Baefese 1 - Bibele ye Kenile (Catholic Edition)

Litumeliso

¹ Ki na Paulusi, muapositola wa Jesu Kreste ka tato ya Mulimu. Ni ñolela mina balumeli ba ba pila mwa Efese, ba ba sepahala mwa bupilo bwa bona ku Jesu Kreste.

² Mulimu Ndat'a luna, ni Mulena Jesu Kreste, ba mi fe sishemo ni kozo.

Limbuyoti ze lu fiwa ki Mulimu ka Kreste

³ Ku lumbwe Mulimu, Ndat'ahe Mulen'a luna Jesu Kreste! Mwa kopano ye lu na ni yona ka Kreste, Mulimu u lu tohonolofalize ka ku lu fa limpo kaufela za moya mwa lihalimu.

⁴ Kakuli lifasi li si ka eziwa kale, Mulimu n'a s'a iketezi luna kuli lu be ba hae ka Kreste, ni kuli lu be ba ba kenile, ba ba si na mulatu, fapil'a hae.

⁵ Kabakala lilato la hae, Mulimu n'a lelile kale ku lu kutiseza ku yena, sina bana ba hae, ka Jesu Kreste. U ezize cwalo kakuli ki mw'a n'a latela.

⁶ A lu lumbeke Mulimu kabakala sishemo sa hae se si komokisa, s'a lu file ka Mwan'a hae ya latwa.

⁷ Kakuli ka lifu la Kreste lu lukuluzwi, mi libi za luna li swalezwi. Mulimu u lu bonisize cwalo butuna bwa sishemo sa hae,

⁸ s'a lu file ka buñata bo butuna! Ka butali ni kutwisiso ya hae,

⁹ Mulimu u ezize s'a n'a lelile, mi u lu zibisize mulelo wa hae, o n'o patilwe ni w'a n'a itatezi kale ku u peta ka Kreste.

¹⁰ Mulelo wo, w'a ta peta Mulimu ka nako ye lukela, ki wa ku ikubukanyeza linto kamukana ze mwa lihalimu ni ze mwa lifasi ni ku li beya mwa maata a muzamaisi a li muñwi, yena Kreste.

¹¹ Linto kamukana li ezwa ka mulelo ni ka tato ya Mulimu. Mi Mulimu u lu ketile, luna Majuda, kuli lu be ba hae ka ku kopana ni Kreste, kakuli ki mulelo ni muhupulo wa hae o n'o li teñi i sa li kwa makalelo.

¹² Luna, ba pili ku sepa Kreste, lu lumbe kanya ya Mulimu!

¹³ Ni mina cwalo, ha mu utwile litaba za niti, ili zona Litaba ze Nde za Mulimu ze tiselize bupilo, mu lumezi ku Kreste, mi Mulimu u mi beile liswayo ka ku mi fa Moya o Kenile w'a n'a sepisize.

¹⁴ Moya o Kenile ki sisupo sa kuli lu ta amuhela seo Mulimu u si sepisize be ili ba hae, mi u tiisa niti kuli Mulimu u ta ba fa tukuluho ye tezi. Lu lumbeke kanya ya hae!

Tapelo ya Paulusi

¹⁵ Ka libaka le, ki kale ni sa li ni utwela tumelo ya mina ku Mulena Jesu ni lilato la mina kwa batu ba Mulimu kaufela.

¹⁶ Ku zwa fo, ha ni tuheli ku itumela ku Mulimu kabakala mina. Na mi hupula mwa litapelo za ka.

¹⁷ Ni kupa Mulimu wa Mulen'a luna Jesu Kreste, yena Ndate ya tezi kanya, ku mi fa Moya o' ka mi talifisa ni ku mi supeza Mulimu kuli mu mu zibe.

¹⁸ Ni kupa kuli mihupulo ya mina i kwaluluhe, kuli mu kone ku utwisisa sepo ye mu bizelizwe ni butuna bwa matohonolo ao Mulimu u a bulukezi be ili ba hae.

¹⁹ Ni kupa kuli mu utwisise ni kuli maata a hae ki a matuna cwañi a sebeza ku luna ba ba lumela. Ona maata ao kasibili a sebeza ku luna ki a komokisa luli.

²⁰ A bonisizwe ki Mulimu muta a zusa Kreste kwa bafu, mi a mu inisa ku la bulyo la hae mwa mabaka a kwa lihalimu.

²¹ Koo, Kreste u busa fahalimw'a babusi, milonga, maata, malena ni mabizo kamukana a ka bizwa ka ona, isi mwa lifasi le feela, kono ni ku le li sa taha.

²² Mulimu u beile linto kaufela kwatas'a mahutu a Kreste, mi hape u mu file kuli fahalimw'a linto kamukana i be yena toho ya Keleke.

²³ Keleke ki mubili wa Kreste, ku talelela kwa hae, yena ya tezi mwa linto kaufela kai ni kai.