Joele 1 - Bibele ye Kenile (Catholic Edition)

¹ Ki ye zibiso ya Muñ'a Bupilo ku Joele, mwan'a Petuele.

Sililo sa sinyehelo ya lico

² Mu teeleze, mina batu ba bahulu. Ni mutu kamukana ya li mwa Juda, a teeleze. Kana nto ye cwalo i kile ya ezahala mwa bupilo bwa mina, kamba ka linako za bo ndat'a mina?

³ Mu i bulelele bana ba mina. Ni bona ba ka bulelela bana ba bona, mi bao, ba ka bulelela ba lusika lo lu sa taha.

⁴ Nzie ye ñata hahulu i cile lico. Ze siilwe ki ya pili li t'o ciwa ki ya mwamulaho.

⁵ A mu zuhe, mu lile, mina matahwa. Mu lile, mina banwi ba waine. Miselo ya veine ya ku ezisa waine ye nca, i sinyizwe.

⁶ Naha ya luna i lwanisizwe ki mpi ya nzie. Nzie i maata hahulu, mi ha i konwi ku balwa. Meeno a yona a buhali sina a tau.

⁷ I sinyize miselo ya veine ya luna, mi i cile likota za luna za feiga. I cile makwati kamukana, ku siya mitai kaufela, ili twaa!

⁸ Mu lile, mina batu, sina kalibe ye lila munna ya n'a bata ku mu nyala.

⁹ Ha ku na lico kamba waine ya ku eza litabelo mwa Tempele. Baprisita ba lila kakuli ha ba na limpo za ku ezeze Muñ'a Bupilo litabelo.

¹⁰ Mwa masimu ha ku na se siñwi. Lifasi la silisa kakuli lico li sinyehile, miselo ya veine i omile, ni likota za olive li letukile.

¹¹ Mu utwe hahulu butuku, mina balimi. Mu lile, mina mu babalela masimu a veine, kakuli buloto, mabele, ni lico kaufela li sinyehile.

¹² Miselo ya veine ni likota za feiga li letukile. Likota za miselo kaufela li omile. Tabo ya batu ni yona i felile.

¹³ Mu apale liapalo za maswabi mi mu lile, mina baprisita ba ba sebeza kwa katala! Mu y'o silisa mwa Tempele busihu kaufela! Ha ku na lico kamba waine ze mu ka fa Mulimu wa mina.

¹⁴ Mu laele kuli ku be ni lizazi la ku itima lico. Mu eze mukopano o mutuna. Mu kopanye baeteleli ni batu kaufela ba Juda mwa Tempele ya Mulena Mulimu wa mina, mi mu itilelele ku yena.

¹⁵ Lizazi la Muñ'a Bupilo li fakaufi, ili la ka tisa manyando a zwa ku yena. Lizazi leo li ka tisa ze sabisa cwañi!

¹⁶ Limela za lico li sinyehile lu nze lu li bona. Ha ku na tabo mwa Tempele ya Mulimu wa luna.

¹⁷ Lico li sinyehile lu nze lu li talimezi. Ha ku na lico za ku buluka mi cwale matuli a mukungulu s'a sinyehile.

¹⁸ Likomu li liliswa ki manyando, kakuli ha li na bucwañi. Mitapi ya lingu ni yona ya nyanda.

¹⁹ Ni itilelela ku wena, Muñ'a Bupilo, kakuli libaka ze na ni bucwañi ni likota li omile kaufela inge ze n'e cisizwe ki mulilo.

²⁰ Mane ni lifolofolo za mwa naheñi, li itilelela ku wena kakuli milapo i kalile.