Tito 3 - BONKANDA WA NZAKOMBA

Balako ele Ba-Masiya ba Kulete

¹ Wʼaofweya wete bafike bakulaka la bampifo, bimezʼiyo la lifiki, belame la wengi bolemo wʼolotsi.

² Batatangakʼonto lotango jʼobe, bataunake, lolo bayaleme la bongengo, beneyʼantʼauma elenge ea linsimi liuma.

³ Ekiʼsʼoyalaka nda joso lʼolole, ko lʼotendo, tofombamaki, toki nda likwala ja mposa ileki la bisengo bilenge la bilenge, tokendaki la nkele ea bonkita ko lʼinkunya, tinamaki la jino, ko totonanaki.

⁴ Lolonde aki liota ja Nzakomba Boikyi okiso ko la lolango lolangʼende banto enyaka,

⁵ atoikyaki; afa lʼelemo bia liongi bekiʼsʼokambaka, lolo elengʼele isei ikande, lʼesoelo ea mbaotswa lenkina, ko la njeema lenkina, ea Bolimo wʼoeko,

⁶ bokiʼndʼutezaka elʼiso o mpafula la Yesu Masiya Boikyi okiso,

⁷ wae isʼayengwa lʼoyaʼokande toyaleme basangoli, elengʼele lolendezo ja loiko lotasilaka.

⁸ Joi line lile nsosolo, ko ndanga wae osange baoyiʼane la nkakemya mongo, wae iyʼandimezaki Nzakomba bafonge jilʼotema nda nkakamba ea belemo biʼolotsi. Baoyiʼane balʼolotsi ko bale la nkito elʼanto.

⁹ Lolo fengola biuo bisamba wanya, la biandelo bia biotswelo, la lisa, la bikoji ndʼewela ea Esekyelo; baoyiʼako bafa la nkito, bale o mpampa.

¹⁰ Bonto okafolʼanto ndʼeloi, akiʼndʼolakeme la lofeli bolaka bomoko nkina belakʼefe, wʼofengole lifengo;

¹¹ ele we olea wae bonto owʼelengʼeko aolunga, ko aokelʼobe, aoyaumbʼende mongo likambo.

¹² A emʼotoma Alutema nkina Tukiko ele we, asaka la mposa wae oyʼelʼemi nda Nikapoli; elʼemi njosangya wae njalʼeko ndʼekeke ea mpio.

¹³ Fonga lokambya Zena bolaki owa Esekyelo, ko la Apolo, wae bakende nda lokendo lokiyo lʼolotsi, nyango bafosamba yomba.

¹⁴ Koko kela bantʼakiso bekele wae bakambe belemo biʼolotsi bendeji la biela bindelʼiyo nyango bafoyalema nga bafocwʼamuka.

¹⁵ Bale lʼemi bauma bakuola. Wʼauolʼiyo batokʼeefe ndʼimeezo. Boya boyale lʼinyʼauma.