Ñwaè' Kuu Buu Ce Vi Be Keè Koni 9 - Limbum New Testament

¹ Ncìndap Nyʉ̀ embenjì mo à fyɛp rsòŋ li. E ka' fyɛp, mɛ̀ yɛ rkàŋsì àmbò li sùu embe bùu a gwe à nshè. A fa bki ce rkàŋsì anà li bo mʉ̀' cùu rwee àgho. Rwee anà li m coomi sê, lʉ̀simbùu à ba àgho ka'.

² Rkàŋsì anà li ka' mʉ̀' rwee anà, njemor yi fʉʉ enjo àmbò nje efa mor fòo wa'a. Njemor anà yi ka' fʉʉ wa'a, a cete rbuu wɛɛwɛ, rlir nyʉ̀ li ke' ker yɛɛti ka'.

³ Mŋguu vi fʉʉ embe mʉ̀ njemor anà a suu njep ŋgòŋ. A m fa mŋguu anà ŋger enɛ vi tashi bèe àmbò nyobsaa enjep ŋgòŋ na wa'a.

⁴ A m làa nè mŋguu ca enɛ vi fa jòo yuu ce yi fʉʉ enjep nshè a ce kù' ka'. A m mà'shi enɛ vi fa ŋgɛ' ba nè bèe ce a m buu ncòo Nyʉ̀ nje nsàpsi.

⁵ A m mà'shi enɛ mŋguu vi yʉ bèe ca ka'. A m làa enɛ vi fa bèe ca ba ŋgɛ' à mŋwɛɛ tâ. Ŋgɛ' anà à m ba àmbò njɛ̀ɛ ryaŋ ce ŋwɛ̀ ce nyobsaa à ta e ke yu' nà.

⁶ Be ba à mŋwɛɛ ta anà tɛ wowèe a roo rkwe, yɛ ka'. Wowèe a be kòŋ à rkwe tɛ rkwe li tɛɛ wowèe.

⁷ Mŋguu anà vi m ba àmbò mnyàabàrà' ce a ba'shi tɛ a bo dù bìr àgho wa'a. Mtaa ce mŋguu anà vi m sòp mi feesè mtaa kʉʉ ce a gèe nè gûl. Wap bsii vi m feese bsii ŋwɛ̀.

⁸ Yap nyʉ̀'tu yi m feese nyʉ̀'tu njeŋwɛ̀; map msòŋ mi feesè msòŋ bʉrʉ̀'.

⁹ A m cete yàp ŋgùŋ nè bco' ce ŋgǎa mà' bìr a ke cete ŋgùŋ àgho, wap bbàp vi ce còo àmbò njɛ̀ɛ mutù mntaaŋguu ce ŋgǎa mà' bìr a ke dù bìr cu mbo, mnyàabàrà' vi ce sʉ̀ŋ nà.

¹⁰ Vi m tʉr mŋkùŋ àmbò mŋkùŋ nyobsaa wa'a. Vi m tashi bèe nè mŋkùŋ anà, a fa wowèe ŋgɛ' àgho à mŋwɛɛ tâ.

¹¹ Ŋkʉʉ ce e ce sa' wowèe yu ncìndap mbembep ce e ce sa' njep rwee ce lʉ̀simbùu yu àgho ka' nà. A too li rlii à li Hibrù enɛ Àbadòn, too à li Grěk enɛ Àpolìyòn; mbùu efa gho à ba enɛ̂, “Ŋwɛ̀ rbepsì.”

¹² Cena a ŋgɛ' entombì efa mŋgɛ' ce vi be koni. Mŋgɛ' ce vi bii ka' koni vi bɛti vi bbaa.

¹³ Ncìndap Nyʉ̀ embenjì mo à fyɛp rsòŋ li. E ka' fyɛp, mɛ̀ yu' njèndoŋ àmbò e vʉ̌ à mmbur kyèe embe dì' rfa ce a m gèe nè gûl, yi tɛɛ kùntombì nè Nyʉ̀ nà.

¹⁴ Njèndoŋ anà à laa nè ncìndap Nyʉ̀ ce e m tʉr rsòŋ nà enɛ̂, “Bà'shi nè bcìndap bbebep ce a m kur a lɛ àwǎa rò ce a too enɛ Yufrɛtìs nà efa bkʉ̀.”

¹⁵ Njèndoŋ anà à ka' làa wa'a, a ba'shì wowèe efa bkʉ̀ tɛ wowèe a bo yʉ ŋgʉ̀' mò'sir efa ŋgʉ̀' taar efa bèe enjep ŋgòŋ. A m kur bcìndap bbebep ce a m ba kyèe na a lɛ wa'a, wowèe a ce kè' ba nfě' à nòŋ anà, embe ŋwɛɛ anà, embe fè' anà tɛ a bo gèe lap rfà' à nfè' anà.

¹⁶ Mɛ̀ m yɛ yap ŋgǎa mà' bìr ce a ke mà' bìr yàp cu ba mbe mnyàabàrà'. A m suŋ mɛ̀ enɛ wowèe a yu malàr mjěe mmbaa.

¹⁷ Mɛ̀ yɛ mnyàabàrà' anà a yɛ àmbò bèe ce a m ce caŋ mbo a m ba. Wowèe a m yar bco' bbɛ̀bɛr nje ŋgùŋ. Bco' anà vi m ce bàŋ àmbò mor wa'a, a ce sii àmbò ncòororò, a ce bàŋ àmbò cwa wa'a. Btù' mnyàabàrà' anà vi m ba àmbò btù' bʉrʉ̀' wa'a. Mor ba njemor ba rʉ̀ʉ mkàŋ yi m ce fʉʉ ekù cùu mnyàabàrà' anà.

¹⁸ Ŋgɛ' mor, ba ŋgɛ' njemor, ba ŋgɛ' rʉ̀ʉ mkàŋ ce yi m fʉʉ ekù cùu mnyàabàrà' ca nà à m yʉ ŋgʉ̀' mò'sir efa ŋgʉ̀' taar efa bèe enjep ŋgòŋ.

¹⁹ Ŋger mnyàabàrà' anà yi m ba ku wǎp cùu, a ker ba à wap mŋkùŋ. Wap mŋkùŋ vi m ba àmbò mnyo, a tʉr btù'. Vi tashì bèe ba nè mŋkùŋ anà.

²⁰ Bɛr bèe ce ŋgɛ' ca a m yʉshi wowèe ka' nà a m kupse yap ntee a borni efa rgèe buu bbebep ka'. Wowèe a m ku ce gʉ'shi nè byʉ' mnyʉ̌mkà', ker ba mnyʉ̀ enjep ŋgòŋ na ce a m kupshi ba nè mmbo. A m kupshi mnyʉ̀ anà ba nè bco' àmbò gul ba selvà, ba brôn. A ker kupshi mmo' ba nè blùr, ba mntaaŋguu. Àde' mnyʉ̀ anà vi yɛ buu, kɛ̀ yu' buu, kɛ̀ jɛr ka'.

²¹ Wowèe a m kani efa kupse yap ntee, borni yàp buu bbebep. Wowèe a m ku ce yʉshi bèe, a ce gèe tʉ', a ce sàki, a ce yɛ̀ɛ.