Joani 1 - Bibele ye Kenile (Catholic Edition)

Jesu ki Linzwi la Bupilo

¹ Lifasi li si ka ezwa kale, Linzwi ne li se li li teñi. Linzwi ne li li ku Mulimu, mane ne li li Mulimu.

² N'a li ku Mulimu ku zwa kwa simuluho luli.

³ Mulimu u ezize lika kaufela ka yena, mi ha ku na ni se sikana se si ezizwe kwand'a hae.

⁴ Ku yena ne ku na ni bupilo, mi bupilo bo, bu tisize liseli kwa batu.

⁵ Liseli la benya mwa lififi, kono lififi ha li si ka li koma.

⁶ Mulimu a luma numwana wa hae, ili mutu ya bizwa Joani.

⁷ Yena a taha ku t'o paka ni ku bulelela batu ka za liseli. A taha kuli batu kaufela ba lumele ka bupaki bwa hae.

⁸ I ne i si yena liseli. N'a tile feela ku t'o paka za liseli.

⁹ U teñi yo ya benyeza mutu kaufela ya taha mwa lifasi. Ki yena ya n'a li liseli la niti.

¹⁰ N'a li teñi mwa lifasi, mi lifasi ne li ezizwe ka yena, kono nihakulicwalo ba lifasi ha ba si ka mu zibelela.

¹¹ N'a tile ku bahabo yena, kono banabahabo yena ha ba si ka mu amuhela.

¹² Nihakulicwalo, ba ba mu amuhezi ni ku lumela ku yena, u ba file tukelo ya ku ba bana ba Mulimu.

¹³ Ha ba si ka ba bana ba Mulimu ka ku pepwa ki mali, kamba ku lata kwa nama, kamba ka tato ya mutu, kono ki ka tato ya Mulimu ndat'a bona kasibili.

¹⁴ A fetuha ku ba mutu, mi a pila mwahal'a luna. Lu boni kanya ya hae ye tezi sishemo ni niti. Kanya yeo ne li yona y'a n'a fumani ka ku ba Mwana a li muñwi feela wa Mulimu.

¹⁵ Joani a bulela ka yena. A huweleza, a li, “Ki yena ye ne ni bulela ka za hae, yena yo, ha ne ni ize, ‘Wa taha mwamulaho wa ka, kono ki yo mutuna ku ni fita, kakuli n'a li teñi ni si ka pepwa kale.’ ”

¹⁶ Ka sishemo sa hae se situna, u lu tohonolofalize kaufel'a luna, ka ku lu fa limbuyoti ni ku li ekeza ka nako ni nako.

¹⁷ Mulimu u lu file Mulao ka Mushe, kono sishemo ni niti li tile ka Jesu Kreste.

¹⁸ Ha ku na mutu ya kile a bona Mulimu, haisi Mwan'a hae feela wa libanda ya inzi ni yena. Ki yena ya lu patululezi za hae kaufela.

Linzwi la Joani Mukolobezi

¹⁹ Ze, ki zona z'a n'a bulezi Joani kwa Majuda ba Jerusalema ha ba luma baprisita ni Malivi ku t'o mu buza kuli, “Kana ki wena mañi?”

²⁰ Joani n'a si ka hana ku alaba, kono n'a bulezi patalaza, a li, “Ha si na Mesia.”

²¹ Kiha ba mu buza, ba li, “Kanti cwale wena u mañi? Kana ki wena Elia?” Joani a ba alaba, a li, “Batili, ha si na.” Ba mu buza hape, ba li, “Kana ki wena Mupolofita ya libelezwi, nji?” A ba alaba hape, a li, “Batili.”

²² Cwale ba li ku yena, “Ki wena mañi? Kakuli lu swanezi ku y'o fa ba ba lu lumile kalabo. Cwale ipulele, ‘Ki wena mañi?’ ”

²³ Joani a alaba, ka ku itusisa manzwi a mupolofita Isaya h'a li, “Ki na ‘Linzwi la ya huweleza mwa naheñi, le li li, Mu lukise nzila mw'a ka t'o zamaya Mulena!’ ”

²⁴ Ba ba ne ba lumilwe ku Joani ne ba zwa kwa Bafalisi.

²⁵ Ba buza Joani hape, ba li, “Haiba ha si wena Mesia, kapa Elia, kapa Mupolofita ya libelezwi, cwalehe, kiñi ha u kolobeza?”

²⁶ Joani a ba alaba, a li, “Na, ni kolobeza ka mezi feela, kono mwahal'a mina ku na ni mutu ye mu sa zibi.

²⁷ Wa taha mwamulaho wa ka, mane ha ni swaneli nihaiba ku tamulula makatulo a hae.”

²⁸ Zeo kaufela li ezahalezi mwa Betania mwabuse bwa Nuka ya Jordani, mw'a n'a kolobelezanga Joani.

