Jakobo 1 - Bibele ye Kenile (Catholic Edition)

Litumeliso

¹ Ki na Jakobo, mutanga wa Mulimu ni wa Mulena Jesu Kreste. Ni lumelisa batu ba Mulimu kaufela ba ba hasanezi mwa lifasi kamukana.

Tumelo ni butali

² Banabahesu, mu bone kuli ki litohonolo ha mu tahelwa ki mifuta-futa ya miliko.

³ Mwa ziba kuli haiba tumelo ya mina i tula muliko, ona muliko wo u tahisa mutundamenyi.

⁴ Kono mu tokomele kuli mutundamenyi wa mina u bonahale hande, mu be ba ba kondile, ku kondelela, ba ba si na se ba tokwile.

⁵ Kono haiba yo muñwi wa mina a tokwa butali, a bu kupe ku Mulimu, ya ta mu fa bona, kakuli Mulimu u fanga batu kamukana ka sishemo ni ka buñata.

⁶ Kono u swanezi ku kupa ka tumelo, a sa bilaeli ni hanyinyani. Ya bilaela u swana ni mandinda a liwate a zamaiswa ni ku kubyaniswa ki moya.

⁷ Mutu ya cwalo, a si ke a hupula kuli u ta amuhela se siñwi ku Mulena.

⁸ H'a na niti, mi wa lika-lika ku z'a eza kaufela.

Bubotana ni bufumi

⁹ Mulumeli wa mubotana u swanezi ku ikuhumusa, Mulimu h'a mu cimbula.

¹⁰ Mufumi cwalo u swanezi ku ikuhumusa, Mulimu h'a mu kutiseza kwatasi, kakuli mufumi u ta sinyeha sina palisa ya mwa naheñi.

¹¹ Lizazi li pazula ni mufutumala wa lona mi li cisa simela. Palisa ya nyana, ya wa, mi bunde bwa sona bwa sinyeha. Kamukwaoswana, ni yena mufumi u ta sinyeha h'a nz'a lukisa lika za hae.

Butata ni miliko

¹² U na ni litohonolo mutu ya tula miliko, kakuli ha s'a tuzi, u ta fiwa bupilo bo bu sa feli, ili mupuzo o sepisizwe ki Mulimu ku ba ba mu lata kaufela.

¹³ Mutu h'a likiwa, a si ke a li, “Ki Mulimu ya ni lika.” Kakuli Mulimu h'a koni ku likiwa ki bumaswe, mi hape yena kasibili h'a liki mutu.

¹⁴ Kono mutu u likiwa ha s'a hohiwa ni ku swasiwa ki takazo ya hae luli ye maswe.

¹⁵ Cwale, takazo ya hae ha i se i tiile, i tahisa sibi. Mi sibi ha si se si hulile, si zwala lifu.

¹⁶ Banabahesu ba ba latiwa, mu si ke mwa ipuma!

¹⁷ Mpo ye nde ni ye lukile kaufela i zwa kwa lihalimu, ku Mulimu Ndate ya ezize maseli a mwa mbyumbyulu, yo ku si na petuho ku yena kapa ya sa cinci.

¹⁸ Ka ku lata kwa hae u lu file bupilo, ka linzwi la niti, kuli lu be ba pili kwa libupiwa za hae kaufela.

Ku utwa ni ku eza

¹⁹ Banabahesu ba ba latiwa, mu hupule se! Yo muñwi ni yo muñwi wa mina a akufele ku teeleza, kono a be bunya kwa ku bulela ni kwa ku nyema.

²⁰ Mutu ya nyemile h'a ezi se si lukile fapil'a Mulimu.

²¹ Kabakaleo, mu ambuke ze silafaza kaufela ni likezo ze maswe kamukana. Mu amuhele ka buikokobezo linzwi le li calwa ki Mulimu mwa lipilu za mina, kakuli li kona ku mi pilisa.

²² Mu si ke mwa ipuma ka ku teelezanga feela linzwi la Mulimu. Kono mu eze ze mu utwile.

²³ Kakuli ya teeleza feela linzwi, a sa ezi se si laelwa ki lona, u swana ni mutu ya ipona mwa siiponi mi u bona mw'a inezi.

²⁴ Ha s'a iponi, i be wa zamaya, mi kapili u libala mw'a bonahalela.

²⁵ Kono ya talimisisa hande mwa mulao o kondile, o lukulula batu, mi a u mamelanga, i si ya teeleza feela ni ku libala, kono ili ya eza se si laelwa ki ona, mutu yo u ta tohonolofazwa ki Mulimu ku z'a eza kamukana.

²⁶ Haiba mutu a hupula kuli ki mulumeli, mi a palelwa ku iswala ka lulimi, wa ipuma, mi bulumeli bwa hae ha bu na tuso.

²⁷ Bulumeli bo bu hupulwa ki Mulimu Ndate kuli ki bo bu kenile ni bwa niti, ki ku tokomela lindiyala ni limbelwa mwa manyando a bona, ni ku ipabalela ku ze maswe kaufela za lifasi a si na koli.