Rom khy ming'a luo Paul caa paphya 3 - Lautu New Testament

¹ Cacuokie Judah ming amaa suo viena ca khaapa hing maw? A cuo li kie vangdaw a tena muo ca khaapa hing tama a cuo?

² Amaa suo viena a phangphang tana a aw. A suokhana ta Khazing bie kha cake sa pata ama cuo.

³ A che kha zang a tla lipa ama cuo kie haw, tuokhaatama a cuo aa? Iema zangtluo amaa tla lina khata Khazing zangtluo atlana kha a para'a ma?

⁴ Cuo changchiy vyi. Cawsaa bangkhuo hing a hangpa ma cuo zaw ta, Khazing ca zangtluo a tla pari aa. Caapathepa ta, Na ripa bie ta aa dangpa na cuopa kha paluo sa'a te, na bie aca ripa thue yi ta na te aa,” a tapa haakhata a cuo aa.

⁵ Cuorasala kiema maa dang lina ta Khazing a dangna kha a sie vie ta a paluo sa kie, khaama ri riy a aw'a tli? Khazing ta duo malie a te tiyta a paa ma ta'a ma? (Saapa bie na i ri).

⁶ Cuo changchiy vyi. Cacuokie Khazing ta chuelyi hing tuokhaatama bie a ripa khu aa?

⁷ Cuorasala i hangthena hingta Khazing adangna kha paluo sa hryly te a ming rungnaana a cuo kieca, khaapanakawma kama ca a suepa haata bie ripa pa i cuo kalie riypa a aw?

⁸ Khaapanakawma, cawsaa chekha ta malie pachie yite, iema na a ri yi tapata ama rilepa bie haakhata, “Phana aa vaw riypata hmang pha lipa hrie'a ungpuv,” ma ta va ung? Aa phuvsa pata suephawpa ama cuo aa.

Pakha Hmuo A Dang Va Yi

⁹ Cacuokie tuokhaata? Kiema hing ma pha vie ung maw? Cuo changchiy vyi; ma ri ciepa haakhata Judah ming hne Krik ming hne suena cahranapa rawlie ta a awpa tana ma cuo.

¹⁰ Caapathepa ta, Aa dangpa pakha hmuo aw vayi, pakhata hmuo aw vayi;

¹¹ Pachangna a hnyipa pakha hmuo aw lipa yi ta, Khazing a huvpa pakha hmuo aw vayi.

¹² Ama bangkhuo ta sichie diy yite, hmuosa a phapa pakha hmuo aw vayi. Kawpacuona a hnyipa pakha hmuo aw lipa yi ta, pakhata hmuo aw vayi.

¹³ Ama rawkariy ca aa pahawpa thluokhue hne a lu te, ama palyi kha dungna ta ama hmuo. Ama palyi rawlie pariy ca-ie aw te,

¹⁴ Ama hmya ca biechiepa hne chiesana ta a bi.

¹⁵ Thiyse palang riypata ama phyi catli te,

¹⁶ rana hne cuopasana kha ama luopuv lie a bi.

¹⁷ Diena luopuv kha pachang lipa yi ta,

¹⁸ Ama ming lieta Khazing ciyzaana aw vyi,” a tapa haa khatana a cuo.

¹⁹ Ata hing ca phungbie ta tuokhaata a ri zaw ta, phungbie rawlie a awpa tie huota a ripa kha pachang pate, caca, cawsaa bangkhuo ca duo yi sala, chuelyi bangkhuo hing Khazing hmielie zangtluo aa tla riy'apa tana a cuo.

²⁰ Phungbie ta a ripa ama tuena thueta ahunghmuo Khazing hmiekunglie duopacupa aw vayi, tahematapakieca phungbie ca ama suena tlaku khana a paluo sa.

Zangna Thueta Adangna

²¹ Cuorasala ata hing ca phungbie thueta cuo li pata luopuv hrang taata Khazing adangna ca a luo te phungbie hne profet tie zaw ta amaa daakhyi.

²² Zingsuv zangna thueta hmungpa ca Khazing adangna cuote zangtuv bangkhuo cuota a cuo. Tahematapakieca pahlyipalena khaahmuo aw vyi,

²³ ma bangkhuo ta a suepa cuo pate Khazing rungnaana hneta maa hla diy.

²⁴ Cuorasala kiema ca Khrih Zingsuv'a taata a vawpa khuona taata, a vihnyina thueta a selawpa ta duopacupa ta ma cuo.

²⁵ Zingsuv Khrih ca Khazing ta a thiy ta a ngiethena satuv riypata a chipa cuote capa a ngiethena ca Zingsuv Khrih zangna thueta hmung riypatana a cuo. Khazing ta hingpa hmang a tuepa hing ama adangna kha paluo sa riypatana a cuo, tahematapakieca hluo ningta ama tuepa suena kha palung pasiysa pata a ngiethe yite,

²⁶ ata hing ca ama kha aa dangpa a cuona hne Zingsuv a zangtuv tie duopacu sa ama cuona kha paluo sa riypata a cuo.

²⁷ Cacuokieca, hruotle riypa khaama a aw? Khaahmuo aw vyi. Phungbie ma ziy nakawta a cuo ma? Cuo vyi. Zangna thue tana a cuo.

²⁸ Tahematapakieca cawsaapa hing phungbie ta a ripa re hrie nakawta cuo li pata zangna thueta duopacupa a cuopa kha ma ri tli.

²⁹ A cuo li kie Khazing ca Judah ming Khazing dyi ta ma a cuo? Jentail ming Khazing zaw ta cuo ra vama? A cuo, Jentail ming Khazing zaw ta a cuo ra.

³⁰ Khazing ca pakha ta a cuo nakawta; vangdaw a tepa tie kha zangna ta duopacu sa'a yite, vangdaw a te lipa tie zaw kha zangna ta duo a pacu sa'a yi.

³¹ Cacuokie zangna thueta phungbie ca ma thaw tana ta a cuo ma? Cuo changchiy vyi. Phungbie khana ma pa cu sa vie.