Malaki 1 - Bibele ye Kenile (Catholic Edition)

Lilato la Muñ'a Bupilo kwa Maisilaele

¹ Ki a manzwi a n'a bulelezwi Malaki ki Muñ'a Bupilo kuli a a taluseze batu ba Isilaele.

² Muñ'a Bupilo a li kwa batu ba hae, “Ni mi latile kamita.” Kono bona ba alaba, ba li, “U lu latile cwañi?” Muñ'a Bupilo a alaba, a li, “Isau ni Jakobo n'e li bana ba mba i liñwi. Ni latile Jakobo ni baikulu ba hae.

³ Kono ni toile Isau ni baikulu ba hae. Ni sinyize naha ya Isau ya malundu, mane ni i fetuzi naha ya lifolofolo.”

⁴ Mwendi baikulu ba Isau, Maedomo, ba li, “Minzi ya luna i sinyizwe, kono lu ka i yaha sinca.” Fohe, Muñ'a Bupilo u ta alaba, a li, “Mu ba tuhele, ba i yahe sinca, kono ni ka i tuba hape. Batu ba ta i biza Naha ye Maswe ni Sicaba se si nyemezwi ki Muñ'a Bupilo kuya kuile.”

⁵ Batu ba Isilaele ba ta iponela zona ka meeto a bona, mi ba li, “Muñ'a Bupilo u na ni maata nihaili kwande a naha ya Isilaele!”

Muñ'a Bupilo u nyaza baprisita

⁶ Muñ'a Bupilo ya Maata Kaufela u li kwa baprisita, “Mwana u kuteka ndat'ahe, mi mubeleki u kuteka mulen'a hae. Na, ni ndat'a mina, kiñihe ha mu sa ni kuteki? Na, ni mulen'a mina. Kiñihe ha mu sa ni fi likute? Mwa ni shwaula, mi nihakulicwalo mwa buza, mu li, ‘Lu ku shwauzi cwañi?’

⁷ Ki ka mukwa wa ku tisa lico ze si na tuso fa katala ka ka. Cwale mwa buza, mu li, ‘Lu palezwi cwañi ku ku kuteka?’ Ni ta mi bulelela, ni li, ‘Ki ka ku bonisa kashwau kwa katala ka ka.’

⁸ Ha mu tisa folofolo ye sa boni, ye kula, kamba ye toza, ku t'o ni ezeza yona sitabelo, kana mu hupula kuli ha si bumaswe, nji? Mu like ku fa mubusisi folofolo ye cwalo. U ka mi tabela kapa ku mi lumba?”

⁹ Cwale, mina baprisita, mu like ku kupa ku Mulimu kuli a lu shemube. H'a na ku alaba tapelo ya mina, mi wo i ta ba mulatu wa mina.

¹⁰ Muñ'a Bupilo ya Maata Kaufela u li, “Ni lakaza kuli kambe yo muñwi n'a ka kwala minyako ya Tempele kuli mu si ke mwa tukisa mililo ye si na tuso fa katala ka ka. Ha mu ni tabisi, mi ha ni na ku amuhela limpo ze mu ni tiseza.

¹¹ Batu ba ba zwa mwa mabaka kaufela a lifasi ba ni kuteka. Ba cisa insense kai ni kai mi ba fa limpo ze swanela. Kaufel'a bona ba ni kuteka.

¹² Kono mina, ha mu ni kuteki, ha mu bulela kuli katala ka ka ha ka na tuso, mi ha mu tisa fateñi lico ze sa swaneli.

¹³ Mu li, ‘Ze kaufela li lu katalisize cwañi!’ Mane mu ni nanulela lingo ka lishwau. Ha mu tisa limpo za mina, mu ni tiseza folofolo ya ku uzwa, ye toza, kamba ye kula. Kana mu hupula kuli ni ka amuhela mpo ye cwalo ku mina?

¹⁴ Ku kutiwe mupumi ya ni ezeza sitabelo sa folofolo ye si na tuso, mi a nz'a na ni folofolo ye nde mwa mutapi wa hae, y'a n'a sepisize ku ni fa! Na, ni Mulena yo mutuna, mi batu ba macaba kamukana ba ni saba.” Ku bulela Muñ'a Bupilo ya Maata Kaufela.