Malako 3 - BONKANDA WA NZAKOMBA

Yesu aikya bontʼoki la likata linyeelaki

¹ Ko aolotswa lenkina nda sunangonga; ko bonto aki eko oki la likata linyeelaki.

² Ko baoteemeza Yesu, nkina ifoloikya nda mbile ea Sabata, boakʼende likambo.

³ Ko aokelʼonto oki la likata linyeelaki, Emala ane nda joso.

⁴ Ko aolakela, Joi lindeji la Sabata na? – nkakela eʼolotsi nkina nkakelʼeʼobe? mbaikya nkina mbaoma? Lolo iyo baoyala o wai.

⁵ Aolalongoza la nkele, ekiʼndʼokaka lokeseli lʼocilingano wʼetemʼekiyo. Nkako aokela bontʼoko, Sembya likata like. Aolisembya, ko likata joika o ci mongo.

⁶ Bafalusi baolola, ko nkakoyoko baolanga wango, iyo la Ba-Elode, ndʼelengʼekusʼiyo oomʼende.

Bantʼauke baikyama la Yesu

⁷ Yesu lʼakimiʼakae baokenda nda lieke. Ko etukuluku mongo eolokima lima Ngalilaya, ko lima Yudea la Yelusalema,

⁸ ko lima Edome la wijʼa Yoladane, ko lima Tula la Sidona. Ko akiʼyʼokaka belemo bekambʼende baoyʼelʼende.

⁹ Ko aosangela bakimi bakae wae boeleza wato wʼisisi la ncinʼea etukuluku, nyango bafokamʼelʼende,

¹⁰ ekiʼndʼoikyaka bauke, ko ndʼewelʼeko bantʼaki la nkangi baokamʼelʼende kela bofomwa.

¹¹ O la belimo bia linyamo, akiʼyʼoenaka, baokwa nda joso likae, ko baobeleza wete, We ole Bonʼowa Nzakomba.

¹² Ko aolaaka o mbaaka mongo wete bafoeanya.

Yesu aosona bikima join la bife

¹³ Nkako ayounda nda ngongo, ko aoleta iyʼakiʼndʼolangaka, ko iyo baocwʼelʼende.

¹⁴ Ko aosona jom lʼafe wete bayale lʼende, kela atomʼiyo wete bongoza nsango,

¹⁵ ko baate lotomo wae boza bademona.

¹⁶ Ko aobuza jom lʼafe, ko aolila Simona lina Petelo,

¹⁷ ko la Yakobo, bonʼowa Zebedayo, la Yoane okosangi la Yakobo ise – aolilʼiyo nkombo Boanelenge, wete Bana ba Likungola –

¹⁸ ko Andelo la Filipo, la Balutolomayo, la Matayo, ko la Toma la Yakobo, bonʼowʼAlafayo, la Tadayo, la Simona bosi Kanana,

¹⁹ ko la Yudasa bosi Keliota, osʼondoangelaki.

Mbuto ea Yesu elʼiyo bandosaola

²⁰ Nkako aolotswa ndʼilombe. Ko etukuluku eotakana lenkina la nkaka, ndʼelenge wete ntabaata elelo ea toma.

²¹ Aki bakosangi lʼende okaka, bacwaki okandʼende, eki bantʼokelaka, Aosongwa.

²² Ko bakoci bʼenkanda baki lima Yelusalema baokela, Ale la Balazebuba, ko ozaka bademona la mpamba ea bokulaka owa bademona.

²³ Ko aolaetʼelʼende ko aolakela nda bisonganya: Satana akusa joza Satana ngamo?

²⁴ Ko ayaka likulaka jokafwana ele liko mongo, likulaka liko lifokuseya jemala nye.

²⁵ Ko wenaka ilombe ikafwana lʼiko mongo, ilombʼiko ifokuseya jemala.

²⁶ Ngoso nga Satana aoyakangwʼomongo ko aokafwana, afokuseya jemala, loloayosukela o nsukela.

²⁷ Lolo nkʼonto okusa jotswa ndʼilombe yʼontʼowa bolo wae afunza toma tokae elaka nko ayotungya bontʼoko joso, mpangʼafunza ilombe ikae.

²⁸ Nsosolo nsangelʼinyo, bana bʼanto bifotungwa lima baoyiʼakiyo bauma, lʼaoyiʼobe la tosaola toʼiyʼosaola;

²⁹ lolo osʼosaola Bolimo wʼoeko isaola afaoata etungwelo seko nye, lolo ale lʼekwa ea seko.

³⁰ Ekʼiyʼokelaka, Ale lʼolimo wa linyamo.

Booto wʼaeyoko nda likulaka ja Nzakomba

³¹ Ko nyango ekae lʼakuneʼakae baoya, baolemala ndʼanza, ko baotomelʼende, baoloeta.

³² Etukuluku ekokisi, eoloenga, ko baolosangela, Bala nyangʼeke lʼakuneʼake bale ndʼanza, bakasa.

³³ Ko aolamba, aolakela, Ole nyango ekami lʼakuneʼakami na?

³⁴ Ayokenzʼaiso ele banto bakokitase ndongama lʼende, ko aokela, Bala nyango ekami lʼakuneʼakami!

³⁵ Bontʼokela wango wa Nzakomba, endʼale bokune okami la nkana ekami ko la nyango ekami.