Yoane 4 - BONKANDA WA NZAKOMBA

Yesu la bomoto owa Samalia

¹ Aki Nkolo eaka wae Bafalusi baoloka wete bakimi baata Yesu ko bandinʼende baolekola ba Yoane lʼauke,

² – lolo Yesu mongo ntinaki, lolo bakimiʼakande –

³ ende aolimana Yudea ko aoluta nda Ngalilaya.

⁴ Ko mboka elekʼende wae eko ecuwana Samalia.

⁵ Aokita ndʼonanga wa Samalia botangema Sukala, ntutama lʼitenela yʼokili iki Yakoba okaaka bonʼokae Yosefa;

⁶ ko etoko ea Yakoba eki eko. Eki Yesu owe lʼompele wa lokendo aokitase ngoko ndʼompempe wʼetoko. Jefa liki midi.

⁷ Ko bomoto owa Samalia aoyʼotokolʼasi. Yesu aolokela, Onkaya basi, mmele.

⁸ Eki bakimiʼakae ocwaka osomba toma ndʼonanga.

⁹ Bomoto owa Samalia akela, La we bosi Yuda ondombʼemi bosi Samalia basi ba mmamela ngamo? (ele Ba-Yuda la Ba-Samalia ntabakendakʼoseka).

¹⁰ Yesu aolamba, aolokela, Nga weaki nganji ea Nzakomba, ko lʼende okokela, Onkayʼasi, mmele, siki olombakʼende ko akokaya basi ba loiko.

¹¹ Bomoto aolokela, Nkolo, ofa lʼetokwelo, ko etoko eleki nji-ndo, oatʼasi bako ba loiko lima nko?

¹² Kamba wʼolekola nde Yakoba nkokoolo ekiso, otokaaki etoko ko amelaki limʼeko, ende lʼana bakande, la bibwa bikande?

¹³ Yesu aolamba, aolokela, Wengiʼonto omela basi bane ifoka lenkina mposa;

¹⁴ lolo osʼomela basi ba emʼokayʼende, afaoka lenkina mposa nye; lolo bako ba emʼokayʼende bifoyalema ndʼotemʼokande etoko eʼasi bandola wowo elaka nko loiko ja seko.

¹⁵ Bomoto aolokela, Nkolo, onkaya basi bako, nyango mpoka mposa, ko mpoyʼendo esi otokolʼasi.

¹⁶ Yesu aolokela, Neo, yete bome okawe, mpanga loyʼendo.

¹⁷ Bomoto aolamba, akela, Mpa lʼome. Yesu aolokela, Otefela o ci, Mpa lʼome,

¹⁸ eki wʼoataka baome batano, ko oko ole la we aeyoko, afa bome okawe: otefelaki nsosolo.

¹⁹ Bomoto aolokela, Nkolo, njena wae ole boteli.

²⁰ Baiseʼakiso bamemya-ki Nzakomba imemya nda ngongʼene, lolondʼinyo lokela, Yelusalema elʼitenela indeji la mmamemya ea Nzakomba.

²¹ Yesu aolokela, Bomoto, onjimezʼemi ekeke eoya e inyʼomemya Ise, afa nda ngongʼene ko afa nda Yelusalema.

²² Inyo lomemya ofʼinyʼea; iso tea oko omemyʼiso: ele loiko loya limʼele Ba-Yuda.

²³ Lolonde ekeke eoya, ko eokitʼaeyoko ee bamemyi ba nsosolo bamemyʼise la ndʼolimo ko la nsosolo; ele Ise ayase bandomemyʼende lʼelengʼeko.

²⁴ Nzakomba ale bolimo, siki iyʼandomemya, bomemyʼende ndʼolimo ko la nsosolo.

²⁵ Bomoto aolokela, Ndea wae Masiya otangema Kilisto aoya, ko a endʼoya ifotosangela baoyiʼauma.

²⁶ Yesu aolokela, Emʼonʼokotefeela nde nkʼende.

²⁷ Nkako bakimiʼakae baoya; kobaokamwa etefelʼende lʼomoto; lolo nkʼontʼokiyo ondouolaki, Ondasa we na? nkina, Otefela lʼende lae?

