Malako 4 - BONKANDA WA NZAKOMBA

Esonganya ea bosanzeli owa biofo

¹ Ko aanga lolaka lenkina ndʼeselo ea lieke. Ko etukuluku ea nene mongo eotakanʼelʼende, ko la ncinʼeko aokondelʼa wato, ko aokitase eko nda lieke. Ko etukuluku euma eki ndʼeselo ea lieke ndʼokili.

² Ko aolalaka baoyiʼauke la bisonganya, ko aolakela nda lilako likae:

³ Lokoza! Bala bosanzeli owa biofo aocwʼosanzela biofo o nsanzela.

⁴ Ko asanzelʼende, biofemo beokwa nda mboka, ko tofulu toya okoma beko.

⁵ Ko bemo beokwa nda bikenje, eki beko ntabeata bamoci bauke, ko beomela lʼikao eki beko ntabeata bamoci ba njindo,

⁶ ko aki jefʼokya, beonyitana ko eki beko ntabeki la biiji, beonyeela;

⁷ ko bemo beokwa ndʼaeke, ko baeke baomela, baomʼeko la nkaka, ko ntabecwʼengenge.

⁸ Ko bemo beokwa ndʼamoci ba lobwo, ko beocwʼengenge, wete beomela, beofula ko beocwa, bemo ntuku isatʼisato, bemo ntukʼotoaʼotoa, ko bemo bonkamʼonkama.

⁹ Ko aokela, Ole lʼatoi ba njooka, kelʼende okoza.

Yesu acingola ncina elakʼende la bisonganya

¹⁰ Ko akiʼnde oyale nkʼomongo, iyʼaki lʼende ko la ba-jom lʼafe baolouola ncina ea bisonganya.

¹¹ Ko aolakela, Wisisa wa likulaka ja Nzakomba bokaemʼelʼinyo; lolo elʼiyʼale ndanza baoyiʼauma bale nda bisonganya,

¹² ndʼewela wae, Alendʼiyo ndalenda, bafaena, Ko andokʼiyo njooka, bafaokotola, Nyango bafokengwana ko bafotungwa limʼobe.

Ncingo ea bosanzeli owa biofo

¹³ Ko aolakela, Inyo lofokotole esonganyʼene? Na, mpanga lokotole bisonganya biuma ngamo?

¹⁴ Bosanzeli asanzela Joi;

¹⁵ ko bane wetʼako bale nda mboka eki Joi osanzelama, ko andokʼiyo, nkako Satana aoya, ko afonolʼiyo Joi lisanzelamʼekʼiyo.

¹⁶ Nkʼelengʼeko, bane wete basanzelama nda bikenje: andokʼiyo Joi, bayamba liko nkakoyoko lʼesaza,

¹⁷ lolo iyo mongo bafa la wiji, ko bafoteme, lolo endiela bielo la benyoko ndʼeloko ea Joi, bakunumwela nkako.

¹⁸ Ko bamʼankina bale bako basanzelama ndʼetei ea baeke. Iyʼale bako bandoka Joi,

¹⁹ lolo bekakaano biʼokili la bokakatano wa liaci, lʼemengo lʼaoyiʼankina bayotswa, ko bafita Joi la nkaka, ko liko lifocwʼamuka.

²⁰ Ko bako basanzelama ndʼamoci ba lobwo wetʼiyʼandoka Joi, bayamba liko, ko bacwʼamukaone ntuku isatʼisato, omo ntukuʼotoaʼotoa, ko omo bonkamʼonkama.

Balako ba itswa

²¹ Ko aolakela, La bontʼayelʼitswa wae ilʼiko ndʼase bʼefole nkina ndʼase ba ntange? Afa wae ilʼiko ndʼafyelo eʼitswa?

²² Nko joi lindisi lifaiswʼolo, ko nko joi ja wisisa lifaenyʼolo.

²³ Bontʼole lʼatoi ba njooka, kelʼende okoza.

²⁴ Ko aolakela, Loalaka baoyiʼandokʼinyo. Jeza lindezʼinyo lifezamʼelʼinyo, ko bi-fokokezʼinyo limo ele liko.

²⁵ Ele toma tomo tifokaema elʼendʼoata; lolo elʼosʼofoate, la tokiʼnde oata tifokolama limʼelʼende.

Esonganya ea biofo beyomele

²⁶ Ko aolakela, Likulaka ja Nzakomba lile ngole bonto osanzela biofo ndʼamoci.

²⁷ Ko ayetame ko aetswa lʼotso la mbile, ko biofo beyomele, ko beyofule – ende afea elenge ekela biofo ngoko.

²⁸ Bokili bocwʼamuka boko mongo: joso lokasa, nkako efunza, nkako loso lotunda ndʼefunza.

²⁹ Lolo ae biofo otunda, asokoza bongwango ele emukelo eoliela.

Esonganya ea wofo wa sinapi

³⁰ Ko aokela, Tifosonganya likulaka ja Nzakomba ngamo? Ko esonganya e isʼosonganya liko na?

³¹ Lile ngole wofo wa sinapi, bolekola biofo beuma bele ndʼokili lʼisisi andonama boko;

³² lolo ae boko onama, bomela, ko bolekola njunda iuma lʼonene, bokela bitafe biʼonene, ko tofulu tʼaliko totonga baumbu nda ncici eʼeko.

³³ Ko aolalaka Joi la bisonganya biuke biʼelenge nga biko, ngokiʼyʼokuseyaka joka.

³⁴ Ko ntatefela lʼiyo imola nko lʼesonganya; lolo ele bakimiʼakande aocingola baoyiʼauma.

Yesu asasa bompompo

³⁵ Mbilʼeko, aki bokolo okita, aolakela, Tofende wijʼoi.

³⁶ Baocikʼetukuluku, ko baolotomba ngokiʼnde nda wato. Ko biato bemo beki lʼende.

³⁷ Ko bompompo wʼonene bokumba, ko mpombe yokondela nda wato, ko wato boanga loyola.

³⁸ Ko ende aki nda mbelo ea wato, akeci ndʼekomba ko baoloetola, baolokela, Bolaki, afa la joi ele we wae tofitana?

³⁹ Ko aoetswa, aosasa bompompo ko aokela lieke, Wai, yala ko. Ko bompompo bolambya, ko basi bayalaki wai mongo.

⁴⁰ Ko aolakela, Lole lʼofolu ngone lae? Lofa lʼimeezo ngamo?

⁴¹ Ko baolokʼooma mongo, ko baotefelana, Bontʼone ale na? Ele lʼompompo ko la lieke bolokoza la njimeza!