Marka 7 - Lautu New Testament

Mingnungmingpa Tie Phungluo

¹ Jerusalem taata a vawpa Farasi tie hne phungbie saya tie chekha ca Zingsuv'a luo kha a vya hmya yite,

² ziytuv tie kuv a siy li pata, ama kuv pyapa ta sa ama ningpa kha ama pachang.

³ (Farasi ming hne Judah ming palang ca mingnungmingpa phungluo kha ziy yite kuv a siy li pata sa a ning lipa ta ama cuo.

⁴ Chadaw taata ama calyipa bangkhuo zaw kha a phung haata pasiy taa li pata ning vayi. Cakhutaata phung hrangpa a hluvsa zaw kha ama ziy: a phung haata panuo pasiyna, bi pasiyna, hne thiyhring kitali pasiyna tapa zaw ta ama cuo.)

⁵ Cacuonakawta Farasi tie hne phungbiesaya tie ta Zingsuv kyihuo kha, “Khaapanakawma caa ziytuv tie ta mingnungmingpa phungluo haata aw lipa yi ta, kuv a siy li pata sa ama ning?” ama ta.

⁶ Zingsuv ta, “Isaiah ta niema phahruocuo tie kaw a za rilu pahing aa hmuosa. A capepa ca: Hingpa cawsaa zaw hingta ama pakaapa dyi ta ina pa-uvsathyi yi, cuorasala ama pathiypalung ca kama hne a hlasa.

⁷ Inaa biepa yi hing muo hnyi vyi, cawsaa tue chawpa phung khana Khazing tuepa phung haata ama pacuv.

⁸ Niema ca Khazing nawbie kha thaw ung cate cawsaa tuepa phungluo khana nama ziy,” a ta, a ta yi.

⁹ Pazue te, “Niema phungluo pacu sa riypata Khazing nawbie thaw zya ca nama the ciemuo.

¹⁰ Moses ta, ‘Na nung hne na paa va ciyzaa yi, a nung hne a paa sie a pipa ca a thiy hrahring aa,” a ta.

¹¹ Cuorasala niema ta nama nung hne nama paa kha, niema byana riypa i tapa hing Korban tana a cuo a ta pata a cuo kieca,

¹² a nung a paa bya li pata a law khu, nama ta. (Korban siyluo ca Khazing'a luo pipa tanata a cuo).

¹³ A changpachaa ung cate nama za ziylepa nama phungluo ta Khazing bie kha nama pavie nama pavuvle. Cakhutaata hmang a hluvsa hinghaahingta nama tue.

Cawsaa A Papyalyi Sapa

¹⁴ Cakhutaa Zingsuv ta cawsaa-zaapuv kha ku pakhaa yite, “Nama palang ta naathlie ungla pachang tie ung.

¹⁵ Ale taata cawsaa chung luo a ngiepa hmang khata cawsaa kha papyapalyi khu vyi, Cuorasala chung taata le luo a kya pyapa hmang tuv khana cawsaa kha a papyapalyi khu.

¹⁶ Thyina naa a hnyipa taca thyi mangsue,” a ta.

¹⁷ Cawsaazaapuv kha thuse yite ingchung luo a ngie taata a ziytuv tie ta a ripa pakhingpuonabie kaw kha ama hiehriy.

¹⁸ Zingsuv ta, “Niema zaw hepa ma thyi li pata a aw ra ungciy? Ale taata cawsaa chung luo a ngiepa ca cawsaa kha papyapalyi khu vyi tapa ca pachang va ung cama?.

¹⁹ A ngiepa ca cawsaa palung chung luo cuo li pata cawsaa riy chung luo kha a ngie te a pya pakhaa.” (Zingsuv ta sa bangkhuo ca a pathe a ta khingna a cuo).

²⁰ A ri pazuepa ca, “Cawsaa chung taata a kya pyapa taca cawsaa kha papyapalyi vyi.

²¹ Cawsaa chung, pathiypalung taata a kya pyapa ruena pha lipa khana cawsaa kha, aparuvsuena, paruvna, lienawna,

²² nungvaathingsuena, karuo-awna, zyatena, dungviena, mang a daw lipa tuena, hietliena, malie thuopachina, a palena, ngaana hne pingruena tapa pha lipa luo a chiy.

²³ Hing a pha lipa bangkhuo hing cawsaa chung taata kya pya te ama kha a papya a palyi.

Fonisia Canung Nung Zangna

²⁴ Capa hmang taacata pya te Zingsuv ca Tair pe luo kha a si. Ing kha luo kha a ngie te, capa lie a awpa kha ahunghmuo a pachang sa khing vayi. Cuorasala a nu khu vyi.

²⁵ A pyalyipa thlaapa ta a sacanungnung aa hryipa canung pakha ta Zingsuv kaw kha sungkha ta thyi te, a vaw te Zingsuv phyi thabaw lie kha aa vya bu.

²⁶ Canung nung ca Siria ruo Fonisia khy lie a puvpa Jentail zaanung ta a cuo. Ama ta Zingsuv kha a sacanung chung taata khuevuo papya riypa kha paa a kie.

²⁷ Cuorasala Zingsuv ta, “Haatiy zaw kha ama riy bi pata pi taa ungsiy. Haatiy sa kha la pata uv thawpa ca a phung cuo vyi, a ta.

²⁸ Cawsaanung cata, “Abyipa, cabya rawlie uv tahmuo haatiy zaw pathlapa sa diydya kha ama ning ra taw muo,” a ta.

²⁹ Cakhutaata Zingsuv ta, Cawsaanung kha, “Cakuo tie, khuevuo ta na sacanungnung kha a pya se tli,” a ta.

³⁰ Cacuonakawta, capa cawsaanung ca ing luo kha a diy te, haatiynung khuevuo ta pya se tli te, iehmang cunglie a zaa zie pakha a hmung.

Zingsuv Ta A Naaruepa Bie A Ri The Lipa A Patluo Sa

³¹ Cakhutaata Zingsuv ca Tair pe taakhata kaa te Sidon cahrawpaa pata Dekhapolis pe lie a awpa Galilee riyliy luo kha a si.

³² Cawsaa chekha ta a naa rue te bie a ri the lipa kha vya chiykhyi yite a cunglie a kuv khang riypata Zingsuv kha paa ama kie.

³³ Zingsuv ta cawsaa hraw taakhata ama selaw ta cakuo khyi te, a kuvdaw kha a naakary luo riy te, a paciy ta pacha te cawsaapapaa palyi ca a hrie.

³⁴ Cakhutaata Zingsuv ca vuoruo luo kha ang te, a huv kha pa-y te khuopuv ta a sung khu taata cawsaapa kha, “Effatha,” a ta, a siyluo ca, “a pahaw tie” tanata a cuo.

³⁵ Sungkha ta a naa pavuo te, a palyi ca a hya te a siesa pata bie a ri.

³⁶ Cakhutaata Zingsuv ta ahunghmuo chang li riypata a thlu yi, cadyiseca thlu hryly yi ri hryly yi ama ta.

³⁷ A ma kharue haa hringhruo te, “Hmang bangkhuo hing a pha pata a tue, a naa a ruepa khahmuo pathyi sa te, bie a ri khu lipa kha a pari sa khu,” ama ta.