Luka 4 - BONKANDA WA NZAKOMBA

Yesu aomekama la Satana ndʼetekeleke

¹ Lolo Yesu aoluta lima Yoladane, ayokame la Bolimo wʼoeko. Ko aotombama la Bolimo ndʼetekeleke,

² bembile ntuku inei, ko ayomekama la Satana. Ende ntala yomba ndʼembilʼeko; ko aki beko osilaka aoloka nzala.

³ Nkanko Satana aolotefeela, Ayaka wole Bonʼowa Nzakomba, sangela ekenjʼene wae efaningwa mampa.

⁴ Ko Yesu aoloamba, Joi jokotama wete, Bonto ntaikaka la mampa kika.

⁵ Nkako Satana aolotomba ndʼaliko, ko aoloeneya bakulaka ba bise biuma nkakoyoko.

⁶ Ko Satana aolokela, Njifokokaya we mpifo ene euma, ko la jilangi jʼeko; elʼeko eosilʼolekyama elʼemi, ko nkayʼeko elʼonto oʼemʼolanga.

⁷ Ayaka onkusamelʼemi, mpifo eko euma ifoyalema ekawe.

⁸ Yesu aoloamba, aolokela, Joi jokotama, Memya Nkolo Nzakomba ekawe, Ko saela nkʼende kika.

⁹ Nkako aolotomba nda Yelusalema, ko aoloemya nda nsamba ea Tempelo, ko aolokela, Ayaka wole Bonʼowa Nzakomba kela oyause ndʼase,

¹⁰ ele joi jokotama, Ifotoma bikima bikae lotomo la ncinʼeke, wae bakofonge,

¹¹ Ko bifokotomba ndʼakatʼakiyo, Nyango likaka like lifoimanʼekenje.

¹² Ko Yesu aoloamba wete, Joi jokotama, Ofaomeka Yawe Nzakomba eke.

¹³ Aki Satana osizaka mmeko iuma, aolimana limʼelʼende elingi fele.

Yesu aanga lokambʼolemo nda Nazaleta

¹⁴ Ko Yesu aoluta nda Ngalilaya, ayokeme la mpamba ea Bolimo. Ko bonkindo bokande bolongwana ndʼokili bouma bokotutsi.

¹⁵ Ko aolaka nda basunangongaʼakiyo, ko aokumyama lʼantʼauma.

Yesu aotonama nda Nazaleta

¹⁶ Ko aoya nda Nazaleta ekiʼndʼoongwamaka. Ko nda Sabata aolotswa ngokiʼnde nda sunangonga, ko aolemala oandʼonkanda.

¹⁷ Ko baolokitsa bonkanda wa boteli Yesaya. Ko aumbolʼonkanda, ko aotana itenela ikotama joi line;

¹⁸ Bolimo wa Nkolo bolʼelʼemi, Ekiʼndʼombisaka wae nsange nsango eʼolotsi ele beola, Aontoma wae njongoza etungwelo ele njanga, Ko enelo ele baweiʼaiso, Lʼetungwelo ele banyokwa lʼenyoko;

¹⁹ Wae ndongoza mbula ea Nkolo ea boya.

²⁰ Nkako aoumbʼonkanda, aoluteya boko ele bokambyi, ko aokitase. Ko baiso bʼantʼauma baki nda sunangonga baololenda tee.

²¹ Nkako aangaki lotefela wete. Mbilʼene ekotelo ene eoliela ndʼatoi bakinyo.

²² Ko bantʼauma baolookoza njokoza, ko baokamwa lʼaoyi bʼoya bandolaki limʼomwʼokae, ko baokela, Onʼafa bonʼowa Yosefa?

²³ Ko ende aolakela, Njea nsosolo wete lifoncwela bokolʼone, Nkanga eʼete, bikyaka jonge like mongo. Wete baoyi bandokʼiso wae baokelama nda Kapalanauma, kela ngoko ane ndʼola boke mongo,

²⁴ Ko ende aokela, Nsosolo nsangelʼinyo, boteli afosimama ndʼolaʼokae.

