita ba ta lukisa likota fa katala ni ku tukisa mulilo.

⁸ Cwale kihona ba ta nga lisuma za nama ya folofolo yeo hamoho ni toho ni lisuzo la yona, ba li beye fa mulilo.

⁹ Mutu yo u lukela ku tapisa za mwa mba kaufela ni litaku za kwa mulaho, mi cwale muprisita u ta ciseza sitabelo seo kaufela fa katala. Muunko wa sona sico se u tabisa hahulu Muñ'a Bupilo.

¹⁰ “Haiba mutu a eza sitabelo sa ye ñwi ya lingu kamba lipuli za hae, i lukela ku ba ya poho, mi ili ye si na fo i nyazahala.

¹¹ U ta i bulaela kwa neku la mutulo wa katala, mi baprisita ba ta sela mali a yona fa maneku a mane a katala.

¹² Ha s'a pumakile nama yeo, kihona muprisita a ta beya lilama kamukana hamoho ni toho ni lisuzo la yona cwalo fa mulilo.

¹³ Mutu yo u lukela ku tapisa za mwa mba kaufela, ni litaku za kwa mulaho, mi muprisita u ta fitisa sitabelo seo ku Muñ'a Bupilo ni ku si ciseza fa katala kaufel'a sona. Muunko wa sitabelo sa sico se u tabisa hahulu Muñ'a Bupilo.

¹⁴ “Haiba mutu a eza sitabelo sa ku cisa ka nyunywani, nyunywani yeo i lukela ku ba liiba kamba nkwilimba.

¹⁵ Muprisita u ta i beya fa katala, a i pume mulala ni ku ciseza toho ya yona fa katala. Mali a yona, ona, a ta lotisezwa kwa neku le liñwi la katala.

¹⁶ Muprisita u ta zwisa siuyelo ni mafufa cwalo, mi a li latele kwa neku la upa wa katala, ili fo ku sululelwanga mulola.

¹⁷ U ta i swala kwa mafufa, a i pazule a sa i kauhanyelezi lilama, mi a sa nyuntuli ni mafufa a yona. Cwale, kihona a ta i ciseza fa katala. Muunko wa sitabelo sa sico se u tabisa hahulu Muñ'a Bupilo.