Luka 1 - Bibele ye Kenile (Catholic Edition)

Luka u talusa s'a ñolezi Evangeli

¹ Ba bañata ba likile ku ñola litaba ze ezahalile mo ku luna ka ku li tomahanya.

² Ba ñozi ze lu bulelezwi ki ba ba li boni i sa li kwa makalelo, ili bona ba ba filwe ku tumisa linzwi la Mulimu.

³ Cwalehe, mutompehi Teofile, kabakala kuli, ni na, ni itutile zeo kaufela ka tokomelo ku zwa kwa makalelo, ni hupuzi kuli i ne i ka ba nto ye nde ku ku ñolela zona ka ku tatamana.

⁴ Ni eza cwalo kuli u zibelele niti ya litaba z'o lutilwe.

Lingeloi li polofita ku pepwa kwa Joani Mukolobezi

⁵ Ka linako zeo Heroda ha n'a li mulena wa Judea, ne ku na ni muprisita ya n'a bizwa Zakaria wa sitopa sa baprisita sa Abia. Musal'a hae n'a bizwa Elizabeta, mi n'a simuluha ku Aruni, muprisita yo muhulu.

⁶ Bubeli bwa bona ne ba lukile fapil'a Mulimu, mi ne ba zamaya ka milao ni ka litaelo za hae, ku si na se ne ba ka nyazwa ka sona.

⁷ Kono ne ba si na bana kakuli Elizabeta n'a sa pepi, mi bubeli bwa bona ne ba se ba supezi hahulu.

⁸ Zazi le liñwi Zakaria n'a eza za buprisita bwa hae fapil'a Mulimu, kakuli i n'e li nako ya sitopa sa hae ya ku swala musebezi zazi leo.

⁹ Ka mukwa wa baprisita, a ketwa kuli a kene mwa Tempele ya Mulena, a cise insense.

¹⁰ Mi batu kaufela ne ba li kwande ba nze ba lapela, ha ne ku sa ciswa insense.

¹¹ Lingeloi la Mulena la iponahaza ku yena, li yemi kwa silyo sa katala fo ne ku cisezwa insense.

¹² Zakaria h'a bona lingeloi, a tilumuka mi a kenelwa ki sabo.

¹³ Kono lingeloi la li ku yena, “U si ke wa saba, Zakaria! Mulimu u utwile tapelo ya hao. Musal'a hao Elizabeta u ta ku pepela mwana wa mushimani, mi u ta mu beya libizo la Joani.

¹⁴ U ka taba ni ku nyakalala, mi ba bañata ba ka tabiswa ki ku pepwa kwa hae!

¹⁵ U ta ba yo mutuna fapil'a Mulena. H'a na ku nwa waine kamba bucwala. U ka tala Moya o Kenile a sa li mwa mba ya m'ahe.

¹⁶ U ta sikululela bana ba Isilaele ba bañata ku Mulena Mulimu wa bona.

¹⁷ U ta zamaya fapil'a Mulimu ka moya ni ka maata sina a mupolofita Elia, ku sikululela lipilu za bashemi kwa bana ba bona. U ta kutiseza ba ba sa utwi mwa nzila ya butali bwa ba ba lukile, a ezeze Mulena sicaba se si itukiselize ku mu amuhela.”

¹⁸ Zakaria a li ku lingeloi, “Zeo ni ka li ziba kañi? Kakuli na, ni se ni hulile, mi ni musal'a ka, ni yena, s'a supezi.”

¹⁹ Lingeloi la mu alaba, la li, “Ki na Gabriele ya yemanga fapil'a Mulimu. U ni lumile ku t'o ku zibisa litaba ze nde zeo.

²⁰ Kono, bona, kakuli ha u si ka lumela manzwi a ni ku bulelezi ona, ili a ka petahala ka nako ya ona, u ta ba simumu, mi u ta palelwa ku bulela ku fitela lizazi le li ta ezahala litaba zeo.”

²¹ Nyangela ne i libelezi Zakaria, i komokisizwe ki tiyeho ya hae mwa Tempele.

²² Cwale h'a zwa, a palelwa ku bulela ni bona, mi ba lemuha kuli n'a boni pono mwa Tempele. N'a ba likanyeza ka mazoho, mi a ina cwalo a nz'a li simumu.

