Luka 2 - BONKANDA WA NZAKOMBA

Eotswelo ea Yesu

¹ Ndʼembilʼeko bosise bosisama limʼele Kaisala Anguseto wae banto bʼokili bouma bakotama baina.

² Ekotelo ene ea joso ekotamaki ndʼekeke eki Kwilunu gouverneur ea Sulia.

³ Ko bantʼauma baocwʼokotamʼaina, wengiʼonto ndʼolʼokae mongo.

⁴ Ko la ngoko Yosefa aocwa lima Ngalilaya, lima bonanga wa Nazaleta, ko aoya nda Yudea ndʼonanga wa Dawidi, botangema Beteleme, ekiʼnde bontʼowʼilombe lʼilongo ya Dawidi;

⁵ kelʼakotame lina, ende la Malia, oki boandoʼokae, ko aotutama lootʼona.

⁶ Ko akiʼyʼeko, bembile beokoka wae ende aote;

⁷ ko aotaki jende, bonʼokae owa joso, ko aoloomba la bito, ko aoloambya nda sanduku ela bibwa toma; la ncinʼekiʼyo ntabaata etamelo ndʼilombe yʼafaya.

⁸ Ko ndʼese eko baesanyi ba mpate baki nda bisobe, bayesanya botonga lʼotso.

⁹ Ko ekima ea Nkolo aoyʼemala lʼiyo ko jilangi ja Nkolo jongesʼelʼiyo; ko baolokʼooma mongo.

¹⁰ Ko ekima aolatefeela, Talokake booma, elʼemi nsangelʼinyo nsango eʼolotsi eʼosalangano boleki, ko boko wifokita elʼantʼauma;

¹¹ la ncina wete Boikyi, ole Masiya Nkolo aotswʼelʼinyo mbifene, ndʼonanga wa Dawidi.

¹² Ko lotaza elʼinvo o lone, wete lifotana inkune aombama la bito biombʼiyo tonkune, ko etama nda sanduku ela bibwa toma.

¹³ Ko sasimo linyenga ja bikima bia loola baki eko lʼekima eko, baomemya Nzakomba, ko bayotefela,

¹⁴ Imemya ele Nzakomba nda totenela toleki ndʼaliko, Ko ndʼokili kuci elʼanto basimama lʼende.

¹⁵ Ko aki bikima okendaka limʼelʼiyo, ko baoluta nda loola, baesanyi baotefelana elʼiyo mongo, bakela, Tokende o nda Beteleme, ko tene joi line likelamʼeko, liki Nkolo oteanyakʼiso.

¹⁶ Ko baocwa o lomolomo, ko baotana Malia la Yosefa, ko lʼinkune eci nda sanduku.

¹⁷ Akiʼyʼenaka, baoleanya joi litefelamaki elʼiyo ndʼeloko ea bonʼone.

¹⁸ Ko bantʼauma bandokaki baokamwa lʼaoyi basangema elʼiyo la baesanyi.

¹⁹ Lolo Malia aofonga baoyiʼane bauma ko aokakazʼako ndʼotemʼokae.

²⁰ Ko baesanyi baoluta, baokongʼosima Nzakomba boya ndʼewelʼea baoyiʼauma bakiʼyʼokaka ko la bakiʼyʼenaka, o ngoki bako osangemaka elʼiyo.

Malia la Yosefa bayela Bona nda Tempelo

²¹ Ko aki bembile bekiyo bia mpetola okokaka, baolotena nsonge, ko lina likae jotangema Yesu, ngoki ende otangemaka lʼekima atafa jemi likae ofoswama nda likunju.

²² Ko aki bembilʼekiyo bia mpetola okokaka nkʼelengʼele Esekyelo ea Mose, baoloyela nda Yelusalema wae bolekyʼele Nkolo,

²³ elenge ekotama ndʼEsekyelo ea Nkolo, wete, Wengi jende ja nsomi ootswa lima likunju ja nyango, ifotangema owʼoeko ele Nkolo.

²⁴ Ko boyelaki wae balekya mbeka elenge esangema joi ndʼEsekyelo ea Nkolo; bimpompo bife, nkina bana bafe ba embenga.

Simeona asakela Yesu bokako

²⁵ Ko bontʼomo aki eko nda Yelusalema oki la line Simeona. Bontʼone aki owa liongi, lʼowa boondo, ayolendeza elombwelo ea Yisalaele: ko Bolimo wʼoeko boki elʼende.

