Malako 2 - BONKANDA WA NZAKOMBA

Eikyelo eʼonto oki la nkangi ea nkataana

¹ Ko ndʼafeka bʼembilʼemo aoluta nda Kapalanauma, ko joi jolokana wae aki ndʼilombe.

² Ko bantʼauke baolotakanela elaka nko efosa ntekociki, o la nda joso ja wiso nye. Ko aolalaka lilako.

³ Ko baoloyela bonto oki la nkangi ea nkataana, otombamaki lʼantʼanei.

⁴ Akiʼyo natabakusʼokitsʼende ele Yesu la ncina ea nkaka eʼanto, baoteola nsamba ekolongi lʼende, ko akiʼyʼolifolaka mboka, baokiteza ntange eki bontʼowa nkangi ea nkataana okeci.

⁵ Aki Yesu ene imeezo ekiyo aokela owa nkangi ea nkataana, Bona, otungwa lima baoyiʼake bʼobe.

⁶ Ko bakoci bamo bʼenkanda bakokisi eko, ko baokakaza ndʼetema,

⁷ Bontʼone atefela ngoso ngamo? Asaola Nzakomba. Otungola limʼaoyiʼobe na, imola nkʼomoko, wae Nzakomba?

⁸ Nkako Yesu aokotola ndʼotema bokae wae bayokakaza ngone ndʼetema bekiyo, ko aolakela, Lokakaza baoyi bane ndʼetema bekinyo lae?

⁹ Oleki bolemo na, wae nkele owa nkataana, Otungwa limʼaoyiʼobe bake, nkina nkele, Emala, ambola ntange eke ko kendaka?

¹⁰ Lolo ndʼewela wae lea wete Bonʼowʼonto ale la mpamba otungolʼanto limʼaoyiʼobe ndʼokili – aokela owa nkangi ea nkataana –

¹¹ Nkokela we, emala, ambola ntange eke, ko kendaka ndʼilombe ike.

¹² Ko aolemala nkako, aolambola ntange ekae, ko aolola nda joso likiyʼauma: la ngoso iyʼauma baokamwa kamo, ko baokumya Nzakomba, baokela, Kilo, tene ngone!

Yesu aoleta Lewi

¹³ Ko aokenda lenkina ndʼeselo ea lieke; ko etukuluku euma eoyʼelʼende, ko aolalaka.

¹⁴ Ko alekʼende aolena Lewi, bonʼowʼAlafayo, akokisi ndʼefutelo ea mpuci, ko aolokela, Onkime. Ko aolemala, aolokima.

¹⁵ Akiʼnde nda mesa ndʼilombe ikae, batakanyi ba mpuci la bantʼobe bakokisi la Yesu lʼakimiʼakae bolongo, ekiʼyo bauke, ko baolokima.

¹⁶ Ko aki bakoci bʼenkanda bʼafalusi enaka wae ende ala toma la bantʼobe la batakanyi ba mpuci, baokela bakimiʼakae, Ende ala toma la batakanyi ba mpuci lʼantʼobe lae?

¹⁷ Aki Yesu okaka, aolakela, Bantʼakema bolo ntabelaka nkanga eʼete wela, lolo iyʼandoka nkangi. Nciyaki jeta ba liongi lolo bantʼobe.

Joi ja nkakila ea toma

¹⁸ Bakimi ba Yoane la Bafalusi baokila toma. Iyo baoyʼelʼende, baolokela, Bakimi ba Yoane la bakimi bʼafalusibakila toma, lolo bakimi bake bafokile lae?

¹⁹ Ko Yesu aolakela, Kamba balongo ba wengi owa waji bakusʼokila toma ayala wengi lʼiyo? Ekeke eyala wengi lʼiyo bafokileya toma.

²⁰ Lolo bembile bifoya bekolama wengi limʼelʼiyo, mpa bakile toma nda mbilʼeko.

²¹ Nkʼonto oaka ebolo eʼeto etasusana ndʼonkoto wa kalakala, nyango ebolo eʼaeyoko efokanjola bonkoto wa kalakala, ko lilusu lifofula.

²² Ko ntabilaka balako bʼaeyoko nda bikoto bia kalakala. Banyangʼokela ngoko, balako bifata bikoto, ko balako bifofitana ko la bikoto o ngoko. Balako bʼaeyoko bilamaka nda bikoto biʼaeyoko.

Yesu lʼafalusi ndʼewelʼea Sabata

²³ Nda Sabata emo aotuana basala ba blé; ko alekʼiyo bakimi bakae baangakʼomuka bifunza bia blé.

²⁴ Ko Bafalusi baolokela, Bala, bakela joi lifeji la mbile ea Sabata lae?

²⁵ Ko aolokelʼiyo, Lotafoanda nde, joi liki Dawidi okelaka, akiʼnde la wela, ko okaki nzala, ko lʼiyʼaki lʼende o rigoko?

²⁶ Elengʼekiʼndʼotswaka ndʼilombe ya Nzakomba, ekekʼeki Abiatala nkanga ea joso mongo, ko aleki mampa yʼoeko, itakeji wae banto bale imola nko nkanga kika, ko aokayʼiyʼaki lʼende o ngoko?

²⁷ Ko aolakela, Sabata ele ndʼeloko eʼonto, afʼonto ndʼeloko ea Sabata.

²⁸ Ndʼewelʼeko, Bonʼowʼonto ale Nkolo o lʼea Sabata.