Marka 16 - Lautu New Testament

Zingsuv Thupakhaana

¹ Sabbath ning a chuo khu taata, Mary Magdalin, Jeim nung Mary hne Salome ca Zingsuv riy thuv riypata ziyhmyi kha ama calyi.

² Ningzaa zaakha a ningkhanapa mawdiy ta thluo luo kha ama vaa.

³ Luopuv lieta pakha hne pakha kha, “Thluo khaakhuvlung kha ahungma malie a hnyipa aa?” amaa ta.

⁴ Ama mang ca thluo khaakhuvlung a lesapa ca a zaa hnyi tlipa kha ama hmung.

⁵ Thluo chung luo ama vaa ngie ca pangruopa a buvpa satlie pakha cacuo luo kuo ta aa tupa kha hmung yite amaa pahlusa.

⁶ Cuorasala ama ta, “Ciy kha ung, vieluo lie ama taapa Nazareth khypa Zingsuv na nama huv cuo vama? Ama ca lie hing aw va tli, a thupakhaa tli! Mang tie ung, ama chinapa hmang hing.

⁷ Cakuo ungla hing thuohlaa hing ziytuv tie hne Piter kha va chang tie ung; Ama ca, aca changlupa haa yi khata Galilee luo na a silu tli, capalie cana nama va hmung aa,” a ta yi.

⁸ Cacuonakaw pya yite thluo taakhata amaa ruo, ciysa yite ama nang dyi a uo nakawta ahung kha hmuota khaapahmuo chang vayi. [Iema'a luo ama changpa bangkhuo kha Piter hne a viesaa zaw kha a pachangta tah ama va chang. Cakhutaata Zingsuv ama hrahring khata a pathepa hne chuozaa hringna thuophaabie ca ziytuv tie hmuopa ta ningchiy taata ningtla te a pathyi sa.]

MARKA THUOPHAABIE CHUONA A PACHANG VIEPA MARKA THUOPHAABIE CHUONA A PASIY VIEPA Mary Magdalin'a Lie Zingsuv Aa Luo

⁹ (Zaakha lie a ningkhanapa ning mawdiy ta a thupakhaa khu taata Zingsuv ca khuevuo pasariy a papya napa nung, Mary Magdalin'a lie kha aa luo taa.

¹⁰ Mary Magdalin ca vaa te ama hne zaa aw hnepa tie kha ama ngiechisa pata ama caa nguoluo ning kha a va chang yi.

¹¹ Cuorasala Zingsuv ca a hringpa ta aw te i hmung ne a tapa kha iema ta zang vayi.

Ziytuv Pahning Tie'a Lie Aa Luo

¹² Cakhutaata Zingsuv ca ziytuv tie pahning khyta luo ama tlaw na lie kha a phang hrang ta aa luo.

¹³ Kaa yite a hrangpa tie kha ama chang, cuorasala zang vayi.

Zingsuv Ta Ziytuv Tie A Pathlie Yi

¹⁴ Cakhutaata Zingsuv ca ziytuv hlyihning tie cabya lie amaa tu nguoluopa khata a luo te; zangna ama hnyi li nakaw hne ama palung a le tuv nakawlie kha a mawchie yi.

¹⁵ Cakhutaata iema kha, “Chuelyicung yalya khata si ungla sapa bangkhuo kha thuophaabie va chang tie ung.

¹⁶ Zang te tiy a nawpa ahunghmuo khuopa a cuo aa, a zang lipa ca sue phaw pata a cuo aa.

¹⁷ A zangpa tie ca hingpa pamangsana hmang hing ama tue khu aa: i ming ta khuevuo ama papya aa, ryithaapa kha ama cyi aa;

¹⁸ ama kuv ta pariy kha patuv'a yite, thiysiy ama dang zaw ta tuokhaahmuo ta'a vayi; a pasapa cunglie ama kuv khang'a yite ama tluo aa,” a ta yi.

Zingsuv Vuoruo Luo A Kie

¹⁹ Abyi Zingsuv ca iema hne bie a ri khu taata vuoruo luo kha calang pata cuote Khazing cacuo luo khata aa tu.

²⁰ Ziytuv tie ca si yite ruo ting luo kha thuophaabie ama phu; Abyipa ca iema hneta re a hrie nakawta ama phupa thuophaabie kha pamangsana hmang ta a pacu sale.)