²⁶ Ko Bolimo wʼoeko aoleanya elʼende wete afaenʼiwa atafʼende ena Masiya ea Nkolo.

²⁷ Ko nda lotomo ja Bolimo aoya nda Tempelo. Akiʼyʼaotaki Yesu oyelaka bona Yesu wae bakele ndʼeloko ekae elenge eʼEsekyelo,

²⁸ Simeona aolokola nda mbo ikae, ko aomemya Nzakomba, aokela

²⁹ Nkolo, aeyoko kela otungole bokwala oke wae akende la kuci, Nkʼelengʼele joi like.

³⁰ Ele baisoʼakami baolena loiko loke,

³¹ Loki we wezeka nda joso jʼelongi ea bantʼauma;

³² Fole efolaza Bafaya, Ko la jilangi jʼantoʼake Yisalaele.

³³ Ko ise la nyango ekae baokamwa kamo lʼaoyi batefelamaki la ncina ekae.

³⁴ Nkako Simeona aolasakela bokako wa swa, ko aokela Malia, nyangʼekae, Bala bonʼone ifieza ekwelo ko lʼemaelo ea bauke nda Yisalaele, Ko ifoyala nga lotaza londikyana banto bikoli.

³⁵ Ko we, ifaka ifotuwa bolimo boke mongo, Mpanga bekakaza bia betema beuke bienya.

Ana nda Tempelo la Yesu

³⁶ Ko boteli owʼomoto aki eko. Ana, bonʼowa Fanwele, owʼoloi wa Asela. Aki ekota mongo. Ayalaki lʼome mbula nsambo lima bonjemba bokae;

³⁷ nkako ngole oweiʼome, elaka nko aokita mbula ntuku mwambi lʼinei. Ende ntimana lima Tempelo, lolo ayomemya Nzakomba la nkakila ea toma ko lʼeondo lʼotso la mbile.

³⁸ Ende aoyʼeko o ndʼekekʼeko mongo, ko aokanga Nzakomba lokango ko aotefela la ncina ea bona oko ele bantʼauma balendezaki esikwelo ea Yisalaele.

Bolenge wa Yesu

³⁹ Ko akiʼyʼizaka baoyiʼauma, ndʼelengʼele Esekyelo ea Nkolo, baoluta nda Ngalilaya, ndʼonangʼokiyo Nazaleta.

⁴⁰ Ko bona aosekwa ko aokema bolo, ko aokama la wanya, ko boya wa Nzakomba boki lʼende.

Yesu nda Yelusalema la bioto bikae

⁴¹ Wengi mbula ise la nyango ekande baocwa Yelusalema ndʼelambo eʼEfendelo.

⁴² Akiʼndʼokitaka mbula jom lʼife, o ndʼelengʼekiyo, baocwa ndʼelambo.

⁴³ Aki bembile biʼelambo osilaka, ko baolutʼola, bona Yesu aocikala nda Yesusalema, lolo ise la nyango ntabea:

⁴⁴ lolo ekiʼyʼokanelaka wae aki ndʼolongʼokiyo, baokenda lokendo ja mbilʼemoko, nkako baoloasa ele bioto la balongo bakiyo.

⁴⁵ Ekiʼyo ntabotana, baoluta nda Yelusalema, bayoasʼende.

⁴⁶ Ndʼafeka ba bembilʼesato baolotana nda Tempelo, aokitase ndʼetei eʼalaki, okozʼiyo, ko auolʼiyo biuo.

⁴⁷ Ko iyʼauma bandokakʼende baokamwa la wanya bokae, ko la biambo bendambʼende.

⁴⁸ Ko akiʼyʼenakʼende baokamwa, ko nyango ekae aolokela. Bona otokeelaki ngone lae? Bala emi lʼise eke tokasa la lokeseli loleki.

⁴⁹ Ko ende aolatefeela, Lonjasaki lae? Kamba inyo ntalea wete aonga lʼemi wae njale ndʼilombe ya Fafa ekami nde?

⁵⁰ Lolo iyo ntabakotola joi liko likiʼndʼatefeelaka.

⁵¹ Ko aoluta lʼiyo nda Nazaleta. Ko aokongʼoafika. Ko nyango ekae aofonga baoyiʼane bauma ndʼotema bokae.

⁵² Ko Yesu aofula nda wanya la lisekwa ja jonge, ko nda losimo la Nzakomba lʼanto.