²³ Mazazi a musebezi wa hae mwa Tempele ha s'a felile, Zakaria a kutela kwa hae.

²⁴ Mwamulaho a mazazinyana, musal'a hae Elizabeta a itwala, mi a ipata likweli li ketalizoho a sa zweli kwande. N'a ipulelela, n'a li,

²⁵ “Ki sona s'a ni ezelize Mulena h'a ni talimile, kuli a ni zwise maswabi kwa batu!”

Lingeloi li polofita ku pepwa kwa Jesu

²⁶ Elizabeta ha s'a tulilwe ki likweli ze silezi, lingeloi Gabriele la lumwa ki Mulimu mwa munzi o mwa Galilea o bizwa Nazareta.

²⁷ La lumwa ku mwalyanjo ya n'a beelelizwe ki munna ya bizwa Josefa wa lusika lwa Mulena Davida. Libizo la mwalyanjo yo i n'e li Maria.

²⁸ Lingeloi la taha ku yena, mi la li, “Lumela, wena ya shemubilwe ki Mulimu! Mulena u na ni wena!”

²⁹ Maria a tilumunwa ki manzwi a lingeloi, mi a nahana kuli tumeliso ye cwalo i talusañi.

³⁰ Lingeloi la li ku yena, “U si ke wa saba, Maria, kakuli Mulimu u ku shemubile.

³¹ U ta itwala, ni ku pepa mwana wa mushimani, mi u ta mu beya libizo la Jesu.

³² Yena u ta ba yo mutuna, mi u ta bizwa mwan'a Muambakani ya Pahami. Mi Mulena Mulimu u ta mu eza mulena sina ndat'ahe Davida.

³³ U ta busa lusika lwa Jakobo kuya kuile, mi mubuso wa hae ha u na ku fela!”

³⁴ Maria kih'a alaba lingeloi, a li, “Zeo li ka ezahala cwañi ni sa zibi munna?”

³⁵ Lingeloi la li ku yena, “Moya o Kenile u ka shulumukela ku wena, mi maata a Muambakani ya Pahami a ta ku apesa. Kabakaleo mwana ya ta pepwa u ta bizwa ya kenile, Mwan'a Mulimu.

³⁶ Hupula mwanahenu Elizabeta, ye ne ba li h'a na ku ba ni bana. Ka nako ye u itwezi, mane ye i se i li yona kweli ya busilela, nih'a supezi cwalo.

³⁷ Kakuli ku Mulimu ha ku na se si pala ku ezahala.”

³⁸ Maria a li, “Na, ni mutang'a Mulena. Ku ezahale ku na sina ha u bulezi.” Mi lingeloi la mu siya.

Maria u potela Elizabeta

³⁹ Ka ona mazazi ao Maria a itukisa kapili, mi a funduka, a liba kwa naha ya malundu mwa munzi o mwa Judea.

⁴⁰ A y'o kena mwa ndu ya Zakaria, mi a lumelisa Elizabeta.

⁴¹ Cwale Elizabeta h'a utwa litumeliso za Maria, mwana a nyanganya mwa mba ya hae. Elizabeta a tala Moya o Kenile.

⁴² Mi a tumusa linzwi, a li, “U tohonolofalizwe wena mwahal'a basali kaufela! U tohonolofalizwe ni mwana y'o ta pepa!

⁴³ Ku taha cwañi kuli ni t'o potelwa ki m'ahe Mulen'a ka?

⁴⁴ Kakuli ni sa utwa feela litumeliso za hao, mwana ya mwa mba ya ka a tulakiswa ki tabo.

⁴⁵ U na ni litohonolo, wena ya lumezi kuli se si bulezwi ki Mulena si ta ezahala.”

Pina ya Maria ya ku lumbeka

⁴⁶ Maria a li, “Pilu ya ka i lumbeka Mulena.

⁴⁷ Moya wa ka u tabezi Mulimu, Mupilisi wa ka.

⁴⁸ U ni hupuzi, na mutang'a hae ya kwatasi! Mi ku zwa cwale, masika kaufela a ta ni biza ya tohonolofalizwe.

⁴⁹ Mulimu ya maata u ni ezelize ze tuna. Libizo la hae li kenile.

⁵⁰ U bonisa musa wa hae ku ba ba mu saba kaufela, mwa masika kamukana.

