Luka 23 - Lautu New Testament

Pilat Hmielie Zingsuv

¹ Ama phuv yalya khata a thu yite Zingsuv ca Pilat hmie luo ama chiykhyi.

² Ama kha pachie yite: “Hingpapaa hingta ma cawsaa zaw a cuo lipa luo aa chiypa yi kha ma hmungpuo; Siepahruopa'a luo ngukhyi pi'a va ungciy, malie ta te kama hingna ‘Messiah, siepahruo ta a cuo ang,’ a ta” ama ta.

³ Cakhutaata Pilat ta, “Judah ming siepahruo ta na cuo ma?” a ta. Zingsuv ta, “Na ripa haata i cuo,” tapata a palie.

⁴ Cakhutaa Pilat ta tluobyilepa tie hne cawsaazaapuv kha, “Hingpapaa hing a suena hmung va ang,” a ta yi.

⁵ Cuorasala khi vie hryly yite, “A pacuvnapa ta Judea pe bangkhuo hnaahnawnapa a chiykhyi. Galilee taata pathu te hingpa hmang te hing a vya chiy tli,” ama ta.

Herod Hmie Luo Zingsuv Ama Chiykhyi

⁶ Capa bie ca Pilat ta a thyi tiyta, “Hingpapaa hing Galilee ming ta a cuo ma?” tapata a hiehriy yi.

⁷ Pilat ta Zingsuv ca Herod ta a uvnapa ruo chung taata na a cuo tapa kha a pachang tiyta Zingsuv ca Herod'a luo kha a paphya: capa cuo ning ca Herod zaw kha Jerusalem lie a aw ningta a cuo.

⁸ Herod ca Zingsuv a hmung tiyta a palung a tluo hringhruo. Zingsuv kaw kha za thyi pari te a hmung khing napa a syisa tli, tahematapakieca a tuepa kharuehaa hmang hmung riypa kha a nguopuo.

⁹ Zingsuv kha bie a hluvsa a hiehriy, cuorasala Zingsuv ta kaakha hmuo palie vyi.

¹⁰ A thaa lie a tupa tluobyilepa tie hne Phungbie saya tie ta khuopuv ta ama pachie.

¹¹ Herod hne a rieka tie ta Zingsuv ca ese yite ama tue hyalya; pang rungnaapa kha pabuv yite Pilat'a luo kha ama paphya pakhaa.

¹² Capa ning liecata Herod hne Pilat ca viesaa pha ta amaa li; capa hluo ta ca cariepa tana ama za cuo.

Zingsuv Thie Riypata Bie Ama Chi

¹³ Cakhutaata Pilat ta tluobyilepa tie, uvthyi tie hne cawsaazaapuv kha ku yite,

¹⁴ “Niema ta hingpapaa hing cawsaazaapuv na a cuo lipa luo aa chiy yi tapata kama'a luo nama vya chiykhyi. Niema hmielie hrahring i hiehriypasie tiyta niema ta nama pachiepa suena suokha hmuo hmung va ang.

¹⁵ Herod zaw ta hmung ra vyi, cacuonakawta kiema'a luo malie a vya paphya pakhaa. Hingpa cawsaapapaa hingta thiy aa phuvpa hmang suokha hmuo tue vyi.

¹⁶ Cacuonakawta asung ta pachisa'a yi ang te i pathlie aa,” a ta.

¹⁷ (Lawsena pyi kyry ta Pilat ta thaw a tlapa pakha a pathliepa pari taw yi.)

¹⁸ Cawsaazaapuv ca khi yite, “Ama kha thie tie! Barabbas kha malie pathliepa tie!” ama ta.

¹⁹ (Barabbas ca khy chunglie a duna a papuv sa nakaw hne lie a naw nakawta thaw ama pathlapa tana a cuo.)

²⁰ Pilat ta Zingsuv kha a pathlie khing nakawta cawsaazaapuv'a lie kha bie a ri pakhaa.

²¹ Cuorasala khi pakhaa yite, “Vieluo lie thie tie! Vieluo lie thie tie!” ama ta.

²² Pilat ta a yi thungnapa ta, “Khaapa suena ma a tue? Thiy aa phuvpa suena a cunglie suokha hmuo hmung va ang! Asung ta pachi sa'a yi ang tena i pathlie aa,” a ta.

²³ Cuorasala Zingsuv ca vieluo cunglie thie riypata ama khi khu thiyta khi yite ama hiecade pari nakawta, a hnangcaw taca iema ueryi khata a te.

²⁴ Cacuonakawta Pilat ta ama hiena haata pi riypata biechina a tue.

²⁵ Ama khingpapaa, aduna a tue nakaw hne lie a naw nakawta thaw ama pathlapapaa kha pathliepa yite, Zingsuv kha iema khingna haata ama kuv luo a pi yi.

Zingsuv Vieluo Lie Ama Thie

²⁶ Zingsuv ama pyakhyile pa khata, khyta taata khypuv luo a vya chiypa Sairin khy ming Simon kha amaa taw. Patuv yite, vieluo kha papuv sa yite Zingsuv hnang luo kha ama paziy sa.

²⁷ Cawsaa hluvpuv ta ziy yite capa hrawlie ca a cacunghnaa a cung te a caakhyi nguoluopa canung chekha zaw ama aw.

