Efeso 1 - Ecorit Aŋejuk 1969

Efonya Paulo Aati

¹ Ani Paulo efahata olo Yesu Kristo ta awahan ono Hollum. Egyoro ni jyo aati Hollum hulo Efisa hul arai aheruhok jyo Yesu Kristo.

² Ijara amehino hatawana jihatai iko nelik taji on ottu’to jyo Hollum Monye hohoi iko jyo Hobu Yesu Kristo.

Emuniti Huno Oloyiri

³ Ijara etahabuyo hatawana jyo Hollum Monye Hobu hohoi Yesu Kristo al isyo’to jihohoi to Kristo emuniti daŋ huno Oloyiri ol Olibo. Arai isi emuniti huno edou.

⁴ Onyimu nya Hollum hohoi to Kristo hobeŋ inyi oyyeu afau iwanari awati hul olibori’to iko hul obeŋi’to iko neyyata ihosyere honyi.

⁵ Onyimu nya inyi hohoi ta namuno irari aduri honyi to Yesu Kristo nyo ara ana awahan honyi an itamuno’to inyi.

⁶ Oŋida hohoi esyo etahabuyo jihonyi ta namehino honyi on obolo’to on omehitari inyi jihohoi to lya ol omuno inyi.

⁷ Nyo inyyaŋa nya inyi hohoi ta nooto honyi, bwo fe ewon hohoi iko ahohina ono eyyata ta amehino honyi on obolo’to,

⁸ on odulo’to wanan jihohoi. Bwo fe ta nolofyoro honyi iko amijana honyi erre daŋ,

⁹ itahutak inyi jihohoi awahan honyi inya idimani. Awahan honyi ana an onyimu inyi ta ahwan honyi,

¹⁰ jo al ottubai aŋasi, ottubak adi inyi erre daŋ to Kristo, erre hutte dou iko hutta fau.

¹¹ Era hohoi ebariti honyi nyo onyimu nya inyi hohoi bwo fe igyama inyi erre daŋ ta awahan honyi.

¹² Tania hohoi hunya eyihi’to jyo Kristo ahosyere, oŋida hohoi emanya itahabuyere inyi ta akwatan honyi.

¹³ Bwo fe iruhoto nya itai inya itaniŋuna tai nelahode iko asayyo hun oyiji hun italahunierek itai. Ta neyihina hatai jihonyi oridinyani jihatai Oloyiri ol Olibo linya ocoroni jihatai.

¹⁴ Nyo ara inyi etteri olo erre hun isyo adi Hollum jihohoi al ottubak inyi laati daŋ hunya inyyaŋa inyi bwo fe itahabuye adi isi inyi ta akwatan honyi.

Amojo Paulo ta Laati Hutto Efisa

¹⁵ Tania to noloŋ ninya etaniŋuniere ni neruk hatai jyo Hobu Yesu iko namuno hatai jyo aati Hollum daŋ,

¹⁶ abeŋ ni apwak esyoryo ahumo jyo Hollum tetai al amojotyo ni tetai.

¹⁷ Amojo ni jo oŋida Hollum olo Hobu hohoi Yesu Kristo, Monye olo akwatan isyo jihatai oloyiri ono olofyoro imijaniere inyi,

¹⁸ bwo fe iŋayere atajya hatai iyihiniere jo ofwonni adi emuniti jyo hul iloŋo inyi. Amojo ni jo oŋida imijana ebariti honyi hun obolori’to hun arai awati honyi.

¹⁹ Bwo fe oŋida imijana abolori dwaran honyi jihohoi eruhok an itahutak nya inyi

²⁰ te etubuhuna honyi Kristo to ye ette ihanana inyi ihani iŋet honyi idou.

²¹ Bwo fe agalik inyi erre daŋ hutte dou, isi: anjelohyen, okumahyen, ajohin, olobyehyen, iko afureta daŋ huno afau ana iko afau on ottu’to.

²² Attati Hollum ihanana erre daŋ iwoyo hejek Kristo, bwo ihanak inyi inyi eleittok olo eklesya,

²³ an ara’to ihwa ahwan honyi bwo fe itufutak inyi erre daŋ.