²⁸ Nkako bomoto aocika ekucu ekae, ko aocwa ndʼonanga, ko aokela banto,

²⁹ Loyaka, lene bonto onsangelaki baoyi bakiʼmʼokelaka bauma; Tone afa Masiya nde?

³⁰ Iyo baolola limʼonanga, ko baoyʼele Yesu.

³¹ Ndʼekekʼeko bakimi bayokamʼende, bakela, Labi leka toma.

³² Lolo aolakela, Njoata toma ta ndala tofʼinyʼea.

³³ Bakimi baoluwana, bakela, La bontʼomo aoloyela yomba ya ndala?

³⁴ Yesu aolakela, Toma tokami wete nkele wango bokande ontomaki, ko nsiza bolemo bokae.

³⁵ Inyo lofokele, Nsanza iciki inei, ko emukelo eoliela? Loala, nsangelʼinyo losangyʼaisoʼakinyo ko lene basala, wete baolela, baolelama lʼemukelo.

³⁶ Nkʼaeyoko bomuki ayambe bofuto ko ayotakanya bamuka ba loiko ja seko; wae endʼondonaka ko lʼendʼomukaka basalangane bolongo.

³⁷ Etefeelo ea nsosolo wae ene, Omo ayone ko omo ayomuke.

³⁸ Ntomakʼinyo wae lomuke emukelo eko ekiʼnyo ntalokambaki bolemo, bantʼamo bakambaki ko inyo lokitana ndʼelemoʼekiyo.

³⁹ Koko bauke wa Ba-Samalia ba bonangʼoko baoloimeza ndʼewela ea joi liki bomoto otefelaka, Ansangelaki baoyiʼauma bakiʼmʼokelaka.

⁴⁰ Koko aki Ba-Samalia oyaka elʼende baoloonda wae ateme lʼiyo; ko aokitase lʼiyo nkʼeko bembilʼefe.

⁴¹ Ko bantʼamo bauke baoloimeza o la joi likande mongo.

⁴² Koko baokela bomoto, Aeyoko timeza, afa ndʼewela ea nsango ekawe: elʼiso mongo toloka, ko tea wae one ale Boikyi owʼenanga beuma o nsosolo mongo.

⁴³ Aki bembile bekʼefe oleke, aolimanʼeko ko aocwa Ngalilaya.

⁴⁴ Eki Yesu mongo osangaka wae boteli ntaataka lokumo ndʼese ekae mongo.

⁴⁵ Akiʼndʼokite Ngalilaya, Ba-Ngalilaya baolosambela lʼosalangano ekiʼyʼenaka belemo beuma bekiʼndʼokambaka ndʼelambo nda Yelusalema, ekiʼyʼocwaka ndʼelambo o ngoko.

Yesu aikya bona owa capitaine nda Ngalilaya

⁴⁶ Ko aoya lenkina nda Kana ea Ngalilaya wiji bokiʼndʼofaningolaka basi vina.

⁴⁷ Koko capitaine ea Roi aki eko, ko bona okae owa jende aki la nkangi nda Kapalanauma. Aki bontʼone okaka wae Yesu aoya nda Ngalilaya lima Yudea aocwʼelʼende, ko aoloonda wae akitele elʼiyo ko aikya bona okande otutsi lʼiwa.

⁴⁸ Yesu aolokela, Ayakʼinyo lofene ntaza lʼelemo bia nkakamwa lofaimeza nye.

⁴⁹ Capitaine ea Roi aolokela, Nkolo, yaka, yokitʼekaʼmi, atafa bona okami owa.

⁵⁰ Yesu aolokela, Wambokende; bonʼoke aosilʼoika. Bontʼoko aolimeza joi liki Yesu osangelaka, ko aokenda.

⁵¹ Nkʼakitelʼende, bakwala bakae baoyʼokumana lʼende, baosanga wae bona okande aika.

⁵² Ko aolauola jefa loswele likiʼndʼoangaka loika, ko baolokela, Mbilʼeki lobi nga midi, nkangi ea angala eolocika.

⁵³ La ngoko, ise aolea jefa liko nko liki Yesu okelaka, Bona oke aosilʼoika. Koko aolimeza o njimeza, ende mongo ko lʼiyʼauma baki ndʼilombe ikae.

⁵⁴ Lone wae lotaza jʼife loki Yesu okelaka limʼekiʼndʼoyaka lima Yudea nda Ngalilaya.