²⁵ Lolo la nsosolo nsangelʼinyo wae, bituka bauke baki nda Yisalaele ndʼembile beki Eliya, eki loola okombamaka mbulʼisato la nsanza botoa, ko eki eto ea nzala mongo okwelakʼokiliʼoko bouma;

²⁶ lolo Eliya ntatomama elʼomʼokiyo nye, imola nko nda Salepata ea Sidona, ele bomoto owʼetuka.

²⁷ Ko banto bʼaeka bauke baki nda Yisalaele ndʼekekʼeki boteli Elisa, lolo nkʼomʼokiyo ofetswaki, imola nko Naamana, bosi Sulia.

²⁸ Akiʼyʼokaka baoyiʼane, iyʼauma baki nda sunangonga baokama la nkele,

²⁹ baolemala, ko baolooza lima bonanga, baolotomba ndʼompempe wa ngongo eki bonangaʼokiyo okotongi wae bouse besunangongo.

³⁰ Lolo ende aoleka ndʼetei ekiyo, ko aokenda.

Yesu aikya owa demona

³¹ Ko aokitela nda Kapalanauma, bonanga wa Ngalilaya. Ko aolalaka nda mbile ea Sabata.

³² Ko baokamwa la lilako likae, eki joi likae liki ngolʼomongo joi.

³³ Ko bontʼomo aki nda sunangonga oki la bolimo wa demona wa linyamo; ende aobeleza la lofoso ja bolo,

³⁴ Eloo! Joi lile ndatsʼiso la we na, Yesu owa Nazaleta? Nkea we, ole owʼoeko owa Nzakomba!

³⁵ Lolo Yesu aolosasa, aolokela, Yala o wai, ko ola limʼelʼende. Aki demona ounzaka ndʼase ndʼetei ekiyo, aolola limʼelʼende, ntokeelʼende bobe bomo.

³⁶ Ko bokamwa bokwelʼiyʼauma, ko baotefelana wete, Etefelo ene ele ngamo? Ndʼewela wae la mpifo la mpamba ende ayotome o la belimo bia linyamo, ko beko bolaka o njoola.

³⁷ Ko lokumo lokae lokumyama ndʼokili bouma bokotutsi.

Yesu aikya bokilo owa Petelo ko lʼantʼamo

³⁸ Aolimana lima sunangonga, ko aolotswa ndʼilombe ya Simona. Ko nyango ea waji owa Simona akeci la nkangi ea angala ea bolo; ko baoloonda ndʼeloko ekae.

³⁹ Aolemala ndongama lʼende, aofela angala, ko eko eolimanʼelʼende nye. Nkako ende aolemala, ko aolakambya.

⁴⁰ Ecwa jefa oila, iyʼauma baki lʼanto bandokaki nkangi ya bilenge la bilenge baolayela elʼende, ko aolafyʼakata ele wengiʼonto okiyo ko aoloikya.

⁴¹ Bademona baolola limʼelʼantʼauke, bayobeleza, baokela. We ole Bonʼowa Nzakomba. Aolasasa, ko ntakayʼiyo elekelo wae batefele, ekiʼyʼeakʼende wae ale Masiya.

Yesu asanga nsango nda basunangonga

⁴² Lʼekyelo ea jefa aolola, ko aokenda ndʼitenela yʼetekeleke. Ko banyenga bʼanto baoloasa, ko baoya nkʼelʼende, ko basaki wae bosuke wete afimane limʼelʼiyo.

⁴³ Lolo aolakela, Aonga wae nsange nsango eʼolotsi ea likulaka ja Nzakomba ele benanga benkina ngoko, ekiʼmʼotomamaka la ncinʼeko.

⁴⁴ Ko ayosange nsango nda basunangonga ba Yudea.