Luka 21 - Lautu New Testament

Nunghlyinung Sue Pina

¹ Zingsuv ta a kya mang ca a hnyirungpa tie ta Biena-ing tuokaa thingkaw lie sue ama pathla nguoluo pakha a hmung;

² a siypasanung nunghlyinung ta piesepa pie hning a pathlapa zaw kha a hmung.

³ Ama ta, “Ica chang yi: Nunghlyinung hingna a hrangpa bangkhuo laata a hluv vie a pi;

⁴ tahematapakieca a hrangpa tie pathuo ca ama hnyi lebuopa ca muo ama pi ta, cuorasala hingpa nung hing ca a siy a pasasa thluo pata a hringna cuota a hnyipa kha a bangkhuo ta a pi diy,” a ta.

Zingsuv Ta Biena-ing Rana Riypa Kaw A Rilu

⁵ Chekha ta Biena-ing kaw kha ri yite, alung phasa pata pangi yite a puvthena zya hne Khazing'a luo ama pipa a ahlu kaw zaw kha ama ri. Zingsuv ta,

⁶ “Hingpa bangkhuo hing nama hmung; hingpa alung bangkhuo hing thawpathla diy'a yite suokha cunglie suokha hmuo a aw lina cuo a vaw aa,” a ta.

Pamangsana Hne Hrisaathieruena

⁷ Iema ta, “Saya, capaca khatiy thuema a cuo aa? Capaca a vya chiy'a tli tana pata tuokhaapa pamangsana ma a aw aa?” tapata ama hiehriy.

⁸ Zingsuv ta, “Aca dung li riypa yita a raaring tie ung; Cawsaa hluvpuv kha i ming ta a vaw'a yite, ‘Kama hingna ama ta a cuo ang, a cuo na a ngie tli,’ aca ta'a yi.

⁹ Rietuvna hne a duna kaw nama thyi tiyta ciy kha ung; cahaapa hmang ca a vya chiy taa aa, cuorasala a chuona ta vya paziy paluo'a vyi,” a ta.

¹⁰ Cakhutaata iema kha, “Ruokha hne ruokha amaa du aa; acuzaa suokha hne suokha ama tuv aa.

¹¹ Aling khuosa ta a siy'a te, ruo ting lie cakuo ruvnaana a tlung aa; ciy aa chiypa hmang hne pamangsana lesapa kha vuoruo taata a luo aa.

¹² Cuorasala hingpa hmang bangkhuo a vya chiy hluo ta niema ca ca patuv'a yite aca hrisaa'a yi; apungna-ing luo kha bieripa riypata ca chiykhyi'a yite thaw a ca pathla'a yi; I ming kawlieta siepahruo tie hne uvtuv byi hmie luo aca chiykhyi'a yi.

¹³ Capaca nama cuota tehte khuona cuopha ta a cuo aa.

¹⁴ Nama hne nama kha a rikuo pacie riypata na palung chunglie kha a ting pacie kha,

¹⁵ tahematapakieca bie hne singna kha ca pi'a yi ang te nama carie tie ahungtahmuo nama bie kha a du pata ca i khu'a vayi.

¹⁶ Nama nung nama paa, nama uvnu, nama tieriy hne nama viesaa tie ta calyi'a yite chekha ca aca thie'a yi.

¹⁷ I ming kawlieta cawsaa bangkhuo ta aca hue'a yi.

¹⁸ Cuorasala nama luv lie suobuv buvkha hmuo vie'a vyi.

¹⁹ Naa daapahrang khu kiena hringna na hmung aa” a ta yi.

Zingsuv Ta Jerusalem Rana Kaw A Rilu

²⁰ Rieka tie ta Jerusalem ama cadungpa kha nama hmung tiyta a ru hluo ta a ra'a tli tapa kha nama pachang aa.

²¹ Catiyta Judea lie a awpa ca tluocung luo kha a ruo yi se, khypuv chunglie a awpa ta pya yi sala khyta lie a awpa tie ca khypuv chung luo kha a ngie kha yi se.

²² Tahematapakieca hingpa hing ‘Phuvlana Ning,’ tapa kha cuote Caapathepa ta a ripa bangkhuo a tlingna riypata a cuo.

²³ Capa cuo ca nu a phyapa canung hne ahnung a pathlie li liepa haaseta a hnyipa tie cuota a ruv hringhruo aa! Tahematapakieca hing alyi cunglie hing ciy aa chiypa ruvnaana za tlung'a te hingpa cawsaa zaw cunglie hing Khazing duotena ca a tlung aa.

²⁴ Chekha ca zueziy ta thiy'a yite chekha ca chuelyi ruo ting luo sii ta a dapa ama cuo aa; Jentail ming ta Jerusalem kha iema cuo a chuo hluo li ama phyi ta ama chaapuo aa.

Cawsaa Saacapaa A Vawna Kaw

²⁵ “Ning hne thlaapa hne aasiy lie khiy pamangsana hmang aa luo aa. Chuelyi cung ruo zaw ca riyliy tiylaw pachipa hne a khipa pu khata ciyna hne lalilahie chiy pata a tue'a yi.

²⁶ Chuelyi cunglie a tlung riypa ama rue tiyta cawsaa ca ciy'a yite ama thiychie aa, tahematapakieca vuoruo cahrana ca a cahang aa.

²⁷ Cakhutaata cawsaa saacapaa ca rungnaana lesyina'a nata cahrana hneta amyi cung taata a zuvpa kha ama hmung aa.

²⁸ Hingpa hmang zaw a vya chiy a vya cuole tiyta, a daa ungla cungluo kha mang tie ung, tahematapakieca niema a thlana ning ca a ngie tli,” a ta.

Thyikuv Kung Taata A Cuv Riypa

²⁹ Cakhutaa Zingsuv ta pakhing-puonabie suokha a chang yi: “Thyikuv kung hne thingkung bangkhuo kha mang tie ung.

³⁰ A hnaa a kya pakiypa nama hmung tiyta, cuovuo na a ngie tli tapa kha nama pachang.

³¹ Cahaangiethiecata, hingpa hmang a vya tlungpa nama hmung tiyta Khazing Pena ca a ngie tli tapa kha nama pachang aa.

³² Biehmisi tana ica chang yi: Ata lie a hringpa tie ama thiy diy hluo hingta hing hmang bangkhuo hing a vya tlung aa.

³³ Avuo hne alyi ca ama ra aa, cuorasala i bie ca ra buo hluo'a vyi,” a ta.

A Raaring A Hu

³⁴ “A raaring ung! Pariyna te ning dangna kaw hne khysatungbang ruvnaana kaw dyi kha rue kha ung, capa ningkhue cata rue li pata ca vya pha'a yite

³⁵ cyihyi pa-uo ta a ca pa-uo'a yi. Tahematapakieca capa ning ca chuelyi cunglie a awpa cawsaa bangkhuo cunglie a vya tlung aa.

³⁶ A vya tlung riypa hmang bangkhuo taahingta nama law khu na riypata thaazuo nama hnyi riypa hne Cawsaa Saacapaa hmielie namaa daa khu thena riypata a raaringsa pata aw ungla thlaa chuo pari tie ung,” a ta.

³⁷ Zingsuv ca a ning tating ta Biena-ing lie kha pacuv yite zuo a vya chiy tiyta pya te Oliv tluo luo kha aa kya ri taw.

³⁸ Biena-ing lie a bie naathlie riypata cawsaa bangkhuo ca mawdiy ta ama thu.