Rom khy ming'a luo Paul caa paphya 10 - Lautu New Testament

¹ Uvnu hne sieta zaw, i palung khingpa hne Khazing'a luo thlaa i chuopa ca iema hing khuo pata ama cuo riypa hingta a cuo.

² Tehte i khuo khupa ca, Khazing ca ama khingsa raalaa, cuorasala ama khingna zya ca a hmuo lipa khingna tana a cuo.

³ Tahematapakieca, Khazing'a taata a zuvpa adangna kha pachang li pata iema khingna luopuv kha huv yite Khazing adangna luo kha a pipase khing vayi.

⁴ Khrih ca phungbie a chuona ta cuote caca a zangpa bangkhuo ta adangna ama hmungna riypatana a cuo.

Khuona Ca Cawsaa Bangkhuo Cuota A Cuo

⁵ Moses ta phungbie taata a zuvpa adangna hne a patuv pata a capepa ca, “Hingpa hmang zaw hing a tuepa ca hingpa hmang hingta na khuona a hmung aa,” a ta.

⁶ Cuorasala Khazing'a taata a zuvpa adangna ta ca, “Ahungma vuoruo luo a kie aa tapata na palung chunglie kha a ta kha,” a ta (a ri khingna ca Khrih kha za cungkhyi riypata tanapa na a cuo).

⁷ A cuo li kie, “Ahungma a thiy khy luo a cung aa,” tapata zaw a ta kha ung (A ri khingna ca Khrih kha thiyna taata kya pyakhyi riypata tanapa na a cuo).

⁸ Cuorasala tuokhaatama ama ri? “Khazing bie ca naa thaa liena a aw, na hmya lie hne na pathiypalung chunglie na a aw,” tapata a cuo. (A ri khingpa ca kiema ta ma phupa Khazing zangna bie tanapa na a cuo).

⁹ Na pakaa ta Zingsuv ca Abyipa tana a cuo tapata phu cate, na pathiypalung chunglie Khazing na thiyna taata a pathu sa tapata na zang kieca khuo pata na cuo aa.

¹⁰ Tahematapakieca pathiypalung ta a zangpa ca duopacupa ta cuote, a pakaa ta a phupa ca khuo pata a cuo.

¹¹ Caapathepa ta, “Ama a zangpa bangkhuo ca nangzaana ang'a vyi,” a ta.

¹² Tahematapakieca Judah ming hne Krik ming a lala lieta pahlyipalena aw vyi; Abyipa pakha hing ma bangkhuo Byipa ta cuote a kupa bangkhuo cuota a pahyasa patana a cuo.

¹³ Tahematapakieca, “Abyipa ming a kupa bangkhuo ca khuo pata ama cuo aa,” a ta.

¹⁴ Cuorasala, ama zang li kieca tuokhaatama a ming ca ama padang the aa? Bie ca ama thyi buo li kie tuokhaatama ama zang the aa? Cakhutaa, bie ca phu pata a cuo li kieca tuokhaatama ama thyi the aa?

¹⁵ Lucuotuv tie kha pathliepa ama cuo li kie tuokhaatama bie ca phu pata a cuo the aa? Caapathepa ta, “Thuophaabie a phyatuv tie phyi ca khatluv tama a puvthe?” a ta.

¹⁶ Cuorasala ama bangkhuo ta thuophaabie ca cuhluo vayi; tahematapakieca Isaiah ta, “Abyipa ahungma ma thuophaabie phupa ca a zang,” a ta.

¹⁷ Cacuonakawta zangna ca thyina taata a vaw te, thyina ca Khrih bie thue tana a vaw.

¹⁸ Cuorasala ica hiehriy, bie ca thyi vayi ma? A thyi ca ama thyi thluo; tahematapakieca Caapathepa ta, Ama ueryi ca chuelyi bangkhuo ta a pathuo, ama bie ca chuelyi kiy te ta a pha.

¹⁹ Hiehriyna suokha i tue khing kalie, Israel ming ta pachang va yima? Moses ta palie taa te, “Niema kha mingphang tling a cuo lipa tie cunglie hietliena ica pahnyi sa'a yi; Niema ca a ngaapa mingphang tie'a lie kha nama hi ica pahaa sa'a yi,” a ta.

²⁰ Cakhutaa Isaiah ta riepha ciemuo pata, “Kama kha naa huv lipa tie ta ina hmung yi; Naa padang lipa tie kha i pahmung sa yi,” a ta.

²¹ Cuorasala, Israel kaw lieca, “Ri a ngie lipa tie hne bie i a hmuopa tie kha ningaw ta i buo pazuupa yi ang te i hluo yi,” a ta.