Toango 2 - BONKANDA WA NZAKOMBA

Emelo ea jende lʼomoto

¹ Elengʼeko emelo ea mbola lʼokili eosila, ko la belemo beuma biʼeko.

² Ko nda mbile ea nsambo Nzakomba aosiza bolemo bokande bokiʼndʼokambaka, ko aoloma nda mbile ea nsambo limʼelemo bekande beuma bekiʼndʼokambaka.

³ Ko Nzakomba aosakela mbile ea nsambo bokako wa swa, ko aekyaki eko ndʼoeko, eki ende omaka nda mbilʼeko lima belemo beuma beki Nzakomba emaka.

⁴ Ine wete iango ya mbola lʼokili aki bako emamaka, nda mbile eki Nzakomba emaka bokili la mbola.

⁵ Ekeke eko beyau betamele ndʼokili, ko njunda yʼasala itafomela; la ncina wae Nzakomba atafojweya mbula ndʼokili, ko bonto ntaki eko wae asale bamoci.

⁶ Lolonde emomonge eounda limʼokili, ko eoatela bokili bouma basi.

⁷ Nkako Yawe Nzakomba aoonda bonto mbaonda lima biucu biʼokili, ko aolula loe ja loiko ndʼaolo bakae, ko bonto aoyalema bonto oyoike.

⁸ Ko Yawe Nzakomba onaki lisala nda Edene, wiji wa est, ko aolilʼonto okiʼndʼoondaka nda lisala liko.

⁹ Ko Yawe Nzakomba aomeza limʼamoci wengi botamba bosimama ndʼaiso, ko la bolʼolotsi la ndala, ko la botamba wa loiko ndʼetei ea lisala, ko lʼotamba wa njea ea baoyi bʼolotsi lʼea baoyiʼobe.

¹⁰ Ko ntando eolola lima Edene, eatelaka lisala basi, ko limʼeko eokafwana biambi benei.

¹¹ Lina ja wambi wa joso wete Pisona; boko bolingola ese ea Afila euma. Wolo bole nda wijʼoko;

¹² ko wolo wʼesʼeko bolʼolotsi; ko bdellium la ekenje ea onyx balʼeko.

¹³ Ko lina ja ntando eʼife wae Ngiona: eko eolingola ese ea Etiopia euma.

¹⁴ Ko lina ja ntando eʼisato wete Yidikele; eko eleka nda est ea Asulia. Ko ntando eʼinei wae Pelata.

¹⁵ Ko Yawe Nzakomba aokolʼontʼoko, ko aoloila nda lisala ja Edene, wae asale ko afonge liko.

¹⁶ Ko Yawe Nzakomba aosisʼontʼoko, aokela, “Wambʼole bamuka ba wengi botamba bole nda lisala;

¹⁷ lolo botamba wa njea ea baoyi bʼolotsi la njea ea baoyiʼobe, toleke nye, ele mbile ee wʼola bamuka bʼotambʼoko wifowa mbawa.”

¹⁸ Ko Yawe Nzakomba aokela, “Afʼolotsi wae bonto ayale nkʼende kika; njifemelʼende bokambyi oonga lʼende.”

¹⁹ Ko Yawe Nzakomba emaki wengi nyama yʼokili limʼamoci, ko la wengi ifulu yʼaliko: ko aolayela ele Adama wae ene baina ba ende otangʼako: ko lina liki Adama otangaka nyama loswele, liko joyalema lina ja nyamʼeko.

²⁰ Ko Adama aolila nyama ya mbongola baina, ko la tofulu tʼaliko, ko la nyama yʼokonda iuma. Lolonde nkʼokambyi otanemaki oonga la Adama.

²¹ Ko Yawe Nzakomba aoatela Adama baisʼilo bo, ko etamaki. Akiʼndʼ etamaka, Yawe aokola bokangoʼokae bomoko, ko aokomba itenela iki boko la wunyu.

²² Ko Yawe Nzakomba aolema bomoto lima bokango bokiʼndʼokolaka limʼele Adama, ko aoloyela ele Adama.

²³ Ko Adama aokela, “One ale wese wa biese bekami, ko la wunyu lima wunyu bokami. Ende ifotangema bomoto, ekiʼndʼokolamaka limʼele jende.”

²⁴ Ndʼewelʼeko jende ifocika ise la nyango ekae, ko ifoamana la waji okae, ko iyʼakʼafe bifoyalema jonge limoko.

²⁵ Ko iyʼate baki lʼotaka, la jende la waji okae, lolo ntaboka nsoi.