Efesaa 6 - Lautu New Testament

Saata Hne Nung Hne Paa Kaw

¹ Saata zaw Abyipa ming ta nama nung hne nama paa ri kha a ngie tie ung. Tahematapakieca hmang phapa tana a cuo.

² “Na nung hne na paa kha pa-uvsathyi tie yi,” tapa ca nawbie taapa ta cuote,

³ biekuopuopa ca, “Na cuota pha'a te chuelyi lie na hring a pasiy aa,” tapata a cuo.

⁴ Paa zaw, nama saata zaw kha ama hihaa riypata tue kha ung, cuorasala Abyipa pasiypa-yana hne zyazaa haata palethaw sa tie ung.

Sii Hne Ziy

⁵ Sii zaw, Khrih ri kha namaa ngie pahaata nama ziy tie kha ciyzaana hne pathiypalung hmisi ta ama ri a ngie tie ung.

⁶ Iema palung patluo riypata, aca hmungna lie dyi yi cuo li pata, Khrih sii nama cuona haakhata nama pathiypalung hmisi ta Khazing khingna kha tue tie ung.

⁷ Re nama hrie tiyta cawsaa huona ma hrie tapata rue li pata Abyipa huotana ma hrie tapata rue ungla thaathusa pata hrie tie ung.

⁸ Sii ta ma cuo zaw, hyazangpa ma cuo zaw, ma tuepa phana hne aa lupa lawmuo na ma hmung aa tapa kha pachang tie ung.

⁹ Niema ziy tie zaw cahaa cata nama sii tie cunglie kha tue ra tie ung. Pachiypahuo kha ung, tahematapakieca, niema hne nama sii tie zaw vuoruo lie aa lupa Ziy pakha dyi nama hnyi pakha nama pachang, ama'a lieca pahlyipalena aw vyi.

Khazing Rieduna Cehre Tling

¹⁰ A hnangcawce ta, Abyipa thueta hne a cahrana thaazuo thueta a cahra sa tie ung.

¹¹ Setaa dungna kha namaa du khuna riypata Khazing rieduna cehre kha a tlingpa ta a hryi tie ung.

¹² Tahematapakieca maa dupa carie hing cawsaapa cuo li pata, uvtuv tie, nawhnyituv tie, a zingpa chuelyi cahrana hne avuo lie a awpa thlaapa chiepa cahrana zaw ta ama cuo.

¹³ Cacuonakawta, ning pha lipa aa vaw tiyta namaa daapahrang khu riypa hne a tlungna te ta a cusa pata namaa daapahrang khuna riypata Khazing cehre kha a tlingpa ta a hryi tie ung.

¹⁴ Cacuonakawta, a daa ungla biehmisipa kha tesaw haata nama se lie a saw ungla, a dangna kha cacunghnaapakaw haata a hryi tie ung.

¹⁵ Nama phyipakaw cuota diena thuophaabie ri khingna thaathuna kha a pakaw tie ung.

¹⁶ Capa bangkhuo hne cata, zangna kha phya haata a cyi ungla, capa cata a pha lipapaa ta a vya kapa myi haata a iepa cuoti zaw kha nama pache khu aa.

¹⁷ Khuona kha thaalakhuv haata a khuv ungla Thlaapa zueziy ta a cuopa Khazing bie kha a cyi tie ung.

¹⁸ Thlaachuona hne ahiena kha Thlaapa luochiyna hneta cipari tue tie ung. A chuona te khata apahlu-apadasa pata aw ungla mingpathepa tie cuo khata palung pasiysa pata thlaa chuo tie ung.

¹⁹ Kama zaw bie i ri tiyta, thuophaabie pipa i cuo riypa hne thuophaabie bieparuv kha riephasa pata a pachang sa khutuv i cuo riypata thlaa na chuopa tie ung.

²⁰ Capa repa catana luosituv ca cuo ang te thaw chunglie i aw. I ri riypata a cuopa haata riephasa pata i ri khuna riypata thlaa na chuopa tie ung.

Pakha Cyicuo Kaw Hne Thluechiy Pina

²¹ Taikhikas ta niema kha aca chang diy'a nakaw yi ta tuokhaata aw ang te ma, khaapa hmang i tue nguoluo tapa kha nama pachang aa. Ama ca ma duepa hne Abyipa re lieta zangtluo aa tlapa ma uvnu tana a cuo.

²² Tuokhaatama ma aw tapa kha pachang sa riypa hne niema thaazuo pi riypa tingna cangta ivya pathliepa tana a cuo.

²³ Paa Khazing hne Abyipa Zingsuv Khrih'a taata diena, zangna hne duena ca zangtuv nama bangkhuo cunglie aw mangsue.

²⁴ Ima Byipaapa Zingsuv Khrih kha a lang buo lipa duena ta a duepa nama bangkhuo cunglie Khazing vihnyina aw mangsue.