Jesu, Ngunyana ya Mulimu

²⁹ Habusa, Joani a bona Jesu a taha ku yena, mi a li, “Ki yo Ngunyana ya Mulimu ya swalela libi za batu ba lifasi.

³⁰ Ki yena ye ne ni bulela ka za hae, yena yo, ha ne ni ize, ‘Ku taha mutu mwamulaho wa ka, ili yo mutuna ku ni fita, kakuli n'a li teñi, na, ni si ka pepwa kale.’

³¹ Ni na, ne ni sa zibi kuli ne i ka ba mañi, kono ha ni til'o kolobeza ka mezi i ne li ku mu zibahaza kwa batu ba Isilaele.”

³² Joani a fa bupaki bo hape, a li, “Ni iponezi Moya o Kenile ha u zwa kwa lihalimu sina liiba ni ha u t'o lula fahalimw'a hae.

³³ Ni cwale ne ni sa mu zibi, kono Mulimu ya n'a ni lumile ku t'o kolobeza ka mezi, ki yena ya n'a ni bulelezi kuli, ‘Mutu y'o ta bona a inwa ki Moya o Kenile fahalimu, ki yena ya ka kolobeza ka Moya o Kenile!’ ”

³⁴ Joani a ekeza ku bulela, a li, “Ni iponezi nto yeo, mi ni tiisa kuli ki yena Mwan'a Mulimu.”

Balutiwa ba pili ba Jesu

³⁵ Habusa, Joani n'a inzi honafo hape ni ba babeli ba balutiwa ba hae.

³⁶ H'a bona Jesu a zamaya-zamaya, a li, “Ngunyana ya Mulimu ki yo!”

³⁷ Balutiwa bao ba babeli ba utwa ha n'a bulela cwalo, mi ba latelela Jesu.

³⁸ Jesu a itemuna mi a bona kuli ne ba mu latelela, kiha s'a ba buza, a li, “Mu bata sika mañi?” Ba mu alaba, ba li, “Rabbi,” (ki kuli Muluti) “u ina kai?”

³⁹ Jesu a ba alaba, a li, “A mu tahe, mu t'o bona.” Kiha ba ya ni yena. Ba bona kwa n'a pila, mi ba tola ni yena lizazi leo, kakuli ne se li manzibwana.

⁴⁰ Yo muñwi wa ba babeli ba ba ne ba utwile manzwi a Joani, ni ba ba ne ba latelezi Jesu, i ne i li Andreasi munyan'a Simoni Pitrosi.

⁴¹ Honafo, Andreasi a katana muhulwan'a hae Simoni, mi a li ku yena, “Lu fumani Mesia,” kikuli Kreste ha ku fetulwa.

⁴² Kiha s'a tisa Simoni ku Jesu. Jesu a mu talimisisa, mi a li, “Ki wena Simoni, mwan'a Joani. Ku zwa cwale libizo la hao li ta ba Kefasi,” kikuli Pitrosi, kamba Licwe, ha ku fetulwa.

Jesu u biza Filipi ni Natanaele

⁴³ Habusa, Jesu a hupula ku ya kwa Galilea. A fumana Filipi mi a mu bulelela, a li, “Ni latelele!”

⁴⁴ Filipi ne li wa mwa munzi wa Betsaida, mo ne ba yahile bo Andreasi ni Pitrosi.

⁴⁵ Filipi kih'a fumana Natanaele, mi a li ku yena, “Lu fumani mutu yo Mushe a ñozi ka za hae mwa Buka ya Mulao, yo hape bapolofita ba ñozi ka za hae. Ki Jesu wa Nazareta, mwan'a Josefa.”

⁴⁶ Natanaele a mu buza, a li, “Kana ku ka zwa nto ye nde mwa Nazareta?” Filipi a mu alaba, a li, “Taha, u t'o bona!”

⁴⁷ Jesu h'a bona Natanaele a nz'a taha ku yena, a bulela ka za hae, a li, “Yo ki Muisilaele luli, ya si na buhata!”

⁴⁸ Natanaele a buza Jesu, a li, “U ni zibile cwañi?” Jesu a mu alaba, a li, “Ne ni ku boni ha n'o li mwatas'a kota ya feiga, Filipi a si ka ku biza kale.”

⁴⁹ Natanaele a alaba, a li, “Muluti, luli u Mwan'a Mulimu! Ki wena Mulena wa Isilaele!”

⁵⁰ Jesu a mu alaba, a li, “Kana u lumela feela kakuli ni ku bulelezi kuli ne ni ku boni mwatas'a kota ya feiga? U ka bona ze tuna ku fita zeo.”

⁵¹ Mi a ekeza hape, a li, “Ni mi bulelela niti, ni li, ‘Mu ta bona lihalimu ha li kwaluluha ni mangeloi a Mulimu h'a ya kwahalimu, ni h'a shetumukela hape fahalimw'a ka, na, Mwan'a Mutu!’ ”