Ñwaè' Kuu Buu Ce Vi Be Keè Koni 2 - Limbum New Testament

¹ Ŋwɛ̀ ce mɛ̀ m yɛ nà à laa nè mɛ̀ enɛ̂, “Saŋ ŋwà' nè ncìndap embe cor à rla' Ɛfɛsòs enɛ̂, ‘Cena yu ba blàa ce vi lò ese ŋwɛ̀ ce e tʉr mkàŋsì sàamba mbà bo mà' a ce jɛ̀r mbe mʉ̀ mʉ btɛbùr blam ce a gèe nè gûl.

² Mɛ̀ rìŋ ye ŋgèe. Mɛ̀ rìŋ àmbò wèe à kur ntee a fa' a ke' ce sɛ̀ ka'. Mɛ̀ rìŋ mɛnɛ wèe ce mà'shi běe bbebep a wěe mʉ ka'. Wèe à fyɛ' bèe ce a ce làa enɛ wowèe a yu ŋgǎa ntuu Jisòs nà, a yɛ enɛ wowèe a ce bo'shi bo'shi.

³ Wèe à kur ntee a yɛ ŋgɛ' njo' mɛ̀, a ke' sɛ ka'.

⁴ Ka' yi yu wa'a, m be suŋ wèe fàa mò' ce wèe à gèe. Wèe ker koŋ mɛ̀ àmbò wèe à m kòŋ ka'.

⁵ Kuushi nè njɛ̀ɛ njì ce wèe à m kòŋ mɛ̀ nà, kupse, ma' yè buu bbebep, ce gee ba ŋgèe ce wèe à m ce gèe entombì. Wèe à ka' tɛ kupse ka' m vʉ ca'si yè tɛbùr lam cà.

⁶ Geewa'a, wèe à gèe yuu mo' ce yi yu bòŋboŋ. Wèe à bàa buu bbebep ce bèe ce a ce dù àmbùu Nikòlàs a ce gèe. Wèe à ku baa àmbò mɛ̀ bàa foŋ.

⁷ “Ŋwɛ̀ ce e ka' tʉr btù' ŋgàŋ yu' yuu ce Yʉ' Nyʉ̀ yi ce làa nè bcor wɛɛwɛ. Ŋwɛ̀ ce e ka' tɛɛ tatap caa rmòoshì, banɛ m be mà'shi tɛ ŋgàŋ ye efa mbǎŋ ce ryòŋ ce yi yu mbe nsuu Nyʉ̀.’ ”

⁸ Ŋwɛ̀ ce mɛ̀ m yɛ nà à laa nè mɛ̀ enɛ̂, “Saŋ ŋwà' nè ncìndap embe cor à rla' Sìmainà enɛ̂, ‘Cena yu blàa ce vi lò ese ŋwɛ̀ ce e m ba entòmbì a ker ba elʉ̀simbùu. E m kwe a kʉti ntèe.

⁹ Mɛ̀ rìŋ ŋgɛ' ce wèe ce yɛ. Mɛ̀ rìŋ fùp ce e koo wèe. Yi yu mini ghup enɛ wèe yu ŋgǎa fùp ka'. Nyʉ̀ à ghòni wèe magòr sê. Mɛ̀ rìŋ buu bbebep ce bèe ce a ce lòr wap btu enɛ a wowèe Jus nà a ce làa àmbò wèe. Wowèe a yu Jus ka', a yu ba bèe ce a ce dù àmbùu Satàn.

¹⁰ Fa wɛp nè ŋgɛ' ce wèe be yɛ ka'. Yɛ̂, Satàn be mòoshi wèe. E be fa bèe mo' efa wèe mbe shaŋ tɛ a yɛ ŋgɛ' mbo à mnòŋ rʉ̂ʉ. Yi ka' ba enɛ wèe kwe njo' mɛ̀, wèe ku tɛɛ tatap tɛ m bo fa wèe rtaa ryòŋ.

¹¹ Ŋwɛ̀ ce e ka' tʉr btù' ŋgàŋ yu' yuu ce Yʉ' Nyʉ̀ yi ce làa nè bcor wɛɛwɛ. Bèe ce a ka' tɛɛ tatap caa rmòoshì, banɛ rkwe embenjì li be jòo wowèe ka'.’ ”

¹² Ŋwɛ̀ ce mɛ̀ m yɛ nà à laa nè mɛ̀ enɛ̂, “Saŋ ŋwà' nè ncìndap embe cor à rla' Pɛgamòm enɛ̂, ‘Cena yu blàa ce vi lò ese ŋwɛ̀ ce e tʉr sà' mbyɛ̀rɛŋ.

¹³ Mɛ̀ rìŋ dì' ce wèe ce cu, à dì' ce Satàn cu mbe kàbàrà'. Wèe à kani mɛ̀ efa rba yè ŋkʉʉ ka'. A m yʉ Antipàs ce e m byemi nè mɛ̀ njobè' e m suŋ bèe enɛ e ce dù a mɛ̌ mbùu. Ka' a m yʉ ye ba fàdì' wèe ce cu, à ba dì' ce Satàn ye ye ce cu wa'a, wèe à ku tʉr ntee njep mɛ̀.

