Ñwaè' Kuu Buu Ce Vi Be Keè Koni 4 - Limbum New Testament

¹ Yì anà yi ka' mì, mɛ̀ ka' nàa mmir fyɛ' mbekì, a yɛ àmbò ncʉ̀ʉndʉ̀' embe bùu yi mʉ̀'ti. Mɛ̀ ker yu' njèndoŋ ce e m làa nè mɛ̀ a ba àmbò rsòŋ li ke làa nà. Ŋwɛ̀ anà à laa nè mɛ̀ enɛ̂, “Vʉ̀ mbena tɛ m duŋshi wɛ̀ buu ce vi bii ka' koni.”

² À ka' ba à nfè' anà mɛ̀ ba ba mbà mmbo Yʉ' Nyʉ̀. A ka' kè', a yɛ kàbàrà', ŋwɛ̀ à cu mbo.

³ Bsii ŋwɛ̀ anà vi m ce là'ŋger àmbò kwakwa' wa'a, a ce bàŋ àmbò nlòp wa'a. Ghùghumbèŋ yi m kaari kàbàrà' anà a tarte, ncòo efa gho à ba àmbò ncòo kàkar wa'a.

⁴ Bkàbàrà' mo' ce vi m ba ncòp-kyèe-à-mmbaa vi m kaari kàbàrà' ca a tarte. Běe bgòrgòr ce a m ba ncòp-kyèe-à-mmbaa a m cute mbe bkàbàrà' anà a yar bcɛ̌' bbʉʉ. Wowèe a m sòp mtaa kʉʉ ce a m gèe nè gûl.

⁵ Mɛ̀ yɛ àmbò mbèŋ ce bàpŋger a ce rʉ̀ʉŋger, a ce waŋger embe kàbàrà'. Mɛ̀ yɛ bturkaŋ sàamba àmbò vi tɛɛte kùntombì nè kàbàrà' a ce raa. Bturkaŋ anà vi tɛɛ àtu byʉ' Nyʉ̀ ce vi yu sàambâ.

⁶ Mɛ̀ ka' kè' a yɛ ma rdip mo' li ce raa, ce tose àmbò glǎs wa'a. Li m ba kùntombì nè kàbàrà'. Buu btèe vi m tɛɛ bdì' kyèe a kaari kàbàrà' anà a tarte. Buu btèe anà vi m tʉr mmir àŋgoo sê. Mmir mo' mi m ba kùntombì, mmo' mi ba mbenjì.

⁷ Efa mʉ̀ buu btèe ca, yì entombì yi m feese bʉrʉ̀'. Yì embenjì yi feesè nduu nà'. Yì embenjì yì ce e m feese nduu nà' nà à tʉr bsii vi feesè bsii ŋwɛ̀. Yì elʉ̀simbùu à ba àmbò wàawa mŋkùr ce e ce fɛŋ wa'a.

⁸ Buu btèe ce vi m ba kyèe anà vi m tʉr bbàp ntuunfu ntuunfu, mmir mi ba àgho àŋgoo sê. Mmo' mi m ba mbendù bbàp, mmo' mi ba nje mʉ̀ bbàp. Vi m ce yòp yɛɛ a ce buumi à nfè' mò' ka', kɛ̀ nètʉ' ɛ̀, kɛ̀ nèmootì ɛ̀. Vi m ce yòp enɛ̂, “Nyʉ̀ yu nrara, Nyʉ̀ yu nrara, Nyʉ̀ yu nrara, ŋger wɛɛwɛ yi yu mbà mmbo Tata Nyʉ̀. E m ba, a ba àgho sè'ni na, à ku ba ye ce e be vʉ̀.”

⁹ Buu btèe anà vi yop yɛɛ a ce kù'si a ker ce yòŋshi ŋwɛ̀ ce e m cu mbe kàbàrà', à ba ŋwɛ̀ ce e ku ba ntèe à nfè' wɛɛwɛ nà.

¹⁰ A ka' ce yòp wa'a, běe bgòrgòr ce ncòp-kyèe-à-mmbaa cà a ce gʉ'shi njeptii ŋwɛ̀ ce e cu mbe kàbàrà' a ba ntèe à nfè' wɛɛwɛ nà a ce kù'si ye. Wowèe a co'nì map mtaa kʉʉ embe tù, a lɛ njeptii ŋwɛ̀ anà, a yop yɛɛ enɛ̂,

¹¹ “Wɛ̌ yèr Tata Nyʉ̀, wɛ̀ ghɛɛte à ŋwɛ̀ ce bèe a ba kù'si wɛ̀, nɛ̀si wɛ̀, a ker ghɛɛte à rtʉr ŋger wɛɛwɛ, njobè' a wɛ̀ ce wɛ̀ m gèe buu wɛɛwɛ, a kwa'shi enɛ buu anà ba àgho.”