Ñwaè' Timotïì Ce Embenjïì 4 - Limbum New Testament

¹ M ce làa nè wɛ̀ tatap à bsii Nyʉ̀, ker ba à bsii Jisos Krǎis ce e be kè sa' bèe wɛɛwɛ ce a cu btèe ker ba bèe ce a kweŋger. À ka' ba njobè' e be vʉ̀ tɛ e bo sa' wowèe àmbò ŋkʉʉ, m ce làa nè wɛ̀ enɛ,

² à fe'shi blǎa Nyʉ̀ à nfè' wɛɛwɛ, kɛ̀ yu à nfě' mbembep ɛ̀, kɛ̀ yu a nfě' mbòŋmboŋ ɛ̀, gèe tɛ wowèe a riŋ yàp buu bbebep, lapni wowèe, fa wowèe ŋger, yɛ'ni wowèe nè ntee mʉfɛ̀ɛ.

³ Yɛ'ni wowèe njobè' nfè' mò' be ba ce bèe a be kèr kòŋ à ryu' ryɛ'nì ce li yu mini ka', kòŋ ba à rgèe buu ce wowèe à gwɛɛ. Yi ba wa'a tɛ wowèe a kɛ' ku' ŋgǎa ryɛ'nì mo' enɛ a vʉ yɛ'ni wowèe ba buu ce wowèe a kòŋ.

⁴ Wowèe a be kè kòŋ à ryu' yuu ce yi yu mini ka', kòŋ ba à ryu' mghàghar ce bèe a ce suŋ àmbò buu enjep ŋgòŋ na.

⁵ Timotì, tɛɛ yo yɛɛnì à nfè' wɛɛwɛ, tɛɛ tatap à nfè' ŋgɛ', gee rfà' ce ŋwɛ̀ ce e ce fè'shi Nsuŋ Mbòŋmboŋ à ba gèe, gèe rfà' wɛɛwɛ ce Nyʉ̀ à fa nè wɛ̀.

⁶ À ka' ba yi àmbò mɛ̀, nfè' ce ghɛɛ ce m be fa la ryòŋ nè Nyʉ̀ àmbò taŋshì wa'a. Nfè' ce m be mà'shi à ghɛɛ.

⁷ Mɛ̀ ghèter a caŋ mcaŋnì ce mmbòŋmboŋ a misî, a tɛɛ ba njep mini a ba' àlʉ̀simbùu.

⁸ Mɛ̀ rìŋ sè'ni mɛnɛ blà' ce a kupshi a lɛ nè mɛ̀ njo' ya ŋgěe yɛɛnì vi yu àgho. Ŋwɛ̀ ce e be kè fa mɛ̀ blà' anà be kè fa Tata Jisòs ce e ke sa' vi mnsa' yɛɛnì. E be kè fa mɛ̀ blà' ca à nòŋ ce e vʉ̀. E be kè fa ba nè mɛ̀ cà' ka. E be kè fa nè bèe wɛɛwɛ ce a ce nyàŋnyaŋ à ryɛ nòŋ ce e be vʉ̀ anà.

⁹ Ghèter vʉ ghàaghèr vʉ yɛ mɛ̀,

¹⁰ njobè' Dimàs à kòŋ yi yu ba buu enjep ŋgòŋ, a ma'shi mɛ̀ a du à to' Tɛ̀sàlonikà. Krǐsɛ̀n à du yi ba à ŋgǒŋ Gàlɛshà, Taitòs à du yi ba à ŋgǒŋ Dàlmashà.

¹¹ Ŋwɛ̀ ce e yu wèr ye ku ba Lûk. Lòr Mak tɛ wèe ye vʉ tɛ e bo jà' mɛ̀ à rfà' ce m ce gèe.

¹² Mɛ̀ tuu Tikikòs à rla' Ɛfɛsòs.

¹³ Wɛ vʉ̀ à tʉr kur ce mɛ̀ m lɛ̀ nè Kapòs à rla' Trowàs, ker ba wa mŋwà', laŋlaŋ wa mŋwǎ' bbòŋboŋ cà.

¹⁴ Àlɛ̀ksandà ŋwɛ̀ ntòo nlàa à m gèe buu bbebep nè mɛ̀ sê. Tata Nyʉ̀ be là' ye à buu ce e gèe nè mɛ̀ anà.

¹⁵ Lòr nfè' nè ye njobè' e m jepsi blǎa Nyʉ̀ ce wèr à m ce fè'shi nà sê.

¹⁶ A m dù nè mɛ̀ mbe kor à nfè' entòmbì, bèe wɛɛwɛ a caŋ a ma' mɛ̀, ŋwɛ̀ ce e tɛɛ yà njìnsa' à ke' ba ka'. M ce loo mɛnɛ Nyʉ̀ fa bàa wowèe njobè' wowèe a m gèe nè mɛ̀ wa' ka'.

¹⁷ Ka' yi m ba wa'a, Tata Jisòs à ku ba wèr ye a fa mɛ̀ ŋger, tɛ m bo fè'shi buu Nyʉ̀ wɛɛwɛ nè bèe enje jɛɛ tɛ wowèe a yu'. Nyʉ̀ à m fʉr mɛ̀ ekù cùu bʉrʉ̀'.

¹⁸ Tata Jisòs be jà' mɛ̀ efa ŋgɛ' wɛɛwɛ, lòr mɛ̀ dù àgho mbe bùu mbe dì' ce e ce sa' yi kʉʉ. Sèe ku'si ye à nfè' wɛɛwɛ. Yi yu wa'a.

¹⁹ Cà'ni Prǐskà ba Àkwilà ker ba bèe embe ndàp Ònisiforòs.

²⁰ Ìrastòs à m cu à rla' Korèn, mɛ̀ ma'shì Trǒfimòs à rla' Milɛtɛ̀ns njobè' e m ce yaŋ.

²¹ Ghèter vʉ tɛ ŋgòŋ yi ka' fʉte. Yùbulòs ba Pudàn ba Lainòs ba Klǎudìyà ker ba bfʉr wɛɛwɛ, a cà'ni wɛ̀.

²² M ce loo mɛnɛ Tata Nyʉ̀ ke'ni lo ryòŋ, tʉr wèe à ntee bòŋboŋ.