Ñwaè' Mfaè' Ñgaâa Ntuu Jisoès 6 - Limbum New Testament

¹ À m ba à mnòŋ ca ce ŋgoo ŋgǎa yɛ'ni buu Jisòs à m ce kù', bèe ce a m ce làa li Grěk a m làaŋger a kuu bèe ce a m ce làa li Hibrù njobè' a m ce gàpshi buu nè bèe à mnòŋ wɛɛwɛ, a ce fa byepkʉʉ wap ka'.

² Bèe ce ncòp-baa-à-rrʉ̀ʉ a kɛ' ŋgǎa yɛ'ni buu Jisòs, a laa nè wowèe enɛ̂, “Yi yu yɛɛnì enɛ wèr borni efa rfè'shi blǎa Nyʉ̀ ce gàpshi ba buu nè bèe ka'.

³ Bfʉr wêr, banɛ wèe fʉr mmbaŋrù sàambâ, efa wěe mʉ ce yap ŋgèe yi yu yɛɛnì, wowèe a ruusì nè Yʉ' Rara, a ker riŋ buu, tɛ wèr bo fa rfà' ca mbe wǎp mmbò,

⁴ lòr yèr nfè' ce gèe rloo, kèr ce fè'shi blǎa Nyʉ̀.”

⁵ Yuu ce a m làa, yi m bòŋ bèe wɛɛwɛ, wowèe a ce Stɛfàn ce e m byemi sê, a ker ruusi nè Yʉ' Rara, ba Felêp, ba Pukorùs, ba Nikanò, ba Timʉ̀n, ba Pɛmɛnàs, ba Nikòlàs ŋwɛ̌ à rla' Antìyòk, ce e m lò a byemi nè Nyʉ̀ bèe Jûs.

⁶ Wowèe a m lòr bèe ca a tɛr njeptii ŋgǎa ntuu, wowèe a loo, a lɛ map mmbo mbe wǎp ndù.

⁷ Blǎa Nyʉ̀ vi m dù kùntombì, ŋgoo bèe ce a m ce dù àmbùu Jisòs à rla' Jɛ̀rusalɛ̀m à ku' sê. Ŋgǎa taŋshi taŋshì ce a m yu' blǎa rbyemì ca a byemi, a m ba gòr.

⁸ Stɛfàn à m tʉr rbǒŋ Nyʉ̀ ba ŋger Nyʉ̀ sê, a gee buu bghagha' ba buu bbɛ̀ɛ à mʉ̀ bèe.

⁹ Yi ka' ba wa'a, bèe mo' ce a m ba bèe embe ndap rloo ce a m ce too enɛ ndap rloo bèe ce a bii fà' bkwàa ka', ce à m ba běe à rla' Sàiren ba à rla' Àlɛ̀ksandà ker ba běe à ŋgǒŋ Sìlesìyà ba Ɛshà a m ce sɛr mnsɛr a Stɛfàn wèe.

¹⁰ Yap ŋger mnsɛr à Stɛfàn wèe yi m sɛ̀ njobè' Stɛfàn à m ce làa ba nè bfee ba ŋger Yʉ' Rara ce Nyʉ̀ à m fa ye.

¹¹ Wowèe a du embenjì a cepshi bèe mo' enɛ wowèe a nya' mnde' mbe tu Stɛfàn. Wowèe a kɛ' a laa enɛ̂, “Wèr à yu' àmbò e ce nya' mnde' a ce bepsi rlii Musìs ba Nyʉ̀.”

¹² Ca yi m gèe mntee bèe ba mntee bleebèe ba mntee ŋgǎa yɛ'ni bèe mncir, vi yɛɛŋgèr, wowèe a vʉ mbendù Stɛfàn, a koo ye a du àgho mbe kansùr.

¹³ A ka' dù àgho, a vʉ nè bèe enɛ a vʉ tɛɛ njìnsa' mnàŋ, laa enɛ̂, “Ŋwɛ̀ ca à be buu efa rlàa yuu bebep àmbò dǐ' rara ca ba mncir Musìs ka'.

¹⁴ Wèr a yu' àmbò e ce làa enɛ Jisòs ce à rla' Nasarɛ̀t be sà'si dì' ca kèr kupse ndèe to' ce Musìs à m fa nè sèe.”

¹⁵ Bèe wɛɛwɛ embe kansùr a ka' fyɛ' bsii Stɛfàn, a yɛ vi ba àmbò bsii ncìndap Nyʉ̀ wa'a.