Johan 13 - Lautu New Testament

Zingsuv Ta Ziytuv Tie Phyi A Pasiy

¹ Lawsena pyi hluo ta, Zingsuv ca hing chuelyi hing sise pata a Paa'a luo si riypa cuo a vya chiy tli tapa kha a pachang. Chuelyi lieta a awpa ama huopa a cuopa tie kha due pari yite a chuona te a due yi.

² Zingsuv kha lyi riypata Setaa ta Simon Iskariot saacapaapa Judas palung chunglie kha ruena a chi mangtli.

³ Zingsuv ca i Paa ta hmangting bangkhuo kha i kuv cung luo ina pi diy tli tapa hne, Khazing'a taata a vaw ang te Khazing'a luo na i kaa pakhaa aa tapa kha a pachang nakawta,

⁴ cabya taakhata thu te a buohryipasiypa kha a thlie khu taata pavya ta a se kha aa ri.

⁵ Cakhutaata zalungpakaa lie kha tiy patle te ziytuv tie phyi kha pasiy te a se lie aa ripa pavya khata a hruv yi.

⁶ Simon Piter luo a vya chiy tiyta ama ta, “Abyipa, nama ma i phyi naa pasiy'a ciy? a ta.

⁷ Zingsuv ta, “Khaama i tue tapa kha ata hing ca pachang vaciy, cuorasala a hnang taata ca na pachang aa,” a ta.

⁸ Piter ta, “I phyi ca na pasiy buohluo'a vaciy,” a ta. Zingsuv ta, “Na phyi ica pasiy li kieca kama'a lie aw ra the'a va tli ciy,” a ta.

⁹ Simon Piter ta, “Abyipa, i phyi dyi cuo li pata i kuv hne i luv zaw hing na pasiy puo tie,” a ta.

¹⁰ Zingsuv ta, “Tiy a siy tlipa ca a pathe diy tli nakawta a phyi ri li pata a hrang luo pasiy a hu vyi. Nama palang ta nama pathe, pakha ri li pata ca,” a ta yi.

¹¹ Ama taca ahungma naa lyi aa tapa kha a pachang nakawta, “nama palang taca pathe va ungciy,” a tapa a cuo.

¹² Ama phyi a pasiy khu taayita, a buohryipasiypa kha a hryi te cabya luo kha vaa tu pakhaa te, “Niema'a lie i tuepa hmang hing a siyluo nama pachang maw?

¹³ Niema ta, ‘Saya,’ hne ‘Abyipa,’ ina tapa ung cahing namaa hmuo, tahematapakieca ina tapa haa ungcata i cuo sasaw.

¹⁴ Nama Byipaapa hne Saya ta a cuopa kama ta nama phyi kha ica pasiy kie yi ca niema zaw pakha hne pakha kha nama phyi namaa pasiy riypata a cuo.

¹⁵ Nama cuota a mangpuo riypa ica tuepa tli yi, nama cuota i tuepa haakhata niema zaw nama tue riypata a cuo.

¹⁶ Biehmisi tana ica chang yi: changtaapa ca a byipaapa laata le vie vyi, biephyatuv zaw a pathlietuv laata le vie vyi.

¹⁷ Hing hmang hing pachang ung cate nama ziy kieca thluechiypa ta nama cuo.

¹⁸ Hinghaahingta i ri tiyta nama palang ta ica ta khingpa yi cuo vyi; i tlawpa ca i pachang thluo yi. Cuorasala Caapathepa ta, ‘kama hne sa a ningpakhawpa na naa rawpa a cuo, a tapa ca a tling aa hu,’ a ta.

¹⁹ Hmang hing a vya cuo sasaw tiyta kama hing ama catana i cuo tapa kha nama zang khu the riypata a cuo hluo ta ica chang pacie yi.

²⁰ Biehmisi tana ica chang yi: Kama ta i pathliepa ahunghmuo a cuhluopa ca kama naa cuhluopa ta cuote; kama kha naa cuhluopa ca naa pathlietuv a cuhluopa ta a cuo,” a ta.

Zingsuv Ta Ama Lyi Riypa A Rilu

²¹ Capa bie a ri khu taata Zingsuv ca a palung rie thyi te, “Biehmisi tana ica chang yi: niema chung taa pakha ta ina lyi'a ungciy,” tapata a ri pathla.

²² Ziytuv tie ca pakha hne pakha kha a mang yite, ahung hingma malie a ta khing a ta yite nang-uosa pata ama aw.

²³ Ziytuv tie chung taata pakha—Zingsuv ta a duepapaa kha Zingsuv a vaa pha pata aa tu.

²⁴ Simon Piter ta a kuv dya a kyipa te, a ripa hing ahungma a ta khing hnuochuopa a cuo tapa kha a pahiehriy sa.

²⁵ Cacuonakawta Zingsuv kha a kya hnyichiy vie te, “Abyipa, ahungma? a ta.

²⁶ Zingsuv ta, “Viechuo hing tiyhuo pakaa luo naw'a ang te i pipapaa hingna a cuo aa ta te, viechuo kha naw te Simon Iskariot saacapaapa Judas kha a pi.

²⁷ Viechuo kha a cuhluo pahne ta a chung luo kha Setaa aa ngie. Zingsuv ta, “Na tue riypa ca a catli pata tue tie,” a ta.

²⁸ Khaapanakawma cahaa cata a ri tapa kha cabya cunglie a tupa ahungtahmuo pachang vayi.

²⁹ Ziytuv tie chekha ta ca, Judas ca tuokaabaw a patuvpa a cuo nakawta, Zingsuv ta, pyi lie hmuo riypa ma a calyi sa a cuo li kie siypasa tie kha ma suokhakha a papi sa yi,’ tapata ama rue.

³⁰ Cacuonakawta Judas ca viechuo a cuhluo pahne ta a pya paluo. Capa cuo ca zuo ta a cuo.

Nawbie Thaapa

³¹ Ama a pya khu pahne ta Zingsuv ta, “Ata ca Cawsaa Saacapaa hing rungnaana pi pata a cuo tli; Khazing zaw kha Cawsaa Saacapaa thueta rungnaana a hmung tli.

³² Khazing ca Saacapaa thueta rungnaana a hmung kieca Khazing ama hrahring ta Cawsaa Saacapaa kha rungnaana a pi paluo aa.

³³ I saa zaw kama ca niema'a lie a syi aw'a va tli ang. Ina huv'a ungciy; cuorasala, ‘I sina luo ca si ra khu'a va ungciy,’ tapata Judah ming i chang pahaa yi khata niema zaw ica chang yi.

³⁴ Phungbie thaapa na ica pi yi: pakha hne pakha a due tie ung. Kama ta ica due pahaa yi hingta pakha hne pakha namaa due riypatana a cuo.

³⁵ Pakha hne pakha namaa due kieca khapa thue khata cawsaa bangkhuo ta kama naa ziytuv nama cuopa kha aca pachang'a yi.

Piter Ta A Thaw Riypa Kha Zingsuv Ta A Rilu

³⁶ Simon Piter ta, “Abyipa, khaapa luo ma na vaa aa?” a ta. Zingsuv ta, “Ata hing ca i cakuona luo kha na ziy the'a valie ciy; cuorasala a hnang vie taata ina ziy'a ciy,” a ta.

³⁷ Piter ta, “Abyipa, khaapanakawma ata hingta ica ziy khu'a va? I hringna hmuo na cuota i pi'a muo” a ta.

³⁸ Zingsuv ta, “Kama cuota na hringna na pi'a ma? Biehmisi tana ica chang: aa a khang hluo ta yi thung ina thaw'a ciy,” a ta.