Yoane 2 - BONKANDA WA NZAKOMBA

Yesu ndʼelambo ea bolongai nda Kana

¹ Nda mbile eʼisato, baolamba elambo ea liala nda Kana ea Ngalilaya; ko nyango ea Yesu aki eko:

² ko baoleta Yesu lʼakimiʼakande ndʼelambo eko.

³ Ko aki vina okutswa, nyango ea Yesu aolokela, Bafa la vina mo!

⁴ Ko Yesu aolokela, Bomoto, joi liko litutsi lʼiso nko? Ekeke ekami etafokita.

⁵ Nyango ekae aokela bakambyi, Joi nko loswele li endʼosangelʼinyo, lokela ngoko.

⁶ Koko bijwa biʼonene bia bikenje botoa bikemi eko, ncina ea elenge ea Ba-Yuda ea mpetola, wengi ijwa yokoka la baeza bafe nkina basato.

⁷ Yesu aolakela, Loyoza mpoke lʼasi to. Ko baoyozʼiko to.

⁸ Nkako aolakela, Lotokolʼaeyoko, ko lotombele wesanyi owa elambo.

⁹ Ko baotomba. Ko aki wesanyi owʼelambo omekaka basi bafaningwaki vina, ko ntea limʼeki vina oyaka, lolo bakambyi batokolakʼasi baolea, wesanyi owʼelambo aoleta wengi owa waji,

¹⁰ ko aolokela, Wengiʼonto alekezakʼanto nda joso vina eʼolotsi, ko ae banto omelʼouke, mpanga alekezʼiyo eko ekutswa ngenge: lolo we ofonga vina eʼolotsi elaka nkʼaeyoko.

¹¹ Yesu aokela lotaza lone lokae ja joso nda Kana ea Ngalilaya, ko aoleneya jilangi likae, ko bakimiʼakande baoloimeza.

¹² Ndʼafeka aokitela nda Kapalanauma, ende la nyango ekae, lʼakune ko lʼakimiʼakae. Ko baoyalʼeko betso nkʼeuke.

Yesu nda Tempelo (efetswelo)

¹³ Ko elambo ea Efendelo ea Ba-Yuda eotutama, ko Yesu aocwa nda Yelusalema.

¹⁴ Koko aotana nda Tempelo iyʼatekyaki ngombo, la mpate la bimbenga, lʼiyʼaenzaki bosolo bakitase nkʼeko.

¹⁵ Ko aokela boambo wʼekulu, aoloza lima Tempelo mpate la ngombo iuma, ko aofanzola bosolo wʼanto bae-nzanyaki boko, ko aokalimola mesa ikiyo.

¹⁶ Ko aokela iyʼatekyaki bimbenga, Limola bine limʼane; talokelake ilombe ya Fafa ekami esombelo eʼaoka.

¹⁷ Bakimi bakae baolofwa wete joi jokotama, Mposa ea mpia eʼilombe ikawe eonsiza.

¹⁸ Ba-Yuda baolamba, baolokela, Lotaza loe wʼoteneya na ekela we baoyiʼane?

¹⁹ Yesu aolamba, aolakela, Lofita ilombʼine, ko mpanga njemyʼiko nda bembile besato.

²⁰ Ko Ba-Yuda baokela, Etongelo eʼilombʼine emongaki mbula ntukʼinei lʼotoa, ko we wutʼemyʼiko ndʼembile besato nde?

²¹ Lolo aotefela la ncina ea ilombe ikae yʼoeko wae jonge likae mongo.

²² Koko aki ndʼokunjwaka limeʼele bawei bakimiʼakae baolofwa wete atefelaki joi line, ko baolimeza ekotelo ea Nzakomba, ko la joi liki Yesu otefelaka.

²³ Ko akiʼnde nda Yelusalema ndʼelambo ea Efendelo, bouke wʼanto baolimeza nda lina likae, ekiʼyʼenaka ntaza ikiʼndʼokelaka.

²⁴ Lolo Yesu ntilʼotema elʼiyo; ekiʼndʼeaka bantʼauma

²⁵ ko ntela wela wa bosangi wae osangelʼende elenge eʼonto, ekiʼnde mongo eaka betema biʼanto fole.