²⁸ Zingsuv ta iema kha a palichiy yite, “Vya Jerusalem sacanung zaw, kama cuota ca caa kha ung; niema cuo hne nama saata zaw cuo khata caa hriy tie ung.

²⁹ Tahematapakieca cawsaa ta, ‘A cingpa canung, nu a phya buo lipa hne haatiy ta aa hnung a pazaw buo lipa ca thluechiypa tana a cuo!’ ama tana cuo kha a vya pha aa.

³⁰ Cakhutaata cawsaa ta tluo kha, ‘Na za vy la!’ ta'a yite sing kha, ‘na za buvkhung la!’ ama ta aa.

³¹ Tahematapakieca thing a hring ning hmuo hinghaapa hmang hing tuepa a cuo kieca a rue taa changchiy ca khaapama a lu aa?” a ta.

³² A hrangpa, a suepa pahning kha, Zingsuv hne thie hne riypata ama sikhyi ra.

³³ “Luvruv,” ama tapa hmang ama pha tiyta capa hmang lieca Zingsuv kha vieluo lie khepuo yite a suepa pahning zaw ca a cavyi luota pakha a cacuo luota pakha ama khepuo ra. (

³⁴ Zingsuv ta, “I Paa! A ngiethe tie yi, tahematapakieca khaapama ma tue tapa kha a pachang vayi,”) a ta. Cakhutaata a caw kha a re riypata vyisung amaa da.

³⁵ A thaa lie a daapa cawsaa tie ta ama mang nguoluo ning kha Judah uvthyi tie ta tue hyalya yite: “Malie ca a khuo yi; Khazing ta aa tlawpa Messiah a cuo kie ama hne ama ca a khuo se,” ama ta

³⁶ Rieka tie zaw ta ama tue hyalya: khawchiy yite mingsuv tiy thuepa kha pi yite,

³⁷ “Judah ming siepahruo ta na cuo kieca nama hne nama kha a khuo tie,” ama ta.

³⁸ A luv cunglie ama taapa caa ca: “Hingpa hing Judah ming Siepahruo tana a cuo,” tapata a cuo.

³⁹ Capa lie ama pathlie rapa a suepapaa pakha ta esena cang ta, “Nama ca Messiah cuo va cama? Nama hne nama kha a khuo la kiema zaw hing malie khuo tie nie!” a ta.

⁴⁰ Cuorasala a hrangpa pakha khata ama kha chuo te, “Ama hne aa lupa biechina rawlie na aw nguoluo thluopa hing tama Khazing ciy li pata na aw?

⁴¹ Kiema cuota biechina ama tuepa hing ca aa hmuopa tana a cuo, tahematapakieca ma hmang tuepa cunglie ang aa tlapa khana ma ang; cuorasala ama hing ca phalina khaahmuo tue vyi,” a ta.

⁴² Cakhutaata Zingsuv kyihuo kha, “Vya Zingsuv, na pena chung luo naa vaw tiyta naa thyi thi mya!” a ta.

⁴³ Zingsuv ta, “Biehmisi tana ica chang: Ata ning kama hne Paradais lie na aw aa,” a ta.

Zingsuv Thiyna

⁴⁴ Ningchung khingkhuo tluv taata zuoluo siymaluo pathung te ruo bangkhuo lie zingna a tlung.

⁴⁵ Ning a zing chung cata Biena-ing pangzu ca tlaa te chehning ta aa che.

⁴⁶ Zingsuv ca khuopuv ta khi te, “I Paa! I thlaapa ca na kuv chunglie na ica pi!” a ta. Capaca a ri khu taata a huv a ci.

⁴⁷ Riebyipapaa ca hmang a cuopa kha a hmung tiyta Khazing kha pathuosa te, “Hingpapaa hing suena a hnyi bangby lipa tana a cuo!” a ta.

⁴⁸ Capa hmang mang riypata a hmyapa cawsaa zaw ta hmang a cuopa kha ama hmung tiyta ama cacunghnaa kha a cung yite amaa diy.

⁴⁹ Pangpa ta Zingsuv a pachangpa bangkhuo hne Galilee ruo taata ama a ziypa canung zaw ca a luopaa khata a daa yite ama suo.

Zingsuv Pabyna

⁵⁰ Cawsaa phasapa hne a dangsapa Josef ama tapapaa ca bierituv phuv chunglie a te rapa a cuo raalaa pata

⁵¹ ama tingtuopa hne ama hmang tuepa kha a palung tling vyi. Ama ca Judah ming khy Arimathea taata cuote Khazing Pena a zuv riypa kha a huopa a cuo.

⁵² Pilat'a luo kha vaa te Zingsuv riy kha a hie.

⁵³ A riy kha vieluo cung taata pachung te, pawruo ta cataw te, ahungtahmuo hmuo buo li liepa alung ama ryipa thluo chunglie a paby.

⁵⁴ Capa cuo ca A chiedaw ning ta cuote Sabbath ning kha aa thu tyalya tli.

⁵⁵ Galilee ruo taata Zingsuv a ziypa canung zaw ca Josef kha ziy yite thluo hne Zingsuv riy tuokhaatama ama chi tapa kha ama va mang.

⁵⁶ Cakhutaata ing luo a diy yite ziyhmyi hne sathu kha pachie pacie pata ama chi. Sabbath ning ca Phungbie haakhata amaa pahy.