⁵¹ U ezize ze maata ka lizoho la hae. U hasanyize baikuhumusi ni milelo ya bona kaufela.

⁵² U tuluzi malena ba ba maata fa mabona a bona, mi u hulisize ba ba ishuwile.

⁵³ Ba ba lapile u ba kulisize ka ze nde, mi ba ba fumile u ba kutisize mazoho-zoho feela.

⁵⁴ U bulukile lisepiso zeo n'a sepisize bo kukw'a luna. U til'o tusa mutang'a hae Isilaele.

⁵⁵ U hupuzi ku bonisa musa wa hae ku Abrahama ni ku ba lusika lwa hae kuya kuile!”

⁵⁶ Maria a ina ku Elizabeta likweli ze talu, kiha s'a kutela habo yena.

Ku pepwa kwa Joani Mukolobezi

⁵⁷ Cwale nako ya fita ya ku puluha kwa Elizabeta, mi a pepa mwana wa mushimani.

⁵⁸ Banabahabo, ni ba pila ni bona, ba utwa butuna bwa musa w'a n'a mu ezelize Mulena, mi ba taba ni yena.

⁵⁹ Mwamulaho a sunda ba t'o kenya mwana mwa mupato. N'a swanezi ku beiwa libizo la ndat'ahe, la Zakaria.

⁶⁰ Kono m'ahe a li, “Batili! U ta bizwa Joani!”

⁶¹ Ba li ku yena, “Mwa lusika lwa henu ha ku na wa libizo leo!”

⁶² Kiha ba kobeta ndat'ahe ku mu buza libizo l'a ka lata ku fa mwana.

⁶³ Zakaria kih'a ba kupa f'a ka ñolela, mi a ñola kuli, “Libizo la hae ki Joani.” Mi ba komoka kaufela!

⁶⁴ Honafo, a kona ku bulela hape, mi a kala ku lumbeka Mulimu.

⁶⁵ Cwale ba ba ne ba yahile ni yena ba swalwa ki sabo, mi zeo kaufela za ba ngambolo mwa malundu a naha ya Judea.

⁶⁶ Ba ba li utwile kaufela ba nahana ka zona, mi ba ipuza mwa lipilu, ba li, “Mwana yo u ka ba ya cwañi?” Kakuli ne ku bonahala hande kuli maata a Mulena n'a li ku yena.

Zakaria u polofita ka pina

⁶⁷ Zakaria, ndat'ahe Joani, a tala Moya o Kenile mi a polofita, a li.

⁶⁸ “Ku lumbekwe Mulena Mulimu wa Isilaele! U til'o tusa ni ku pilisa sicaba sa hae.

⁶⁹ U lu zuselize Mupilisi ya maata, mwa lusika lwa Davida, mutang'a hae.

⁷⁰ Zeo ki z'a n'a bulezi kale ka mulomo wa bapolofita ba hae ba ba kenile.

⁷¹ N'a lu sepisize ku lu lamulela kwa lila za luna ni kwa mazoho a ba ba lu toile kaufela.

⁷² Ka ku bonisa musa w'a n'a sepisize bo ndat'a luna, a taleleza bulikani bwa hae bo bu kenile.

⁷³ Mulimu n'a itamile ku ndat'a luna Abrahama,

⁷⁴ kuli u ka lu lamulela kwa mazoho a lila za luna, lu kone ku mu sebeleza lu si na sabo,

⁷⁵ lu be ba ba kenile ni ba ba lukile fapil'a hae mazazi kaufela a bupilo bwa luna.

⁷⁶ Mi wena, mwan'a ka, u ka bizwa mupolofita wa Muambakani ya Pahami. U ta zamaya fapil'a Mulena ku mu lukiseza linzila za hae.

⁷⁷ Wena u ka fa batu ba hae zibo ya ku pilisa ka ku ba swalela libi za bona.

⁷⁸ Mulimu wa luna u tezi musa ni mukekecima. U ta lu benyiseza liseli la puluso le li zwa kwa lihalimu, le li swana ni la lizazi ha li pazula,

⁷⁹ ku monyehela ba ba li mwa lififi ni mwa muluti wa lifu, a zamaise mahutu a luna mwa nzila ya kozo.”

⁸⁰ Mwana a hula, a na ni maata mwa moya. A ina mwa naheñi ku fitela lizazi l'a itahisize ka lona fapil'a batu ba Isilaele.