Efesaa 3 - Lautu New Testament

Jentail Ming'a Luo Paul Rehriena

¹ Cata a cuo nakawtana kama Paul ca niema Jentail ming cuota Khrih Zingsuv ming ta thaw a tlapa i cuo.

² Khazing ta niema cuota hingpa re hrie riypa hing a vihnyina thueta ina pipa tana a cuo tapa kha nama pachang diy thluo tli aa.

³ Khazing ta tuokhaatama biephu hmuo pata a bieparuv kha ina pachang sa tapa a cunglie a cawta i cape mangtli.

⁴ Capa i capepa ca nama ri kieca Khrih bieparuv i pachangna kaw kha nama pachang aa.

⁵ Ahluo ta ca hing bieparuv hing cawsaa kha za pachang sa vayi. Cuorasala ata hing ca a pathepa ama lucuotuv tie hne profet tie'a lie kha Thlaapa ta a phu mangtli.

⁶ Capa bieparuv ca: Thuophaabie thueta Jentail ming ca Judah ming hneta ru a cu hnepa, pangkha chunglie chebuo, hne Khrih Zingsuv thueta tuepa biekuona thluechiy a hmung ra riypatana ama cuo.

⁷ Thuophaabie rehrietuv i cuopa ca Khazing vihnyina lasaw cuote, Khazing ta a cahrana ta a hriepa re lie hing vihnyina ta ina pipa tana a cuo.

⁸ Kama ca mingpathepa tie hrawlie a cawcepa laata a caw viepa i cuo raalaa pata Khrih hnyirungna a chuo khu lipa thuophaabie ca Jentail ming'a luo ri riypata vihnyina ta ina pi.

⁹ Hmangting a satuv Khazing chunglie chuo hluvpuv za nupa bieparuv kha cawsaa bangkhuo pahmung sa riypata a cuo.

¹⁰ Cata a tuepa ca vuoruo lie a awpa uvtuv tie hne nawhnyituv tie ta Khazing singna phangting zawdya kha Khrihsaabuv thueta ama vya pachangna riypata a cuo.

¹¹ Capaca, chuozaa ta a zaa tingpa haakhata Khazing ta ima Byipaapa Khrih Zingsuv thueta a patlingsapa tana a cuo.

¹² Ama thue hne ama ma zangna thueta Khazing'a luo kha riephasapa hne a nguosa pata a ngie khuna ma hnyi.

¹³ Cacuonakawta niema cuota i angpa ruvnaana nakaw hingta nama palung chuo kha se tapata thlaa i chuo; niema cuota phana selaw tana a cuo.

Caa A Rituv Tie Cuota Thlaachuona

¹⁴ Hingpa kawlie hingta ma Paa hmielie pakhuv pane pata thlaa i chuo.

¹⁵ Ama ca vuoruo hne alyi lie a awpa ingchungkhue bangkhuo ta ama ming ama lanapa hruo tana a cuo.

¹⁶ Abyipa ca rungnaa lesyina hne a bipa haata, nama chung luo cawsaa cuona kha a Thlaapa ta thaazuo aca pi riypa yita thlaa i chuo.

¹⁷ Niema ca duena chunglie ta a hruo thlapa hne bangpa nama cuopa haata nama zangna thueta Khrih ca nama pathiypalung lie aw mangsue.

¹⁸ Mingpathepa tie hne khata Khrih duena a ku zya hne a syi zya, aa suo zya hne aa thuv zya pachang khunapa nama hnyi riypata thlaa i chuo.

¹⁹ Cakhutaata pachangna laata a tling viepa Khrih duena kha pachang'a ung cate Khazing tluotlingna hneta nama bi riypata thlaa i chuo.

²⁰ Ma chunglie a cahrana ta re a hrietuv taca maa hie thepa hne ma rue thepa laata hmuo ale ta hmang a tue khu.

²¹ Khazing ca khrihsaabuv chunglie, Khrih Zingsuv thueta chuozaa taa chuozaa te a ming rungnaa pata aw mangsue. Amen.