Luka 22 - Lautu New Testament

Zingsuv Thie Riypata Ama Raw

¹ Lawsena Pyi ama tapa Thiynung phuv lipa Viechuo pyi kha a ngie tli.

² Tluobyilepa tie hne phungbiesaya tie ca cawsaazaapuv kha ama ciy nakawta Zingsuv kha a paruvta tah thie khuna riypa luopuv ama huv nguoluo.

³ Cakhutaata ziytuv hlyihning hrawlie ta pakha a cuopa Iskariot ama tapa Judah chung luo kha Setaa aa ngie.

⁴ Cacuonakawta Judah ca tluobyilepa tie hne Biena-ing a huotuv abyi tie'a luo kha vaa te Zingsuv kha iema'a luo a pi khuna riypata bie a vaa rue yi.

⁵ Ama palung tluosa te tuokaa pi riypata ama palung a tling.

⁶ Ama zaw a palung tling te cawsaazaapuv pachang li pata iema kuv chung luo Zingsuv a pi thena riypa yi ta a chaw a rawpa cuo kha a huv.

Lawsena Pyi Cuota Atingna

⁷ Thiynung phuv lipa Viechuo Pyi, Lawsena tuvtaata ta hriykhung a rina cuo kha a vya pha.

⁸ Cacuonakawta Zingsuv ta Piter hne Johan ca pathlie yite, “Vaa ungla ima ning riypata Lawsena Pyi sa kha va pachie tie ung,” a ta yi.

⁹ Iema ta, “Khaapa lie va pachie riypata ma malie na khing?” ama ta.

¹⁰ Ama ta, “Naa thlie tie ung, khypuv chung luo nama vaa ngie pahne tiybi ta tiy a vya cabalepapaa kha namaa taw aa. Aa ngienapa ing te khata va paziy ungla,

¹¹ capa ing a hnyituvpapaa kha, ‘Ma sayapa na, Kama hne naa ziytuv tie Lawsena zuosa ma ningna riypa khuo ca khaapa hingma a cuo? tapata hiehriy tie ung,’ a ta yi.

¹² A cung khuo lie thude hne cabya tluotlingsa pata ama chipa a khuo kusapa kha ca pahmung'a yite capalie ca va pachie tie ung,” a ta yi.

¹³ Vaa yite Zingsuv ta a changpa dadang haakhata hmang bangkhuo kha va hmung yite capa lieca Lawsena zuosa ca ama pachie.

Abyipa Zuosa

¹⁴ A cuo a vya tling tiyta Zingsuv ca ziytuv tie hne khata cabya lieca aa tu.

¹⁵ Ama ta, “Hing Lawsena zuosa hing ruvnaana i ang hluo ta niema hne ning pakhaw riypa hing i khing hringhruo.

¹⁶ Tahematapakieca ica chang yi: Khazing Pena chunglie hingpa hing patling sapa a cuo hluo li ning'a va tli ang,” a ta.

¹⁷ Cakhutaa Zingsuv ca panuo kha la te, Khazing'a luo alawna bie a hluo khu taata, “Hingpa hing a la ungla a re tie ung.

¹⁸ Ica chang yi: Ata taahingta Khazing Pena a vya tlung hluo li hingpa mingsuv tiy hing dang'a va tli ang,” a ta.

¹⁹ Cakhutaata viechuo zaw kha la te, Khazing'a luo alawna bie a chang khu taata, chechi te iema kha pi yite, “Hingpa hing nama cuota i pipa i pangpa tana a cuo, kama a thyi pakhaana riypata za tue mya ung,” a ta yi.

²⁰ Cahaa cata zuosa ama ning khu taata panuo zaw kha pi yite, “Hing panuo hing nama cuota i lyipa, i thiyse ta pacusapa Khazing biekuona thaapa tana a cuo,” a ta.

²¹ Cuorasala mang tie ung! Kama naa lyituvpapaa ca hingpa cabya lie hing kama hne maa tuhne hing.

²² Tahematapakieca Cawsaa Saacapaa ca rawrue ciepa haatana a ziy aa, cuorasala a lyituvpapaa cuota ca ciy aa chiy hringhruo,” a ta.

²³ Cakhutaata iema pakha hne pakha kha, hinghaapa hmang hing ahung hingma a tue aa, tapata amaa hiehriy.

Ahungma A Lece

²⁴ Ziytuv tie hrawlie kha ahungma a lecepa ta rue riypata a cuo, tapata bie a inapa a puv.

