Malako 5 - BONKANDA WA NZAKOMBA

Yesu lʼowa Ngelasa oki la a demona

¹ Ko baoya wijʼa lieke ndʼese ea Ba-Ngelasa.

² Akiʼndʼosafwa lima wato, bontʼoki lʼolimo wa linyamo aoya lima beomba, ko aokumana lʼende.

³ Bontʼoko aki lʼokitase bokae ndʼeomba; ko nkʼontʼokuseyʼotungyʼende lenkina nye, o lʼenyolo bia loolo;

⁴ elʼende aotungama betungama beuke la benyolo la bifoke, lolo aokanjola benyolo se, ko aotena bifoke kwa, ko nkʼonto okuseya lofololʼende.

⁵ Ko bikeke biuma, lʼotso la mbile, ndʼeomba la nda ngongo, ayobeleza ko ayakotʼomongo la bikenje.

⁶ Andenʼende Yesu limʼesi, aolikumwa ko aokusamelʼende,

⁷ ko aobeleza la lofoso ja bolo te, Joi ndatsʼemi la we na, Yesu, Bonʼowa Nzakomba oleki ka? Nkosimbela nsimbi la Nzakomba wae ofonsisoza!

⁸ Eki Yesu okelakʼende, Bolimo wa linyamo, olaka limʼelʼontʼone!

⁹ Ko aolouolʼende, Lina like na? Ko aolokela, Lina likami Etukuluku, elʼiso tolʼauke.

¹⁰ Ko aoloonda mbaonda mongo wae afasokozʼiyo limʼese eko.

¹¹ Botongo wʼonene wa ngulu boki eko nda ngongo, iola toma.

¹² Ko bademona baoloonda baokela, Ototome ele ngulu, kela totswa elʼiko.

¹³ Ko aolacikela mboka. Nkako belimo bia linyamo beolola, beolotswa nda ngulu, ko botonga wa ngulu nga nkotʼife bokitela ngongo la loangu, bokwela lieke, ko ngulu iowʼeko ndʼasi.

¹⁴ Baesanyi baolota, ko baolongoza joi liko ndʼonanga la ndʼokili boko bouma. Ko banto baoyʼoena joi likelamaki.

¹⁵ Baoyʼele Yesu, ko baolena bontʼoki la demona akitase, alotʼeto, ko bolimʼokae o ko, nkʼende oki lʼetukuluku eʼademona; ko baolokʼooma.

¹⁶ Ko iyʼandenaki baolasangela elenge eki joi liko okelamaka elʼendʼoki lʼademona, ko la joi liki ngulu.

¹⁷ Ko baanga loondʼende wae imane limʼokiliʼokiyo.

¹⁸ Akondelʼende nda wato bontʼoki lʼademona aoloonda wete ayale lʼende.

¹⁹ Ko aolofima mboka, lolo aolokela, Kenda ndʼolaʼoke, ele ilongo ike, ko wasangele baoyiʼako baki Nkolo okokeelaka, ko elengʼekiʼndʼokokakʼisei.

²⁰ Ko aokenda, ko aanga lokumya nda Dekapoli elenge ea belemo beki Yesu okeelakʼende, ko bantʼauma baokamwa.

Eikyelo ea bonʼowa Yailo lʼomotʼoki la nkangi eʼalongo

²¹ Ko aki Yesu ofendaka lenkina nda wato wijʼoi, etukuluku eʼenene eotakanʼelʼende. Ko aki ndʼeselo ea lieke.

²² Ko bokonji omo owa sunangonga oki la lina Yailo, aoya, ko andenʼende Yesu, aokwa ndʼakakʼakae,

²³ aoloonda o mbaonda mongo, akela, Bonʼokami, yomoto, atutsi lʼiwa. Yaka yafezʼende bakata, kela aike o mbaika.

²⁴ Ko aokenda lʼende. Ko etukuluku eʼenene eolokima, ko baokamʼelʼende.

²⁵ Ko bomoto aoya, oki lʼelekelo eʼalongo mbula jom lʼife,

²⁶ ko enakʼelo mongo la bitutelo bia bankangʼauke, akenzakʼeatelo ekae euma, ko ntatanʼekemo, lolo nkangi eokongokaka:

²⁷ ende okaki lokumo ja Jesu, ko aoya ndʼafekʼakande ndʼetukuluku, ko aofomwʼonkotoʼokae.

²⁸ Ekiʼnde otefelaka, Ayaka mpomwa o lʼonkotoʼokande kika njifoika.

²⁹ Ko nkakoyoko elekelo ekae eʼalongo eotena, ko aolea nda jonge likae wae aosilʼoika lima nkangi ekiʼnde.

³⁰ Yesu aokotola nkako wae mpamba eolola limʼelʼende, aokengwana ndʼetukuluku, ko aokela, Ofomwaki benkoto bekami na?

³¹ Ko bakimiʼakae baolokela, Wena wae etukuluku ekokama, ko okela nde, Ompomwaki na?

³² Ko alenda wiji la wiji wae enʼende okelaki joi liko.

³³ Lolonde eki bomoto eaka joi likelama elʼende, aoya lʼooma la ndalenga, aokwa nda joso likae, ko aolosangela joi liuma nye.

³⁴ Ko aolokela, Bona, imeezo eke eokoikya. Kenda la kuci ko kela oike nye lima nkangi eke.

³⁵ Nkʼatefelʼende, banto baoya limʼilombe yʼokonji owa sunangonga, baokela, Bonʼoke aosilʼowa. Otungya bolaki lenkina lae?

³⁶ Yesu okaki joi likiʼyʼotefelaka, ko aokela bokonji owa sunangonga, Tokakʼooma, lolo imeza o njimeza.

³⁷ Ko ntakaya bontʼomo ekendelo lʼende imola nko Petelo la Yakobo la Yoane, okosangi la Yakobo ise.

³⁸ Ko baokita ndʼilombe yʼokonji owa sunangonga. Ko aolena etongo la lilelo la njuula ea nkimo mongo.

³⁹ Ko akiʼndʼotswaka, aolakela, Lotongola ko lolela lae? Bonolu atafowa lolo eci baisilo.

⁴⁰ Ko baoloseka kye, lolo aoloza iyʼauma, ko aokolʼise la nyango, ko lʼiyʼaki lʼende, ko aolotswa mpe eka bonolu.

⁴¹ Ko aokita likata jʼonolu, aolokela, Talita, kumi – lile wete, Bonolu owʼomoto, nkokela emalaka.

⁴² Ko nkakoyoko aolemala, ko aokenda, ekiʼnde la mbula jom lʼife. Nkako baokamwa lʼokamwa mongo.

⁴³ Ko aolaaka joi o mbaaka wete bontʼomoko ateake joi line. Ko aolasangela wae bokayʼende toma ta ndala.