Ñwaè' Kuu Buu Ce Vi Be Keè Koni 3 - Limbum New Testament

¹ Ŋwɛ̀ ce mɛ̀ m yɛ nà à laa nè mɛ̀ enɛ̂, “Saŋ ŋwà' nè ncìndap embe cor à rla' Sadìs enɛ̂, ‘Cena yu blàa ce vi lò ese ŋwɛ̀ ce e tʉr Byʉ' Nyʉ̀ ce vi yu sàambâ, a ker tʉr mkàŋsì sàambâ. Mɛ̀ rìŋ ye ŋgèe. Bèe a ce lòr yap enɛ wèe yu běe btèe, geewa'a wèe à ba ba bgʉ̌ʉ bèe.

² Wèe fa buumi ka'. Lɛ' nè, tapsi ryòŋ cor ce li bɛti nà, fà dì' li ba'si kwe ka'. Mɛ̀ yɛ mɛnɛ ye ŋgèe yi ghɛɛte à bsii Nyʉ̀ ka'.

³ Banɛ wèe kuushi buu ce a yɛ'ni wèe, wèe à byemì nà. Gèe nè buu anà, ker kupse ye ntee, buwa'làr m lo bʉʉ wèe bʉ̀ʉ àmbò nyɛ̀ɛ wa'a. Wèe be rìŋ nfè' ce m be vʉ̀ ka'.

⁴ Mʉ bèe mo' a ku bii à rla' Sadìs, ce a siisi wap bcɛ̀' ka'. Bèe ca a be mà' bcɛ̌' bbʉʉ tɛ wèr wowèe ce jɛ̀r njobè' a bèe ce a ghɛɛte à rgèe wa'a.

⁵ Ŋwɛ̀ ce e ka' tɛɛ tatap, caa rmòoshì banɛ m be fa ŋgàŋ bcɛ̌' bbʉʉ à nyor, kè' siŋsi li rlii embe ŋwà' ryòŋ ka'. M be tɛɛ kùntombì nè yà Ta ba vi bcìndap, làa àwaŋ mɛnɛ ŋwɛ̀ anà yu yà.

⁶ Ŋwɛ̀ ce e ka' tʉr btù' ŋgàŋ yu' yuu ce Yʉ' Nyʉ̀ yi ce làa nè bcor wɛɛwɛ.’ ”

⁷ Ŋwɛ̀ ce mɛ̀ m yɛ nà à laa nè mɛ̀ enɛ̂, “Saŋ ŋwà' nè ncìndap embe cor à rla' Fìlàdɛlfìyà enɛ̂, ‘Cena yu blàa ce vi lò ese ŋwɛ̌ nrara, a ker ba ŋwɛ̀ mini. E tʉr bki Dɛvìd mba yě mmbò. E ka' mʉ' kèŋ, ŋwɛ̀ cetè ka', e ka' cete, ŋwɛ̀ mʉ' ka'.

⁸ Mɛ̀ rìŋ ye ŋgèe. Mɛ̀ rìŋ mɛnɛ ka' wèe tʉr ŋger gòr ka' wa'a, wèe à yu' wa blàa. Wèe à m be mɛŋni mɛ̀ à nfè' mò' ka'. Yɛ̂, mɛ̀ mʉ̀' kèŋ nè wèe, ŋwɛ̀ mò' à ba ce àde' e ker cete ka'.

⁹ Yɛ yuu ce m be gèe nè bèe ce a ce dù àmbùu Satàn a ce nya' mnde' enɛ wowèe a yu Jus nà. M be gèe tɛ wowèe a vʉ gʉ'shi njep wěe tìi, yu'ni nè wèe, tɛ wowèe a bo rìŋ enɛ mɛ̀ kòŋ wèe.

¹⁰ Wèe à yu' wa blàa a kur ntee, a tɛɛ tatap, banɛ m be kè'ni wèe à nfè' ce ŋgɛ' be vʉ̀ njep ŋgòŋ na mòoshi bèe wɛɛwɛ nà, tɛ ŋgɛ' anà bo jòo wèe ka'.

¹¹ Ku bɛti nfè' mʉcàr tɛ m vʉ̂. Tɛɛ nè tatap njep le rbyemì fà dì' ŋwɛ̀ mò' lo koo wee blà' ese wèe ka'.