²⁵ Zingsuv ta, “Chuelyi siepahruo tie taca ama cawsaa zaw kha ama duv ta lesue yite capa naw a hnyituv tie kha ‘Phana a tuetuvpa,” ama za ta taw.

²⁶ Cuorasala niema ca cahaa cata cuo'a va ungciy; niema hrawlie a lecepa ca a syicepa haata aw'a te luochiytuv a cuopa ca changtaapa haata a cuo aa.

²⁷ Ahungma a le vie? Sa ning riypata a tupa kha ma, sa a pituv kha ma? Cabya lie a tupa kha le vie vama? Cuorasala kama ca niema hrawlie hing sa a pituv haa khatana i aw,” a ta yi.

²⁸ Ruvnaanapa i ang chung bangkhuo naa awpuotuv ca niema tana nama cuo;

²⁹ I Paa ta a pena ina pipa haata kama zaw ta niema kha ica pi'a yi.

³⁰ I Pena chunglie i cabya lie kha ning dang'a ung cate Israel mingphang hlyihning kha bie ripa riypata byithude cunglie namaa tu aa,” a ta yi.

Piter Ta A Thawna Riypa Kaw A Rilu

³¹ Zingsuv ta, “Simon, Simon! Naathlie tie! Setaa ta niema bangkhuo kha suo cathlyi haata cathlyi riypata naw a hie tli.

³² Cuorasala, na zangna aa lie li riypata thlaa ica chuopa. Kama'a luo naa vya pali pakhaa tiyta na uvnu zaw kha thaazuo pi mya yi,” a ta.

³³ Piter ta, “Abyipa nama hne thaw tlahne riypa hne thiy pakhaw riypata a ting pacie patana i aw,” a ta.

³⁴ Zingsuv ta, “Piter, ica chang: Ata zuo lie hing, ama ca pachang va ang ne tapata yi thung ina thaw hluo li ciy, aa khang'a vyi,” a ta.

Tuokaabaw, Sahrie Hne Zueziy

³⁵ Cakhutaata Zingsuv ta ziytuv tie kha, “tuokaabaw, sahrie, hne phyipakaw a cake li pata ica pathlie ning yi kha suokha chuo a tluo a tling lipa a aw ma?” a ta yi. Iema ta, “Khaahmuo aw vyi,” ama ta.

³⁶ Zingsuv ta, “Cuorasala, ata hing ca, tuokaabaw a cuo li kie sahrie a hnyipa ca a phya se; zueziy a hnyi lipa ca a buohryicungle kha zaa sala a calyi se.

³⁷ Tahematapakieca ica chang yi: Caapathepa ta, ‘Ama ca a suepa tie hrawlie na ripuopa a cuo,’ tapata kama kaw a capepa kha a tling aa. Tahematapakieca kama kaw ama capepa bangkhuo kha a vya tlingle lawmaw aa,” a ta.

³⁸ Iema ta, “Mang tie, Abyipa, hinglie hing zueziy suohning a aw,” ama ta. “Ca zaa cata a de aa!” tapata a palie yi.

Oliv Tluo Lie Zingsuv Thlaa A Chuo

³⁹ Zingsuv ca pya te a tue tawpa haakhata Oliv tluocung luo kha kie te a ziytuv tie ta ama paziy.

⁴⁰ A hmang luo a pha tiyta iema kha, “Pasupaliyna luo nama tla li riypata thlaa chuo tie ung,” a ta yi.

⁴¹ Cakhutaa alung vaa khang a hlana luo kha vaa te a pakhuv pane te thlaa a chuo.

⁴² “I Paa, na palung a tling pata a cuo kieca hingpa te-angna panuo hing na lapa thi tie. Cuorasala kama khingna haa cuo li pata nama khingna haa cuo mangsue,” a ta.

⁴³ Vuoruo taata avuoming pakha zaa luo te thaa a pi.

⁴⁴ Palung riethyisa pata khuo vie ta thlaa chuo te a mathle ca thiydiy haata alyi luo a tla.

⁴⁵ A thlaachuona taata thu te ziytuv tie'a luo kha a kaa tiyta amaa zaa hmung diypa kha a hmung yi, ama ngie a chisa nakawta a cuo.

⁴⁶ Ama ta, “Khaapanakawma namaa hmung? Thu ungla pasupaliyna chung luo nama tla li riypata thlaa chuo tie ung,” a ta yi.

Zingsuv Ama Lyina Hne Ama Patuvnapa

⁴⁷ Zingsuv bie a ri nguoluo kalie pata a ziytuv tie hraw taata pakha a cuopa Judas ta aa vya chiypa cawsaazaapuv kha ama vya chiy. Zingsuv kha pahnuo riypata a vaa ngie.

