Malako 16 - BONKANDA WA NZAKOMBA

Eetswelo ea Yesu

¹ Aki Sabata olekanaka, Malia Mangandala, la Malia, nyango ea Yakobo, la Salome, baosomba balasi ba mpimbo, wae bayʼoisʼende.

² Ko la nkesa mongo nda mbile ea joso eʼeyenga, baoya ndʼekundelo o ndʼekyelo ea jefa.

³ Ko baotefelana elʼiyo mongo, Bontʼotokalimoza ekenje lima wiso wʼekundelo na?

⁴ Baosangyʼaiso, ko baolena wete ekenje eosilʼokalimwa. Eko eki bonene mongo.

⁵ Ko andotswʼiyo ndʼekundelo, baolena bosekota akitase nda lo jʼelome. Alotsama lʼonkoto wʼotale wa fe; ko baolokʼooma mongo.

⁶ Ko ende aolatefeelʼiyo, wete. Talokakʼooma. Lolasa Yesu owa Nazaleta ende oomamaki ndʼekulusu. Aokunjwa, Afʼane. Bala itenela ikiʼyʼoambyaka.

⁷ Lolonde lokenda, losangele bakimiʼakae ko la Petelo wete aocwa nda joso likinyo nda Ngalilaya, lifʼoenende nkʼeko, nkʼelengʼekʼindʼosangelakʼinyo.

⁸ Iyo baolola ko baolota limʼekundelo ele lolengi lʼekamwelo baolakwela. Ko ntabatefela joi lʼontʼomo nye, ekʼiyʼokakʼofoju. [

Yesu aolenya ele Malia Mangandala

⁹ Akʼndʼokunjwaka la nkesa nda mbile ea joso eʼeyenga, aolenya joso mongo ele Malia Mangandala, okʼindʼozaka bademona nsambo.

¹⁰ Ende aocwʼosangela baso baki lʼende, nkʼakeselʼiyo la lokeseli ko alelʼiyo lilelo;

¹¹ lolo akiʼyʼokaka wete aika, ko enyakʼelʼende, baolikyʼekoji.

Yesu aolenyʼele bakimi bafe

¹² Ndʼafeka bʼaoyiʼako, aolenya ele bamʼakiyʼafe ndʼekozʼemo, akiʼyʼokendaka ndʼokili wʼesanga.

¹³ Ko iyo baocwʼangela bankina, lolo bako ntabaimezʼiyo.

Yesu aolenya ele bakimi

¹⁴ Lʼafeka aolenya ele ba-jom lʼomoko akiʼyʼokokitasʼa mesa, ko aolafela la bosambʼokiyo wʼimeezo lʼocilingano wʼetema, ekiʼyo ntabimeza bako bandoenaki ndʼafeka bʼekunjwelo ekande limʼiwa.

¹⁵ Ko aolasangela, Lokenda ndʼokili bouma, ko longoza nsango eʼolotsi elʼemelo euma.

¹⁶ Ondimeza, ko ondinama, ifoikyama, lolo ofimeza ifumbama likambo.

¹⁷ Ntazʼine ifokimana lʼako bandimeza, wete nda lina likami bifoza bademona, bifotefela mposo inkina yʼaeyoko,

¹⁸ bifambola njwa, ko nga bamela yomba iwʼanto, bafaokʼeefe, ko andafyʼiyo bakata ele bandoka nkangi, bantʼako bifoika.

Yesu aoluta nda loola

¹⁹ Aki Nkolo Yesu osizʼotefela lʼiyo, aokolama nda loola, ko ayokitase nda lo jʼelome ja Nzakomba.

²⁰ Lolo iyo baokenda, ko baolongoza bosako nda biiji beuma. Nkolo aokamba lʼiyo, ko aokemya Joi la bolo, o la ntaza indenyaki lʼiyo.]