Ñwaè' Kuu Buu Ce Vi Be Keè Koni 5 - Limbum New Testament

¹ Mɛ̀ yɛ fù ŋwà' mbà bo mà' ŋwɛ̀ ce e m cu mbe kàbàrà' nà. A m saŋ ŋwà' mbo mbèp bsìp, a kar àmbò a ke kar rwàa nà, a siŋ bcùu efa gho nè nlàadoŋ bdì' sàambâ.

² Mɛ̀ yɛ ncìndap Nyʉ̀ ce e m tʉr ŋger magòr sê. E m waa, a laa enɛ̂, “Ŋwɛ̀ ce e ghɛɛte à rnàa nlàadoŋ ce a sìŋ bcùu fù ŋwà' àgho nà, bʉ̀r ŋwà' anà yu nda?”

³ Ŋwɛ̀ mò' à ke' ba mbe bùu, kɛ̀ njep ŋgòŋ na, kɛ̀ mbà yir ce e m ghɛɛte à rbʉ̀r ŋwà' anà, fyɛ' mbo ka'.

⁴ Mɛ̀ war sê, njobè' ŋwɛ̀ mò' à m ghɛɛte à rbʉ̀r ŋwà' ca fyɛ' mbo ka'.

⁵ Awɛ ŋwɛ̌ ŋgòr mò' efa mʉ̀ běe bgòrgòr ca à laa nè mɛ̀ enɛ̂, “Fa war ka'. Yɛ̂, ŋwɛ̀ ce a too enɛ bʉrʉ̀' ce yu yǐ à ŋgǒŋ Judà, a ba muu rlii embe ndʉ̀' Dɛvìd nà, à so. E be nàa nlàadoŋ ce a sìŋ bcùu ŋwà' àgho bdì' sàamba nà, bʉ̀r ŋwà' anà.”

⁶ Mɛ̀ yɛ muu njèe àgee kàbàrà' ca. Buu btèe cà ba běe bgòrgòr cà a sir njèe anà a kaari a tarte. Njèe anà à m ce yɛɛti àmbò yì ce a sɛɛ wa'a. E m tʉr mndoŋ sàambâ, a tʉr mmir sàambâ. Mndoŋ ba mmir ca mi tɛɛ àtu byʉ' Nyʉ̀ ce vi yu sàambâ, a tuusì vi à bdì' wɛɛwɛ enjep ŋgòŋ na nà.

⁷ Njèe anà à du a koo ŋwà' ca embà bo mà' ŋwɛ̀ ce e m cu mbe kàbàrà' nà.

⁸ E ka' koo, buu btèe cà ba běe bgòrgòr cà a gwe njeptii njèe anà. Wowèe a m tʉr rluŋ rmo'sir rmo'sir, a ker tʉr ghee ce a gèe nè gul yi mo'sir mo'sir, mgʉr mo' ce mi m ce rʉ̀ʉ bòŋboŋ sê, mi ba njo, a tɛɛ àtu rloo bèe Nyʉ̀.

⁹ Wowèe a yop yɛɛ fi enɛ̂, “Wɛ̀ ghɛɛte à rlòr fù ŋwà', nàa nlàadoŋ ce a sìŋ bcùu efa gho àgho nà, njobè' a m sɛɛ wɛ̀, wɛ̀ lor wo blɛɛ a yuu bèe àgho nè Nyʉ̀. Wɛ̀ yuu wowèe à mntɛ̀' wɛɛwɛ, ce vi yu à bto' wɛɛwɛ a ce làa bli jɛɛ jɛ̀ɛ jɛɛ.

¹⁰ Wɛ̀ gèe wowèe a ba bèe ce à ce sa' wowèe à yàp ŋkʉʉ, a ker gee wowèe a ba ŋgǎa taŋshi taŋshì tɛ a bo fà' nè Nyʉ̀. Wowèe a be sa' bèe enjep ŋgòŋ na.”

¹¹ Mɛ̀ ker fyɛ' a yu' njèndoŋ bcìndap Nyʉ̀ ce a m ba à mncʉ̀kì à mncʉ̀kì. Bcìndap Nyʉ̀ ca a sir kàbàrà' ba buu btèe cà, ba běe bgòrgòr cà a fa mbetar,

¹² a yop se enɛ̂, “Muu Njèe ce a m sɛɛ nà à ghɛɛte à rkoni ŋger ba ku' buu ba bfee. E ghɛɛte à ŋwɛ̀ ce a ba kù'si ye, yòŋshi ye.”

¹³ Mɛ̀ yu' àmbò buu wɛɛwɛ embe bùu ce Nyʉ̀ à m gèe ba vì enjep ŋgòŋ wɛɛwɛ, ba vì embà yir wɛɛwɛ ba vì enjep rò wɛɛwɛ vi ce yòp enɛ̂, “Sèe yoŋshi Nyʉ̀ ce e cu mbe kàbàrà', ker ba muu njèe. Sèe yu'ni nè wowèe, ku'si wowèe, riŋ enɛ wowèe a tʉr ŋger wɛɛwɛ. Sèe gee wa'a nfesè.”

¹⁴ Buu btèe ce kyèe cà vi laa enɛ̂, “Yi yu wa'a.” Vi ka' làa wa'a, běe bgòrgòr cà a gʉ'shì nè wowèe.