⁴⁸ Cuorasala Zingsuv ta, “Judas, Cawsaa Saacapaa hing pahnuona tama na lyi,” a ta.

⁴⁹ A thaalie a awpa tie ta hmang a vya cuo riypa kha ama hmung tiyta, “Abyipa, zueziy hingta a ce'a kanaa yi pamaw?” ama ta.

⁵⁰ Iema hraw taa pakha ta tluobyilecepa siipaapa kha a vya ce te a cacuo luo naacakue a sa pathla.

⁵¹ Cuorasala Zingsuv ta, “Ade se!” ta te a naacakue kha hrie te a patluo sa.

⁵² Cakhutaa ta Zingsuv ta ama patuv riypata a vawpa tluobyilepa tie, biena-ing paliy byi tie hne uvthyi tie kha, “Kama hing damie haata patuv riypata ma zueziy hne tungbung hneta na maa vaw?

⁵³ Ningting ta niema hne Biena-ing chunglie i aw ning kha na patuv vade ungciy. Cuorasala ata hing ca khyzingna huvhaa a cahra ning cuote, niema cuo tana a cuo,” a ta yi.

Piter Ta Zingsuv A Thaw

⁵⁴ Zingsuv ca patuv yite Tluobyilecepa ing luo kha ama sikhyi. Cuorasala Piter ta aa hlapuv taakhata a paziy yi.

⁵⁵ Ahmie khingkhuo lie kha myipung thaw yite amaa tupakhawna lie kha Piter ca a tu ra.

⁵⁶ Myi kielie aa tupa kha changtaanung pakha ta hmung te hmiedesuo ta mang te, “Hingpapaa zaw hing Zingsuv'a lie a aw rapa tana a cuo ra,” a ta.

⁵⁷ Cuorasala Piter ta, “Cawsaanung, capapaa ca pachang va ang,” a ta.

⁵⁸ A cawta a awpa ta pakhapa ta hmung te, “Nama zaw hing iema hraw taa pakha tana na cuo,” a ta. Cuorasala Piter ta, “Cawsaapa, cuo va ang,” a ta.

⁵⁹ Siymaluo pakha tluv khu taata a hrangpa pakha ta a cusa pata, “Hingpapaa hing Zingsuv hneta a aw rapa tana a cuo hrahring, tahematapakieca Galilee ming tana a cuo,” a ta.

⁶⁰ Cuorasala Piter ta, “Cawsaapa, khaapama na ri tapa pachang va ang,” a ta. Bie a ri nguoluo kalie pata aa a khang.

⁶¹ Abyipa ca a pali te Piter kha a mang, Piter ca Abyipa ta, “Ata zuo aa a khang hluo ta yi thung te ina thaw'a ciy,” a tapa kha aa kya thyi.

⁶² Piter ca pya te palung ityalya khata a caa.

Zingsuv Ca Tue Hyalya Yite Ama Tuv

⁶³ Zingsuv ca a patuvpa tie khata tue hyalya yite ama tuv.

⁶⁴ A ming kha pahruv yite, “Ahungma caa tuv, ri tie,” ama ta.

⁶⁵ Cahaa cata esena bie kha a cunglie a hluvsa ama ri.

Bieripatuv Phuv Hmie luo Zingsuv Ama Chiykhyi

⁶⁶ Khy a dyi taata Judah uvthyi tie, tluobyilepa tie, hne Phungbiesaya tie kha a hmya yite Zingsuv ca bieripatuv phuv hmie luo kha ama chiykhyi.

⁶⁷ Iema ta, “Messiah na cuo kie malie chang tie,” ama ta. Ama ta, “Ica chang zaw yi ta na zang'a va ungciy;

⁶⁸ bie ica hiehriy zaw yima na palie'a va ungciy.

⁶⁹ Cuorasala ata taahingta Cawsaa Saacapaa hing Cungnungce Khazing cahrana cacuo luo kuo ta patu sapa a cuo aa,” a ta.

⁷⁰ Ama bangkhuo ta, “A cuo kie, Khazing Saacapaa ta na cuo ma?” ama ta. Ama ta, “I cuopa ca niema na a ri ungciy,” a ta yi.

⁷¹ Cakhutaa iema ta, “Khaapa pachangkhyituv hrangpa ma a hu'a tli! Ama pakaa taa hrahring ta ma thyi tli,” ama ta.