¹⁴ Ka' wèe ku tʉr ntee njep mɛ̀ wa'a, wèe ce gèe buu mò', à ba buu ce mɛ̀ kòŋ ka'. Bèe mo' a yu a wěe mʉ ce a ce gèe ba buu ce Balàm à m yɛ'ni bèe enɛ a gêe. E m yɛ'ni Balàk enɛ e bo' běe à to' Isrɛ̀l tɛ a ye byee ce a fa nè mnyʉ̀ enjep ŋgòŋ na ker ce sakî.

¹⁵ Bèe mo' a yu a wěe mʉ foŋ ce a ce dù ba àmbùu ryɛ'nì li Nikòlàs.

¹⁶ Banɛ wèe kupse, ma' yè buu bbebep buwa'làr m vʉ nfè' mʉcàr sê, lor sà' mbyɛ̀rɛŋ ce m tʉr kù cùu, sèe ma' bìr.

¹⁷ Ŋwɛ̀ ce e ka' tʉr btù' ŋgàŋ yu' yuu ce Yʉ' Nyʉ̀ yi ce làa nè bcor wɛɛwɛ. Ŋwɛ̀ ce e ka' tɛɛ tatap caa rmòoshì, banɛ m be fa ye manà ce a m lòr a sʉti nà. M be fa ye lǔr mbʉʉ ce a saŋ rlii rfi mbo, à ba ba rlii ce be kù rìŋ ŋwɛ̀ ce e tʉr lùr anà.’ ”

¹⁸ Ŋwɛ̀ ce mɛ̀ m yɛ nà à laa nè mɛ̀ enɛ̂, “Saŋ ŋwà' nè ncìndap embe cor à rla' Tàitirà enɛ̂, ‘Cena yu blàa ce vi lò ese muu Nyʉ̀ ce mi mmir mi ce raa àmbò mcùŋ mor, mi mkuu mi ce là'ŋger àmbò co' ce ŋgǎa ntòo nlàa a kupshi wa'a.

¹⁹ Mɛ̀ rìŋ ye ŋgèe. Mɛ̀ rìŋ mɛnɛ wèe kòŋ mɛ̀, a riŋ mɛnɛ wèe ku tɛɛ njep le rbyemì, a riŋ rfà' ce wèe ce gèe, a riŋ mɛnɛ wèe ce kur ntee sê. Mɛ̀ rìŋ mɛnɛ ŋgèe ce wèe ce gèe sè'ni na yi bòŋ a caa yì ce wèe à m ce gèe entòmbì.

²⁰ Ka' yi yu wa'a, wèe à gèe yuu mo', à ba yuu ce mɛ̀ kòŋ ka'. Wèe à mà'shi njeŋwɛ̀ ce a ce too enɛ Jɛ̀sɛbɛ̀l nà a wěe mʉ. E ce lòr enɛ e yu ŋwɛ̀ ncep ntuu Nyʉ̀. Àmbò e ce lòr wa' nà, a ce bo' yà bèe enɛ wowèe a ce sakî, ker ce ye byee ce a fa nè mnyʉ̀ enjep ŋgòŋ na.

²¹ Mɛ̀ fa ye mʉ nfè' mò' enɛ e borni bsàkì, e kanì.

²² M be gèe tɛ e yaŋ, nòŋ mbe bkuu; tɛ bèe ce a wowèe a ce sàki a yɛ mlù sê, ce wowèe a ka' tɛ kupse, borni buu ce a njeŋwɛ̀ ca wèe a ce gèe na ka'.

²³ M be yʉshi bèe ce a ce dù a yě mbùu tɛ bcor wɛɛwɛ vi bo rìŋ enɛ m rìŋ buu ce bèe a ke kwà'shi. M be là' wèe wɛɛwɛ àmbò me mfà' mi yu.

²⁴ “‘À ka' ba àmbò bɛr běe à to' Tàitirà ce a byemi ryɛ'nì njeŋwɛ̀ anà ka', a ke' riŋ yap yu buu bbebep ce bèe a ce too enɛ a buu Satàn ce vi yu btatap se nà ka', m ker tʉr ncep mò' ce m fa nè wowèe ka'.

²⁵ Yuu ce àde' m laa yi ku ba ba enɛ wèe ku ce gee ba buu ce wèe à yɛ'ni a ce gèe nà caar tɛ m ke vʉ̀.

²⁶ Ŋwɛ̀ ce e ka' tɛɛ tatap, caa rmòoshì, ku ce gèe ba yuu ce yi bòŋ mɛ̀ caar du ba' àlʉ̀simbùu, banɛ m be fa ye ŋger mbendù bto' wɛɛwɛ,

²⁷ àmbò yà ta ye ye à fa mɛ̀ ŋger mbendù mo nà. Ŋwɛ̀ anà be lòr mbàŋ kʉʉ ce a gèe nè bco', sa' bto' anà àgho. E be bʉ'shi bto' àmbò a ke bʉ' rkìŋ li bʉ'ŋger à bsɛsɛp à bsɛsɛp nà.

²⁸ M be fa ŋwɛ̀ anà njɛ̀ɛ rkàŋsì ce a ke too enɛ mbèr nà.

²⁹ Ŋwɛ̀ ce e ka' tʉr btù' ŋgàŋ yu' yuu ce Yʉ' Nyʉ̀ yi ce làa nè bcor wɛɛwɛ.’ ”