Likezo 1 - Bibele ye Kenile (Catholic Edition)

Baapositola ba sepiswa Moya o Kenile

¹ Muñ'a ka Teofile, mwa buka ya ka ya pili, ni ñozi lika kaufela z'a n'a ezize Jesu ni z'a n'a lutile ku zwa nako y'a kala musebezi wa hae.

² I ama litaba ku fitela lizazi l'a ngelwa kwa lihalimu. A si ka kambamela kale kwa lihalimu, n'a file litaelo za hae, ka maata a Moya o Kenile, kwa batu b'a n'a ketile kuli ba be baapositola.

³ Mwamulaho a lifu la hae, a iponahaza ku bona hañata a nz'a ba kolwisa ka mikwa ye miñata kuli n'a pila. Ka mazazi a mashumi a mane a bonahala mwahal'a bona a nz'a bulela ka za Mubuso wa Mulimu.

⁴ Zazi le liñwi, ha n'a kopani ni bona, a ba fa taelo ye, a li, “Mu si ke mwa zwa mwa Jerusalema, kono mu litele s'a sepisize Ndate, ili mpo ye ne ni se ni mi bulelezi.

⁵ Kakuli Joani u kolobelize ka mezi, kono mina, mwamulaho a mazazinyana, mu ta kolobezwa ka Moya o Kenile.”

Jesu u ngelwa kwa lihalimu

⁶ Ba ba ne ba kopani ni Jesu, kiha ba mu buza, ba li, “Mulena, kana ki ka yona nako ye y'o ta kutiseza mubuso kwa ba Isilaele?”

⁷ Jesu a li ku bona, “Ha mu si ka fiwa tukelo ya ku ziba linako, kapa miaha. Zeo li tomilwe ki Ndate ka maata a hae.

⁸ Kono mu ta ba ni maata, Moya o Kenile ha u s'o tile ku mina, mi mu ta ba lipaki za ka mwa Jerusalema, mwa naha kaufela ya Judea ni ya Samaria mane ni ko li y'o felela lifasi.”

⁹ Ha s'a bulezi zeo, a ngelwa kwa lihalimu, ba nze ba mu talimezi, mi lilu la t'o mu pata.

¹⁰ Ha ba sa lubukezi kwahalimu cwalo, Jesu ha s'a ile, kapili banna ba babeli ba liapalo ze sweu ba t'o yema kwatuko a bona.

¹¹ Ba li, “Banna ba Galilea, mu yemeziñi fo, mu nze mu talimezi kwahalimu? Yena Jesu yo, ya ngilwe mwahal'a mina ku isiwa kwa lihalimu, u ta kuta ka mukwa wo mu mu boni a ya ka ona.”

Ya yolile Judasi

¹² Cwale baapositola ba kutela kwa Jerusalema ku zwa kwa Lilundu la Likota za Olive, ili musipili o likana ni sibimanyana feela.

¹³ Ha ba kena mwa Jerusalema, ba pahamela kwa ndu ko ne ba ina, ili bo Pitrosi, Joani, Jakobo, Andreasi, Filipi, Tomasi, Bartolome, Mateu, Jakobo mwan'a Alfea, Simoni Zeloti ni Juda mwan'a Jakobo.

¹⁴ Kaufela ne ba kopananga hamoho ku lapela, basali ba nze ba li teñi, ni Maria m'ahe Jesu, ni banabahabo yena cwalo.

¹⁵ Ka ona mazazi ao, balumeli ba ba eza mwanda ni mashumi a mabeli ne ba kopani. Cwale Pitrosi a yema mwahal'a bona, mi a ba bulelela, a li,

¹⁶ “Banabahesu, ne ku tokwahala kuli se ne si polofitilwe mwa Mañolo ki Moya o Kenile si ezahale. Ka mulomo wa Davida, Moya u polofitile bakeñisa Judasi ya fetuhile mueteleli wa batu ba ba sweli Jesu.

¹⁷ Judasi ne li yo muñwi wa sitopa sa luna, mi ne ku na ni s'a n'a ketezwi mwa musebezi wa luna.”

¹⁸ Ka mali a n'a fumani fa kezo ya hae ye maswe, a leka simu mw'a il'o shwela. A pazuha fahali, mi mala a hae a labukela fande.

¹⁹ Taba yeo ya utwiwa ki ba ba ne ba pila mwa Jerusalema kaufela, mi ka puo ya bona, simu yeo ba i biza Akeldama, kikuli Simu ya Mali.

²⁰ “Kakuli ku ñozwi cwana mwa Buka ya Lipina, ‘Ndu ya hae i be litota, mi ku si ke kwa pila mutu mwateñi.’ Hape ku ñozwi cwana, ‘Sibaka sa hae si yoliwe ki u sili.’

²¹ “Cwalehe, lu bata mutu ya ta kena ku luna, a be paki ya zuho ya Mulena Jesu. U swanezi ku ba yo muñwi wa ba ba ne ba zamayanga ni luna nako kaufela, Jesu ha n'a sa pota-pota mwa naha ni luna.

²² U lukela ku ba mutu ya n'a inzi ni luna ku kalela ku Joani h'a mu kolobeza, mane ku fitela zazi leo Jesu h'a ngiwa mwahal'a luna ku ya kwa lihalimu.”

²³ Kiha ku supwa batu ba babeli, ili Josefa, ya n'a bizwa Barsabasi kapa Justusi, ni Matiasi.

²⁴ Mi, kaufela hamoho, ba lapela, ba li, “Mulena, wena ya ziba lipilu za batu kaufela, u lu supeze y'o ketile mwahal'a batu bao ba babeli.

²⁵ A te a nge sibaka sa Judasi mwa musebezi wo, wa buapositola w'a siile ku ya kwa sibaka se si mu swanela.”

²⁶ Mwamulaho a zeo, ba laula mi kwa swalwa Matiasi kuli a kene mwa sitopa sa baapositola ba lishumi ka a li muñwi.