Luka 3 - BONKANDA WA NZAKOMBA

Yoane-Wini la lilako likae

¹ Nda mbula ea jom lʼitano ea likulaka ja Tibelio Kaisala, aki Pontio Pilato gouverneur ea Yudea, ko Elode vice-gouverneur ea Ngalilaya, ko bokune okae Filipo, vice-gouverneur ea Itulaya la Tulakoniti, ko Lusania vice-gouverneur ea Abilene;

² ko aki Anasa la Kayafa nkanga ya joso mongo, joi ja Nzakomba joya ele Yoane, bonʼowa Zekalaya, ndʼetekeleke.

³ Ko ende aoya ndʼokili bouma wijʼa Yoladane, ayongoza inamelo ea mbututala ele etungwelo limʼaoyiʼobe;

⁴ elenge ekotama joi ndʼonkanda wa boteli Yesaya, Lofoso jʼonto obeleza ndʼetekeleke, Loongya mboka ea Nkolo, Locilaza mboka ikande ci.

⁵ Wengi bofoku wifosakezama, Ko wengi ngongo ea ntale la wengi ngongo ya tosisi bifokitezama. Ko bakumba bifosembwa ci mongo, Ko mboka ya kootoko kootoko yifoyalema lalee.

⁶ Ko bantʼauma bifena loiko ja Nzakomba.

⁷ Ko aotefeela bitukuluku biʼanto bayaki jinama lʼende, Inyo bana ba njwa, olakakʼinyo wete lolote nkele eyoya na?

⁸ Locwekʼamuka bandeji lʼeututaelo limʼobe, ko taloangakʼosanga ndʼetema bekinyo, Abalayama ale ise ekiso mo! elʼemi nsangelʼinyo, Nzakomba akuseya jemya bana ba Abalayama lima bikenje bine.

⁹ Nkʼaeyoko yanda yolambyema nda biiji biʼetamba. Ndʼewelʼeko wengi botamba botacwekʼamuka bʼolotsi wumbame ko wusame nda tsa.

¹⁰ Mpanga ba linyenga bouole, Mpangʼiso tokele na?

¹¹ Ende aolaamba, aokela, Ende ole la kasakʼife ambʼokafe lʼende ofoate; ko ole la toma ta ndala akele nkʼelengʼeko.

¹² Ko la batakanyi ba mpuci baoyʼoinama lʼende. Ko iyo baolokela, Bolaki, mpangʼiso tokele ngamo?

¹³ Ende aolasangela, Talokolake mpuci elekola eko endezamʼelʼinyo.

¹⁴ Ko la soldats baolouola, O lʼiso mpanga tokele na? Ko aolatefeela, Talofunzakʼanto, talokakatanyakʼanto, ko lokitezʼetema lʼofuto bofutamʼinyo.

¹⁵ Alendezʼanto la lolendezo, ko akakazʼiyo, ndʼetema bekiyo ndʼeloko ea Yoane wete nkinʼende ale Masiya mongo,

¹⁶ Yoane aolamba, aolakela iyʼauma, Emi njinʼinyo ndʼasi; lolo oyoya ndʼafeka bakami andekolʼemi la mpamba, mpeji lolembola bekulu bia bikoto bikae. Ende ifinʼinyo nda Bolimo wʼoeko ko la tsa.

¹⁷ Ifufa ile nda likata likae, ko ifofetola ilombe ifufʼende biofo mpetola mongo, ko ifotakanya biofo ndʼefongelo ekae, lolo ifotumba mposo nda tsa totafofyamaka.

¹⁸ La baoyiʼane, ko la bilenge binkina, aokamʼanto ko aolasangela nsango eʼolotsi.

¹⁹ Lolo vice-gouverneur Elode, oki Yoane ofelaka la ncina ea Elodia, waji owʼokune okae, ko la bebe beuma beki Elode okelaka,

²⁰ laolafya bobe bone bomo ndʼeko beuma, wete aokomba Yoane ndʼilombe ya njanga.

Inelo ea Yesu

²¹ Aki bantʼauma inamaka, Yesu, o lʼende, aolinama. Ko aondʼende, loola lokombwa.

²² Ko Bolimo wʼoeko aokitela elʼende ndʼekoza eʼembenga. Ko lolaka loyaki lima loola, lokela, We ole Bonʼokami olangema lʼeefe, ndokʼesaza la we.

Bonkokoolo wa Masiya

²³ Aki Yesu oangaka elakelo ekae, aki ngole mbula ntuku isato. Aki (nda lokai jʼanto) bonʼowa Yosefa, ko Yosefa aki bonʼowʼEli,

²⁴ oki bonʼowa Matata, oki bonʼowa Lewi, oki bonʼowa Meleki, oki bonʼowa Yanai, oki bonʼowa Yosefa,

²⁵ oki bonʼowa Matatia, oki bonʼowa Amosa, oki bonʼowa Nauma, oki bonʼowa Elesi, oki bonʼowa Naga,

²⁶ oki bonʼowa Mata, oki bonʼowa Matatia, oki bonʼowa Simi, oki bonʼowa Yoseke, oki bonʼowa Yoda,

²⁷ oki bonʼowa Yoana, oki bonʼowa Lesa, oki bonʼowa Zelubabela, oki bonʼowa Salatiele, oki bonʼowa Neli,

²⁸ Koki bonʼowa Meleki, oki bonʼowa Adi, oki bonʼowa Kosama, oki bonʼowa Elemadama oki bonʼowa Ele,

²⁹ oki bonʼowa Yose, oki bonʼowa Eliezala, oki bonʼowa Yolima, oki bonʼowa Matata, oki bonʼowa Lewi,

³⁰ loki bonʼowa Simona, oki bonʼowa Yuda, oki bonʼowa Yosefa, oki bonʼowa Yonama, oki bonʼowa Eliyakima,

³¹ oki bonʼowa Melea, oki bonʼowa Mena, oki bonʼowa Matata, oki bonʼowa Natana, oki bonʼowa Dawidi,

³² oki bonʼowa Yisai, oki bonʼowa Obede, oki bonʼowa Boaza, oki bonʼowa Salamona, oki bonʼowa Nasona,

³³ oki bonʼowa Aminadaba, oki bonʼowa Aluni, oki bonʼowa Eselone, oki bonʼowa Pelese, oki bonʼowa Yuda,

³⁴ oki bonʼowa Yakoba, oki bonʼowa Yisaka, oki bonʼowa Abalayama, oki bonʼowa Tela, oki bonʼowa Naola,

³⁵ oki bonʼowa Selunga, oki bonʼowa Lu, oki bonʼowa Pelenge, oki bonʼowa Ebele, oki bonʼowa Sela,

³⁶ oki bonʼowa Kainana, oki bonʼowa Alufakasada, oki bonʼowa Seme, oki bonʼowa Noa oki bonʼowa Lemeke,

³⁷ oki bonʼowa Metusela, oki bonʼowa Anoka, oki bonʼowa Yelede, oki bonʼowa Malalele, oki bonʼowa Kainana,

³⁸ oki bonʼowa Enosa, oki bonʼowa Sete, oki bonʼowa Adama, oki bonʼowa Nzakomba.