Toango 4 - BONKANDA WA NZAKOMBA

Kaina la Abele

¹ Ko Adama aala Ewe, waji okae, ko aofoswa jemi, ko aoota Kaina; aokela, “Njoata bonto lʼekambyelo ea Yawe.”

² Lenkina aoota Abele, bokune okae. Abele aki wesanyi owa mpate, lolonde Kaina aki bosali owʼamoci.

³ Ndʼafeka bʼelingi fele, Kaina aoyela bamuka bʼokili ngole mbeka ele Yawe.

⁴ Ko Abele aoyela nsomi ya botonga bokae ko la bauta bʼiko. Ko Yawe aosima Abele la mbeka ekande,

⁵ lolo ntasima Kaina la mbeka ekande. Ko Kaina aoloka nkele mongo, ko aominyʼelongi.

⁶ Ko Yawe aokela Kaina, “Oloka nkele lae? Ko ominyʼelongi lae?

⁷ Nga okelʼolotsi, ofaosimama losimo nde? Ko ngʼofokelʼolotsi, bobe boosama nda wiso; ko mposa eʼoko ele nkʼele we, lolo we yalema nkolo eʼoko.”

⁸ Ko Kaina akela Abele, bokune okae, “Kela tokende nda lisala.” Ko akʼiyo nda lisala Kaina aolemaela Abele bokune okae, ko aolooma.

⁹ Nkako Yawe aokela Kaina, “Abele, bokune oke, ale nko?” Ende aolamba, “Mpea; kamba emi nde bofongi owʼokune okami?”

¹⁰ Ko Yawe aolokela, “Joi liki wʼokelaka na? Lofoso jʼalongo ba bokune oke lombeleza limʼamoci.

¹¹ Ko aeyoko olambema la wambo wa tu limʼamoci bako baumbolaki bomwa wae bambe balongo bʼokune oke lima likata like.

¹² Asala we bamoci, bafaokofuleza toma; ko wifoyala nkangʼoloci lʼontʼondesesa ndʼokili,”

¹³ Ko Kaina aokela Yawe, “Nsisoza ekami eondekola, mpokuseya eko.

¹⁴ Bala, ondite mbilʼene lima bokiliʼone; ko njifisama lima elongi eke; njifoyalema nkangʼoloci lʼontʼondesesa ndʼokili; ko bonto nko loswele anyangʼontana ifomboma.”

¹⁵ Ko Yawe aolokela, “Ndʼewelʼeko, osʼooma Kaina, ende ifitama la witako o biitako nsambo.” Ko Yawe aolila lotaza ele Kaina, nyango bontʼotanʼende, afolooma.

¹⁶ Ko Kaina aokenda limʼa joso ja Yawe. Ko aofetsa nda Noda, wiji wa est ea Edene.

Bana baki Kaina

¹⁷ Kaina aoala waji okae ko aofoswa jemi, ko aoota Anoka. Kaina aotonga bonanga, ko aotangʼonangʼoko Anoka, lima lina jʼona okae.

¹⁸ Ko Anoka aoota Ilada; ko Ilada aoota Meuyaele; ko Meuyaele aoota Metusela; ko Metusela aoota Lemeke.

¹⁹ Ko Lemeke aokola baaji bafe; lina jʼomo liki Ada; ko lina jʼonkina liki Sila.

²⁰ Ada aotaki Yabala. Ende aki ise ea banto bafetsa nda tolombe ta bito, ko baongola nyama ya mbongola.

²¹ Lina ja bokune okae liki Yubala. Ende aki ise ea bantʼauma bafoma bongele la nkombi.

²² Ko Sila aotaki Tubala-Kaina. Ende aki botuli owa bifeko biuma bia konga la loolo. Ko nkana ea Tubala-Kaina aki Naama.

²³ Ko Lemeke aokela baaji bakae: “Ada la Sila, lokoza lolaka lokami; Inyʼaaji ba Lemeke lokoza baoyi batefelʼemi. Njoomʼonto ekiʼndʼonkotaka mpota, Ko njoomʼosekota ekiʼndʼonsakolaka.

²⁴ Nga bonto ifitama la witako biitako nsambo ndʼeloko ea Kaina, Nsosolo ifitama witako biitako ntuku nsambo la nsambo ndʼeloko ea Lemeke.”

²⁵ Ko Adama aoala lenkina waji okae, ko aoota bona, ko aoloila lina Sete, elʼende aokela, “Nzakomba aonkaya bona omo ndʼefosa eki Abele, oki Kaina oomaka.”

²⁶ Ko bona aootswa ele Sete ngoko, ko aoloila lina Enosa. Ndʼekekʼeko banto baangaki jeta lina ja Yawe ndʼoondo.