Kolose 1 - Lautu New Testament

Bie-achangna

¹ Khazing khingna thueta Khrih Zingsuv lucuotuv ta a cuopa kama Paul hne ma uvnupa Timote ta

² Kolose khy lie a awpa, mingpathepa tie hne Khrih chunglie uvnu hne sieta zaw'a luo kha caa maca paphya yi. Ma paa Khazing'a taata vihnyina hne diena ca nama cunglie aw mangsue.

Palungtluona Thlaachuo

³ Niema cuota thlaa ma chuo mekaa ta ma Byipaapa Zingsuv Khrih a Paa Khazing ming kha ma pathuo sa.

⁴ Tahematapakieca Khrih Zingsuv nama zangna hne mingpathepa tie bangkhuo nama duena kaw kha ma thyi tli.

⁵ Caca nama cuota vuoruo lie chi ciepa a nguopuona, biehmisipa, thuophaabie chunglie nama za thyi ciepa thue khatana a cuo.

⁶ Capa thuophaabie ca chuelyi khyzaa lie kha a thyi pathyi te a lethaw pahaata niema'a lie zaw kha Khazing vihnyina hmisipa nama pachang ning taakhata thyi a pathyi ra tli.

⁷ Caca ma duepa, ma rehriehne changtaapa ta a cuopa Epafras taata nama thyi pata a cuo. Ama ca niema cuota zangtluo aa tlapa Khrih rehrietuv tana a cuo.

⁸ Ama ta Thlaapa ta aca pipa yi duena nama hnyina kaw kha malie a chang.

⁹ Cacuonakawta, hingpa kaw ma thyining taata a pathu pata niema ca thlaapa hne a patuvpa singna hne pachangna hnyi pata Khazing khingna pachangna hne nama bi riypata ci li ta thlaa maca chuopa pari yi.

¹⁰ Cahaa cata niema ca hmangpha tuena lie kha thyipaa pha hnyi'a ung cate, Khazing pachangna lie kha nama lethaw pahaata, Khazing palung kha patluo'a ung cate, Abyipa hne aa phuvpa hringna kha nama hnyi aa.

¹¹ Hmangting bangkhuo kha palungpasiyna hne nama ang khu riypata a rungnaapa ama thaazuo ta ca cahra sa yi se. Hmangting bangkhuo kha palungpasiyna hneta a ang khupa nama cuo riypata ca pacung ca pare ku yi se.

¹² Khena chunglie mingpathepa tie ru caa pahraw sa ratuv yi ma Paa ca alawna hne pathuosa tie ung.

¹³ Zingna cahrana chung taakhata malie thue te a duepa a Saacapaa pena chung luo kha malie aa ngiekhyi.

¹⁴ Ama thueta a thlapa cuo pate sue a ngiethe pata ma cuo.

Khrih Lesyina

¹⁵ Khrih ca hmung khu lipa Khazing hminghmie ta cuote sapa hmang bangkhuo hrawlie sa-uvthyi ta a cuo.

¹⁶ Tahematapakieca vuoruo hne alyi lie a awpa hmang bangkhuo hing ama thueta sapa cuote, hmung khupa hne hmung khu lipa hmang bangkhuo, siepahruo uvna thude, uvpa ruo hne uvtuv tie, cahrana bangkhuo hne hmangting bangkhuo hing ama thueta hne ama huota sapa tana ama cuo.

¹⁷ Ama ca hmangting bangkhuo hluo ta za aw tli te, hmangting bangkhuo ca ama chunglie amaa sawpakhaw diy.

¹⁸ Ama ca a pangpa ta a cuopa Khrihsaabuv a luv ta cuote; a hruothuna, a thiypa tie chung taata pathu pakhaapa sa-uvthyi ta a cuo. Cahaa cata a cuopa ca hmangting bangkhuo hrawlie pakhana a cuo parina riypata a cuo.

¹⁹ Tahematapakieca ama chunglie Khazing cuona a tlingpa bangkhuo a aw riypa kha palung tluo pata cuote,

²⁰ vieluo lie thiyse thueta a tuepa diena hne ama thueta, Khazing ta, alyi lie a cuo li kie vuoruo lie a awpa hmangting bangkhuo hne a rena tue riypa kha a palung a tluo.

²¹ Niema ca a hluo taca Khazing hne zaa hlapa, huena pathiypalung zaa hnyipa hne hmang pha lipa zaa tuepa tana nama cuo.

²² Cuorasala, ata hing ca Khrih a saapa pangpa thiyna ta niema kha caa re yite, a pathepa, syi riy a aw lipa hne suena hnyi li pata Khazing hmie luo chiykhyi a caa ting yi.

²³ Namaa daana hmang ciepa, nama zangna lie kha a cusa pata a daa tie ung. Nama thyi ciepa thuophaabie thueta namaa nguopuopa biekuona taakhata a palaw kha ung. Caca avuo rawlie sapa bangkhuo'a luo phupa thuophaabie ta cuote, kama Paul hing capa thuophaabie sii catana i cuo.

Khrihsaabuv Cuota Paul Rehriena

²⁴ Niema cuota i te-angna kawlie hingta i palung a tluo. Tahema-tapakieca i saapa te-angna hingta Khrih ta a pangpa ta a cuopa khrihsaabuv cuota a te-angna kha i patling sa ra pata a cuo.

²⁵ Khazing bie kha tluotlingsa pata nama pachang na riypata, kama ca, Khazing ta niema cuo khata khrihsaabuv changtaapa ta ina tue tli.

²⁶ Capa bie ca chuo bangkhuo lieta za nupa bieparuv cuote, cuorasala ata hing ca a mingpathepa tie'a luo kha phupa ta a cuo.

²⁷ Ca mingpathepa tie ca, nupa bieparuv rungnaana hne hnyirungna ca Jentail ming hrawlie khatluv tama a le tapa kha pachang sa riypata Khazing ta a tlawpa tana ama cuo. Ca bieparuv ca a rungnaapa namaa nguopuona ta a cuopa, nama chunglie a awpa Khrih khatana a cuo.

²⁸ Cawsaa bangkhuo kha Khrih chunglie a tlingpa hringna hneta Khazing hmie luo ma chiykhyi khuna riypata Khrih kaw ca phu pate singna ma hnyipa bangkhuo hmuo pata cawsaa bangkhuo kha a raaringna pi yi pate ma pacuv yi.

²⁹ Hingpa hmang a cuo khuna riypa hingta ama ta ina pipa i chunglie a awpa cahrana hmuo pata khuopuv ta a zue ang te i hrie.