Ñwaè' Kuu Buu Ce Vi Be Keè Koni 6 - Limbum New Testament

¹ Mɛ̀ ka' kè' a yɛ àmbò muu njèe à nàa nlàadoŋ yì entòmbì efa mʉ̀ vǐ sàambâ. E ka' nàa, mɛ̀ yu' àmbò mò' efa buu btèe ce vi m ba kyèe nà à làa, njèndoŋ à rʉʉŋgèr àmbò mbèŋ wa'a, a laa enɛ̂, “Vʉ̀!”

² Mɛ̀ fyɛ' a yɛ nyàabàrǎ' mbʉʉ. Ŋwɛ̀ ce e m cu mbe ndù mo à tʉr ŋgʉʉ mbà bò. A m fa ye rtaa ce a ke fa nè bèe ce a mà' bìr a so nà. E caŋ mbe nyàabàrà' anà a ce mà' bìr tɛ e bo kèr so.

³ Muu jèe ca à ka' kèr nàa nlàadoŋ yì embenjì, mɛ̀ yu' àmbò yuu tèe mo' yi làa enɛ̂, “Vʉ̀!”

⁴ Mɛ̀ yɛ àmbò nyàabàrǎ' mbeer à vʉ̀. A m fa ŋwɛ̀ ce e m cu mbe nyàabàrà' anà ŋger enɛ e gee tɛ cumʉnyaŋ mi enjep ŋgòŋ na tɛ bèe a bo ce yʉshi wap mnyor. A m fa ye ma kàafà'.

⁵ Muu Njèe ca à ka' kèr nàa nlàadoŋ mo', mɛ̀ yu' àmbò yuu tèe mo' yi làa enɛ̂, “Vʉ̀!” Mɛ̀ ker fyɛ' a yɛ nyàabàrǎ' nsii. Ŋwɛ̀ ce e m cu mbo à m tʉr ndoŋ ce a ke fè' buu njo mbà bo.

⁶ Mɛ̀ yu' yuu mo' yi fʉʉ e mbetar buu btèe anà àmbò njèndoŋ wa'a, a laa enɛ̂, “Bèe a be lòr mbàa ce a fà' à nòŋ, yuu ndoŋ sàa àgho mò'sir, buwa'làr a yuu mndoŋ msaŋ vi btaar. Fa bepsi mgʉr ba mrù' ka'.”

⁷ Muu Njèe ca à ka' nàa nlàadoŋ mò', mɛ̀ yu' àmbò njèndoŋ yuu tèe mo' à làa enɛ̂, “Vʉ̀!”

⁸ Mɛ̀ ka' kè' a yɛ nyàabàrà', ncòo efa gho à ba jìpri. A m ce too rlii ŋwɛ̀ ce e m cu mbo enɛ Rkwe. Ŋwɛ̀ ce a m ce too enɛ Mbà Yir à ce vʉ̀ mbe yě njì. A m fa wowèe ŋger mbendù ŋgʉ̀' mò'sir efa bdì' kyèe efa bèe enjep ŋgòŋ na, enɛ a yʉshi wowèe nè kàafà', gee tɛ wowèe a kwe njè, kwe byaŋ, vʉ̀ nè mnyàa efa rìŋ a wǎp mʉ.

⁹ Muu Njèe ca à ker naa nlàadoŋ mo', mɛ̀ yɛ myòŋ bèe ce a m yʉshi njo' blǎa Nyʉ̀ ce wowèe a m ce fè'shi. Myòŋ anà mi m ba njeptii dì' ce a ke taŋshi taŋshì nè nyàa, sɛɛ mbo.

¹⁰ Wowèe a waa, enɛ̂, “Wɛ̌ Tata Nyʉ̀ ce à tʉr ŋger, a ba ŋwɛ̌ mini, a ba nrara, wèr be cu mbena dù bà' à nfè' efɛ tɛ à ka' sa' bèe enjep ŋgòŋ, fa wowèe ŋgɛ' njobè' wowèe a m yʉshi wèr?”

¹¹ A lor bcɛ̌' bbʉʉ a fa wowèe e mo'sir mo'sir, a laa nè wowèe enɛ wowèe a tɛɛ nfè' mʉcàr njobè' bèe mo' efa bèe Nyʉ̀ ce a be mìsi yʉshi àmbò a m yʉshi wowèe nà a ku bɛti.

¹² Mɛ̀ ker yɛ àmbò Muu Njèe à nàa nlàadoŋ mo'. E ka' nàa, ŋgòŋ yi ci'tì sê, nyʉ̀ à sii àmbò cɛ̌' sii wa'a, ŋwɛɛ yi baŋ àmbò blɛɛ wa'a.

¹³ Mkàŋsì mi gweŋgèr à nshè àmbò piya ce fu' tatap yi ke càa ceni embe ce mber nà wa'a.

¹⁴ Rbuu li karŋgèr àmbò ŋwɛ̀ ce kar lɛ rwàa wa'a, a bʉ, mtùu wɛɛwɛ ba njɛ̀ɛ ŋgòŋ ce rdip li ke sìr kaari tarte nà, yi ci'tì a nati embe dì' yi m ba.

¹⁵ Bèe wɛɛwɛ a m caŋse a du a sʉnî. Bkʉʉ ba běe bgòrgòr, ba bèe ce a m ba btu nè bsoogɛ̀, ba ŋgǎa mbàa, ba bèe ce a m tʉr ŋger à rgèe buu, ba bkwàa ba boo a m caŋse a du a sʉni à mmbʉ̀', bèe mo' a sʉnì njeptii myɛɛ.

¹⁶ Wowèe a war a kɛ' mtùu ba myɛɛ a laa enɛ̂, “Gwè nè mbe wěr ndù, cete wèr, fà dì' ŋwɛ̀ ce e cu mbe kàbàrà' yɛ wèr, tɛ Muu Njèe bepsi ntee, fa wèr ŋgɛ' àtu yèr buu bbebep ka'.

¹⁷ Nfè' à ghɛɛ ce wowèe a be dùŋshi lap rshentee. Ŋwɛ̀ ce e be tʉr ŋger à rjà' yi tu a nda?”