Ñwaè' Kuu Buu Ce Vi Be Keè Koni 8 - Limbum New Testament

¹ Cena yi ka' mì, Muu Njèe à naa nlàadoŋ yì elʉ̀simbùu efa vǐ sàamba cà. E ka' nàa, ŋgòŋ embe bùu yi noŋ enɛ nyòŋ-ŋ-ŋ, yuu yi ce kàra' ka' à mʉ nfè' mò'.

² Mɛ̀ yɛ bcìndap Nyʉ̀ sàamba ce a ke tɛɛ kùntombì nè Nyʉ̀. A m fa wowèe msòŋ sàambâ.

³ Ncìndap Nyʉ̀ mǒ' jɛɛ à vʉ a tɛɛ mbe dì' ce a ke fa rfa nè Nyʉ̀, a tʉr rkǐŋ ntòo nrɛ̀ɛ ce a m gèe nè gûl. A lor ku' nrɛ̀ɛ a fa ye, ye ye à lor nrɛ̀ɛ anà a fiŋshi à mʉ̀ mloo ce bèe Nyʉ̀ a ce loo, a fa nè Nyʉ̀ mbe dì' rfa ce a gèe nè gûl, yi ba kùntombì nè kàbàrà'.

⁴ E too nrɛ̀ɛ anà, nje efa gho yi natì a mloo àbee embà bo ncìndap Nyʉ̀, a ko' kùntombì nè Nyʉ̀.

⁵ Ncìndap Nyʉ̀ anà à koo mor embe dì' ce a ke fa rfa, a lɛ njep rkìŋ anà a ma' njep ŋgòŋ. E ka' mà', mbèŋ à rʉʉŋgèr, a bapŋger, a waŋger, nshe à ci'tì.

⁶ Cena yi ka' mì, bcìndap Nyʉ̀ sàamba ce a m tʉr msòŋ sàamba nà a tamì nyor à rfyɛp msòŋ anà.

⁷ Ncìndap Nyʉ̀ yì entombì a fyɛp rsòŋ li. E ka' fyɛp, a lor mghòo ba mor ba blɛɛ, a tarshi a ma' njep nshè. Ŋgʉ̀' mò'sir efa ŋgʉ̀' taar efa nshè à shê. Ŋgʉ̀' mò'sir efa ŋgʉ̀' taar efa bce à she foŋ, mjɛɛ mi she wɛɛwɛ.

⁸ Ncìndap Nyʉ̀ yì embenjì à fyɛp rsòŋ li. E ka' fyɛp, a lor yuu mo' ce yi m ce she a feese ma rtùu, a ma' njep rdip rgòr.

⁹ A ka' mà', ŋgʉ̀' mò'sir efa ŋgʉ̀' taar efa rdip anà à beeŋgèr à blɛɛ. Ŋgʉ̀' mò'sir efa ŋgʉ̀' taar efa buu btèe enjep rò vi kweŋgèr wɛɛwɛ. Ŋgʉ̀' mò'sir efa ŋgʉ̀' taar efa bkeŋ enjep rò vi bep wɛɛwɛ.

¹⁰ Ncìndap Nyʉ̀ embenjì mo à fyɛp rsòŋ li. E ka' fyɛp, ma rkàŋsì ce li m ce kɛti àmbò rsùsùŋ wa'a, li gwe embe bùu. Li m gwè mbendù ŋgʉ̀' mò'sir efa ŋgʉ̀' taar efa mdip ker ba fàdì' mdip mi ke fʉʉ.

¹¹ Rlii rkàŋsì anà li m ba enɛ̂, “Ŋgʉ̀ cece'.” Rkàŋsì anà li m gèe ŋgʉ̀' mò'sir efa ŋgʉ̀' taar efa mdip mi ce'. Bèe magòr a m no mdip anà a kweŋger njobè' mi m ce ce'.

¹² Ncìndap Nyʉ̀ embenjì mo à fyɛp rsòŋ li. E ka' fyɛp, yuu mo' yi kuu nyʉ̀, ŋgʉ̀' mò'sir efa ŋgʉ̀' taar efa gho à sii, a ke' ker saŋ ka', a kuu ŋwɛɛ, ŋgʉ̀' mò'sir efa ŋgʉ̀' taar efa gho à sii, a ke' ker saŋ ka', a kuu mkàŋsì, ŋgʉ̀' mò'sir efa ŋgʉ̀' taar efa gho à sii, a ke' ker raa ka'. Ŋgʉ̀' mò'sir efa ŋgʉ̀' taar e nèmootì ba ŋgʉ̀' mò'sir efa ŋgʉ̀' taar e nètʉ' a ke' ker raa ka'.

¹³ Mɛ̀ ka' fyɛ' a yɛ wàawa mŋkùr àmbò e ce fɛŋ mbe bùu. E ka' ce fɛŋ wa'a, a waa enɛ̂, “Ŋgɛ', ŋgɛ', ŋgɛ'.” Bcìndap Nyʉ̀ ce a bɛti a taar nà a be lò fyɛp msòŋ map tɛ yi ba bebep nè bèe ce a ce cu njep ŋgòŋ.