Galati 1 - Lautu New Testament

Bie-achangna

¹ Cawsaa ta ina chang nakaw yi hne cawsaa nawhnyina ta cuo li pata, Zingsuv Khrih hne ama kha thiyna taata a pathu pakhaapa ma Paa Khazing ta changpa lucuotuv kama Paul hne

² kama hne a awpa Khazing chungkhue uvnu zaw ta Galati khrihsaabuv tie kha caa maca paphya yi.

³ Abyipa Zingsuv Khrih hne ma Paa Khazing'a taata vihnyina hne diena ca nama cunglie aw mangsue.

⁴ Ata chuo, chuochiepa chung taahingta kiema kha hya pazang sa riypata, ma Paa Khazing khingna haata, Khrih ca ma suena cuo khata aa pi.

⁵ Rungnaana ca ama'a lie chuozaa ta aw mangsue. Amen.

Thuophaabie Hrangpa Aw Vyi

⁶ Khrih vihnyina chung luo caa kupa yi kha a catlisa pata thuse ung cate thuophaabie hrangpa luo namaa palipa ca i nang na ina pa uo ungciy.

⁷ Thuophaabie hrangpa a aw nakawta i ripa cuo li pata, nama palung caa paluoluetuv hne Khrih thuophaabie kha thle a nangpa chekha ama aw nakawta ica tapa yi ta a cuo.

⁸ Cuorasala, kiema ma cuozaw, vuoruo taata a zuvpa avuoming ama cuo zaw tahmuo, kiema ma phupa thuophaabie hne aa lu lipa thuophaabie kha niema'a lie ama phu kieca, chiesa pata cuo mangyisue!

⁹ Ma ri ciepa haakhata, ata hing i ripakhaa, nama cuhluo ciepa thuophaabie hne aa lu lipa thuophaabie a phutuv pakhakha a aw kieca, chiesa pata cuo mangsue!

¹⁰ Kama hing cawsaa hmiephaa hmung riypa ma i zue, Khazing hmiephaa ma? A cuo li kie cawsaa palung patluo riypa a zue kanaa ang? Ata tepa hingtana cawsaa palung patluo kha i zue tapa kieca, Khrih sii ca cuo khu'a va ang.

Paul Lucuotuv A cuona

¹¹ Uvnu hne sieta zaw, kama i phupa thuophaabie hing cawsaa'a taata cuo vyi tapa kha ica pachang sa khing yi.

¹² Tahematapakieca, hingpa thuophaabie hing cawsaa'a taata i hmungpa cuo li pata cawsaa ta ina changpa yi zaw cuo vyi. Cuorasala Zingsuv Khrih ta a phupa bie thueta i hmungpa tana a cuo.

¹³ Judah phung chunglie i za hringzya kha ina pachangpasie ungciy. Khazing khrihsaabuv kha khuopuv ta za hrisaathierue ang te para riypata i zaa zue.

¹⁴ I phangbuo khuvhyi hrawlie ta Judah phung luo zaa pi vie ang te, ma mingchingmingvuo tie phungluo kha karuo awsa pata i zaa daakhyi.

¹⁵ Cuorasala i puv hluo baataata naa tlaw te a vihnyina ta naa upa Khazing ta,

¹⁶ a Saacapaa thuophaapa kha Jentail ming'a luo i phu riypata, a Saacapaa kha kama'a luo palung tluosa pata a za paluo sa tiyta, ahunghmuo ruena ca hie vayi ang.

¹⁷ Kama hluo ta lucuotuv zaa cuo tlipa tie a taw riypa zaw ta Jerusalem luo khaw va ang. Cuorasala Arabia ruo luo kha a catli pata si ang te, cakhutaa cata Damaskas luo i za kaa.

¹⁸ Kung thung khu taata Piter parie riypata Jerusalem luo khaw ang te ama'a lie ning hraa hlyipangaa i aw.

¹⁹ Abyipa nuta Jeim ri li pata lucuotuv hrangpa ahunghmuo a taw vayi ang.

²⁰ Hinghaahingta i vya capepa hing Khazing hmielie hang va ang.

²¹ Cakhutaacata, Siria hne Silisia pe luo kha si ang te,

²² capa tepa cata Judea pe lie a awpa khrihsaabuv tie ta na pachang valie yi.

²³ “Kiema malie zaa hrisaathierue tuvpa khana para a zaa zuepa zangna kaw kha a phu nguoluo,” tapa dyi kha za thyi yite,

²⁴ kama kawlie kha Khazing ama pathuosa.