¹² Ŋwɛ̀ ce e ka' tɛɛ tatap, caa rmòoshì banɛ m be gèe tɛ ŋgàŋ ba àmbò rkì wa'a, mbe ndap yà Tâ. E be ba àmbò rkì ce li be tɛɛ mbo nfesè. M be saŋ rlii yà Nyʉ̀ kèr saŋ rlii dì' ce Nyʉ̀ e ke cu ce a too enɛ Jɛ̀rusalɛ̀m ce nfi nà a yě nyòr. Jɛ̀rusalɛ̀m ca yu ba yì ce e be lò ba ese Nyʉ̀ embe bùu. M be saŋ la rlii rfi a yě nyòr foŋ.

¹³ Ŋwɛ̀ ce e ka' tʉr btù' ŋgàŋ yu' yuu ce Yʉ' Nyʉ̀ yi ce làa nè bcor wɛɛwɛ.’ ”

¹⁴ Ŋwɛ̀ ce mɛ̀ m yɛ nà à laa nè mɛ̀ enɛ̂, “Saŋ ŋwà' nè ncìndap embe cor à rla' Làodisìyà enɛ̂, ‘Cena yu blàa ce vi lò ese ŋwɛ̀ ce a too enɛ Àmɛ̀n. E yu ŋwɛ̀ mini ce e ke suŋ buu ce vi yu mini àmbò Nyʉ̀. Nyʉ̀ à m gèe buu wɛɛwɛ à lò ese ye.

¹⁵ M rìŋ ye ŋgèe. Wèe ce fʉte ka', a ke' ce lùu ka'. Mɛ̌ kòŋ mɛnɛ wèe à ka' tɛ ce lùu ka', wèe ce fʉte.

¹⁶ À ka' ba njobè' wèe ku ba ye yu ba mbe btaar, a ke' ce lùu ka', a ce fʉte ka', banɛ m be ce wèe eku mɛ̌ cùu.

¹⁷ Wèe ce làa weenɛ ryʉr li bòŋ wèe, wèe à ku' à buu, a ke' buu yuu mo' ka'. Àmbò wèe ce yɛ weenɛ wèe yu ŋgǎa ŋgɛ' ce bèe a ba koosimnse nè wèe a? Wèe yu ŋgǎa fùp, a fêp, a ker ce kar mbùuriŋ.

¹⁸ Ncep ce m ce fa nè wèe yu enɛ wèe vʉ yɛ mɛ̀, yuu gul ce a tòo mbà mor a gee e raa, tɛ wèe bo kù' à buu. Wèe vʉ yuu bcɛ̌' bbʉʉ ese mɛ̀ yar à nyòr fà dì' wèe bo kèr ce kar mbùuriŋ tɛ bèe a ce vʉ̀shi wèe ka'. Wèe vʉ yuu mcɛ̀p ese mɛ̀ fa nje mmìr tɛ wèe bo yɛ buu.

¹⁹ Bèe ce mɛ̀ kòŋ a bèe ce mɛ ke lapni wowèe, nashi wowèe. Banɛ wèe lor nfè', kupse, vʉ a mɛ̌ mbuu nè ntee e mo'sir.

²⁰ Yɛ̂, mɛ̀ tɛɛ kù ncʉ̀ʉndʉ̀' a ce kùushi kèŋ. Ŋwɛ̀ ce e ka' yu' yà njèndoŋ, mʉ' kèŋ, banɛ m be niŋ mbe yě ndàp tɛ wèr ye yeŋger àbee.

²¹ Ŋwɛ̀ ce e ka' tɛɛ tatap, caa rmòoshì banɛ m be mà'shi tɛ ŋwɛ̀ anà vʉ cu a mɛ̌ geŋ mbe mɛ̌ kàbàrà' àmbò mɛ mɛ̀ à m càa rmòoshì a cu wèr yà Ta mbe yi kàbàrà' nà.

²² Ŋwɛ̀ ce e ka' tʉr btù' ŋgàŋ yu' yuu ce Yʉ' Nyʉ̀ yi ce làa nè bcor wɛɛwɛ.’ ”