Marka 13 - Lautu New Testament

Zingsuv Ta Biena-ing Rana Kaw A Rilu

¹ Zingsuv ca Biena-ing taata a kya pya pata, ziytuv pakha ta, “Mang tie, Saya, Khatluv ta a lepa alung zaw'a nata ing ma a cuo!” a ta.

² Zingsuv ta, “Hing ing lepa puv hing nama hmung cuo ma? Alung suokhata hing hmuota suokha cunglie a pathang li pata a cing diy aa” a ta.

Ruvnaana Hne Hrisaathieruena

³ Zingsuv ca Biena-ing a riechuo Oliv tluocung lie aa tu nguoluo ningta kha Piter, Jeim, Johan hne Andru ta a paruvta tah bie ama hiehriy.

⁴ “Malie chang tie, hingpa hmang hing khatiy thuema a tlung aa? Hingpa hmang bangkhuo a vya tlingna riypata khaapa pamangsana hmang zaw ma a vya cuo aa? ama ta.

⁵ Zingsuv ta, “A raaring tie ung, ahunghmuo a padung sakha ung.

⁶ Cawsaa hluvpuv kha i ming ta a vaw'a yite, Kama hingna Ama ta a cuo ang, ta'a yite cawsaa hluvpuv kha ama dung aa.

⁷ Rie a tuvna zaw, rie a tuvna thuo zaw nama thyi tiyta nama thlaa zang kha se. Cahaapa hmang ca a tlung thluo aa, cuorasala a chuona cuo na a tlung tli tana cuo vyi.

⁸ Mingphang phangkha hne phangkha amaa du aa, ruokha hne ruokha amaa du aa, ruo ting ta aling a siy'a te, cakuo a tlung aa. Hing hmang bangkhuo hing nu a zi hruothuna haatana a cuo.

⁹ Niema zaw hrahring hing a raaring tie ung. Zung luo aca chiykhyi'a yite apungna-ing lie kha aca tuv'a yi. Kama kawlieta uvthyi tie hne siepahruo tie hmielie kha a daa'a ung cate iema'a lie kha tehte nama cuo aa.

¹⁰ Cakhutaata mingphang bangkhuo kha thuophaabie changpa ama cuo taa aa.

¹¹ Bie ripa riypata zung luo acaa chiy tiy yi ta tuokhaatama bie ima ri aa tapa kha nama palung rie thyi pacie kha se. Cuorasala capa cuo lieta aca pi thathiypa yi bie kha ri tie ung, tahematapakieca a ripa ca niema cuo va ungciy, Thlaapa Pathe tana a cuo.

¹² Uvta hne nuta kha thiyna phana te ta a lyi'a yite, a paa ta a saa, saata zaw ta nung hne paa kha thiyna phana te ta ama lyi aa.

¹³ Niema kha kama ming kawlieta cawsaa bangkhuo ta aca hue'a yi. Cuorasala a chuona te ta a ang khupa ca khuo pata ama cuo aa.

Ciy Aa Chiypa Duvsamakhiepa

¹⁴ “‘Ciy aa chiypa duvsamakhiepa’ a awna riypa a cuo lipa hmang lie a awpa kha na ma hmung tiyta, (Caa a rituv ta a ri khingnapa siyluo kha thyi the se) Judea ruo chunglie a awpa tie ca tluo luo kha a ruo yi se.

¹⁵ Ing cunglie a awpa ta chechiy suokha kha la riypata ing chung luo a ngie kha se.

¹⁶ Lu lie a awpa ta a buohryicungle la riypata ing luo kaa kha se.

¹⁷ Nu a phyapa canung hne haaseta a hnyipa canung cuota hing ningkhue hing khatluv tama ciy aa chiy aa!

¹⁸ Hingpa hmang hing thlasiy ningta a cuo li riypata thlaa chuo tie ung!

¹⁹ Hingpa ningkhue lie hing Khazing ta chuelyi a sa baataata ata ning te a tlung buo lipa hne a vya tlung buo li'apa ruvnaana a tlung aa.

²⁰ Abyipa ta hingpa ningkhue hing a pachang sa vie lipa kieca ahunghmuota a bang'a vayi. Cuorasala a tlawpa zaw cuo khata ca ningkhue ca a pachang sa vie.

²¹ Cawsaa pakhakha ta niema kha, ‘Mang tie, Messiah ca lie hing a aw hing!’ a cuo li kie, ‘Mang tie lie hue a aw hue,’ aca ta zaw yi ta zang lie ungciy.

²² Messiah pakhipa tie hne profetpakhipa tie vya pya'a yite Khazing a tlaw ciepa tie kha hmuo a cuo khu kie a hmuo lipa luopuv luo a chiy riypata kharuehaa hmang hne pamangsana zaw ama tue aa.

²³ A raaring tie ung. A cuo a vya chiy hluo ta zezaw bangkhuo kha ica chang pacie diy yi.

Cawsaa Saacapaa Aa Vawna Kaw

²⁴ Capa ruvnaana ningkhue khutaa cata, ning ca zing'a te, thlaapa ca khe'a va tli.

²⁵ Aasiy zaw avuo taata za tla'a yite, vuoruo lie cahrana ca aa cahang aa.

²⁶ Cakhutaata Cawsaa Saacapaa ca amyi cung taakhiyta cahrana'a nata lesyina hneta a vya luo aa.

²⁷ Chuelyi dena taata vuoruo dena, chuelyi kiy paliy taata a tlawpa tie zaw pahmya riypata a avuoming kha a pathlie'a yi.

Thyikuvkung Taata A Cuv Riypa

²⁸ Thyikuvkung taahingta a cuv riypa a la tie ung. A daw kya pakiy te a hnaa a kya thue tiyta cuovuo na a ngie tapa kha nama pachang.

²⁹ Cahaa cata hingpa hmang zaw a vya tlungpa kha nama hmung tiyta ama ca thlake te a vya chiy tli tapa kha nama pachang aa.

³⁰ Biehmisi tana ica chang yi: hinglie ta a awpa cawsaa zaw hing hingpa hmang a vya cuo nate ta thiy'a vayi.

³¹ Vuoruo hne alyi ca ama li aa, cuorasala i bie ca li changchiy'a vyi.

Ahungtahmuo A Ning Hne A Cuo Pachang Vayi

³² “Cuorasala capa ning hne cuo kaw ca ahungtahmuo pachang vayi, vuoruo lie a awpa avuoming, a cuo li kie Saacapaa zaw ta pachang vayi, Paa pakha kyalya dyina a pachang.

³³ Capa cuo ca khatiy tama a vaw aa tapa kha nama pachang li nakawta a raaring ungla singvaasa pata aw tie ung.

³⁴ Capa ca cawsaa pakha kha khy tlaw riypata ing taata a tha tiyta a sii zaw kha ama cyicuo ta rehrie riypa a pi siy khu taayita, chiypakaa a huopapaa zaw kha a phasa pata huo riypata, bie a cung siypapaa hne tana aa lu.

³⁵ Cacuonakawta a raaringsa pata aw tie ung tahematapakieca ing a hnyituvpapaa kha khatiy tama a vya chiy aa tapa pachang va ungciy, zuoluo a cuo li kie zuocang a cuo li kie aakhang ta, a cuo li kie mawdiy

³⁶ a cuo li kie namaa hmung chung tama tlangkhy aca vya chiyhnue'a yi.

³⁷ Ica changpa yi hing cawsaa bangkhuo zaw i chang ra yi, a raaring tie ung!”