Ñwaè' Kuu Buu Ce Vi Be Keè Koni 7 - Limbum New Testament

¹ Cena yi ka' mì, mɛ̀ yɛ bcìndap Nyʉ̀ vi kyèe àmbò a tɛɛte à mmbuu ŋgòŋ kyèe. A m tɛɛ wa'a, a cete fu' ce yi ke vʉ̌ à mmbuu ŋgòŋ anà, fà dì' yi bo kèr ce càa ka'. Fu' yi m ker caa mbendù nshe kɛ̀ mbendù mdip enjep rò ka', a ker ce cì' bce foŋ ka'.

² Mɛ̀ yɛ ncìndap Nyʉ̀ mò' àmbò e nyɛɛ ekù mbùuntii, a tʉr rkɛ̀ɛ Nyʉ̀ ce e yu ntèe. À m ba rkɛ̀ɛ ce a ke fa ncòo bèe Nyʉ̀ àgho. E m fuŋ bcìndap Nyʉ̀ ce a m ba bèe ŋkyèe, ce Nyʉ̀ à m fa wowèe ŋger enɛ a bepsi bǔu à nshè ba buu enjep rò nà.

³ E m làa nè wowèe enɛ̂, “Wèe fa bepsi nshe kɛ̀ mdip, kɛ̀ bce ka', caar tɛ wèr fa mncòo à mnsàpsi bèe ce a ce fà' nè yèr Nyʉ̀.”

⁴ Mɛ̀ yu' mɛnɛ bèe ce a m fa wowèe ncòo nje nsàpsi nà a m ba ncʉ̀kì-rjèe-nè-ncʉ̀kì-ncòp-kyèe-à-mŋkyèe. Bèe ca a m ba bèe efa mntɛ̀' bèe Isrɛ̀l wɛɛwɛ.

⁵ Bèe embe ntɛ̀' mò'sir ce a m fa wowèe ncòo anà a m ba ncʉ̀kì-ncòp-baa-à-rrʉ̀ʉ. Mntɛ̀' anà vi m ba à njɛ̀ɛ enɛ̂: ntɛ̀' Judà, ntɛ̀' Rubɛ̀n, ntɛ̀' Gâd,

⁶ ntɛ̀' Ashà, ntɛ̀' Naptalè, ntɛ̀' Mànasìs,

⁷ ntɛ̀' Simìyòn, ntɛ̀' Lɛvì, ntɛ̀' Esakà,

⁸ ntɛ̀' Sɛbulòn, ntɛ̀' Josɛ̀f ba ntɛ̀' Bɛnjamɛ̀n.

⁹ Mɛ̀ ka' kèr fyɛ' a yɛ ku' bèe ce àde' ŋwɛ̀ be' ka'. Bèe anà à m ba bèe efa bto' jɛɛ jɛ̀ɛ jɛɛ, ba mntɛ̀' jɛɛ jɛ̀ɛ jɛɛ, ce a m ce làa bli jɛɛ jɛ̀ɛ jɛɛ enjep ŋgòŋ na wɛɛ. Wowèe a m tɛɛ kùntombì nè kàbàrà' ba Muu Njèe, a yar bcɛ̌' bbʉʉ, a tʉr bbàp mtɛɛ à mmbò.

¹⁰ Wowèe wɛɛwɛ a ce yòp mbekì a ce làa enɛ̂, “Rlùŋ li lò ese Nyʉ̀ ce e cu mbe kàbàrà', ker ba ese Muu Njèe.”

¹¹ Bcìndap Nyʉ̀ wowo a m sìr kàbàrà', ba běe bgòrgòr, ba buu btèe ce vi m ba kyèe nàè, a kaari a tarte. A ka' sìr, a gʉ'shi nè Nyʉ̀,

¹² a ce làa enɛ̂, “Yi yu wa'a. Nyʉ̀ a ŋwɛ̀ ce bèe a ba yòŋshi, kù'si. E yu ŋwɛ̀ ce e tʉr bfee wɛɛwɛ. Bèe a ba yòŋshi ye à nfè' wɛɛwɛ, yu'ni nè ye, kèr rìŋ enɛ e tʉr ŋger wɛɛwɛ. Yi yu wa'a.”

¹³ Mò' efa běe bgòrgòr ca à bipshì nè mɛ̀ enɛ̂, “Wɛ̀ rìŋ njɛ̀ɛ bèe ce a yar bcɛ̌' bbʉʉ na a? Wowèe a vʉ̀ efɛ?”

¹⁴ Mɛ̀ beesì a laa nè ye mɛnɛ̂, “Masà, ŋwɛ̀ ce e rìŋ yu ba wɛ̀.” E laa nè mɛ̀ enɛ̂, “Bèe ca yu bèe ce a fʉʉ efa ku' ŋgɛ' ce e càa ŋger. Wowèe a sù'si wap bcɛ̀' nè blɛɛ Muu Njèe, vi ce fʉp.

¹⁵ A mbùu ce wowèe a tʉr ŋger à rtɛɛ kùntombì nè kàbàrà' Nyʉ̀, ce fà' nè ye mbe yě ndàp nètʉ' ba nèmootì. Ŋwɛ̀ ce e cu mbe kàbàrà' be ba a wowèe, sʉ̀ti wowèe fà dì' yuu mo' yi bo jòo wowèe ka'.

¹⁶ Njè be kèr yaŋ wowèe ka'. Ntee mdip yi be kèr lùu wowèe ka'. Nyʉ̀ ce e ke saŋ na be tòo wowèe ka'.

¹⁷ Muu Njèe ce e yu àgee kàbàrà' be cìŋ wowèe àmbò gày wa'a. E be lòr wowèe dù àgho fà rdip ce li ke fʉʉ à nfè' wɛɛwɛ ce fa ryòŋ ce nfesè. Nyʉ̀ be siŋsi mŋgoommir ese wowèe wɛɛwɛ.”