Ñwaè' Timotïì Ce Embenjïì 2 - Limbum New Testament

¹ Wɛ̌ Timotì ce à yu muu wà, Nyʉ̀ à tʉr wɛ̀ à ntee bòŋboŋ. Wɛ̀ konì sɛ' efa gho njo' Jisos Krâis. Banɛ à tɛɛ tatap.

² Buu wɛɛwɛ ce wɛ̀ m yu' àmbò m ce yɛ'ni bèe nà, lòr vi fa mbà mmbo bèe ce wɛ̀ rìŋ enɛ a yu mini, a riŋ foŋ enɛ wowèe a ghɛɛte à ryɛ'ni bèe mo'.

³ Lòr yo dì' yɛ ŋgɛ' àmbò ŋwɛ̀ soogɛ̌ mbòŋmboŋ nè Jisos Krâis.

⁴ Àde' ŋwɛ̀ soogɛ̌ mbòŋmboŋ cu àmbò běe à là' a ke cu nà ka', njobè' yi yu enɛ e gee ba yuu ce yi bòŋ yì ŋwɛ̌ ŋgòr.

⁵ Kwà'shi ka àmbò ŋwɛ̀ mcaŋnì, e ka' tɛ lɛ̀ mncir ce a lɛ̀ nè ŋgǎa mcaŋnì ka', e so ka'.

⁶ Ŋwɛ̀ nfà' mnsuu ce e fà' tatap à ba ba ŋwɛ̀ entombì à rye efa buu ce e fà' à mŋkʉ̀.

⁷ Kwà'shi àmbò buu ce mɛ̀ suŋ wɛ̀ na, tɛ Tata ku gee tɛ à riŋ vi.

⁸ Kuushi enɛ Jisos Krǎis ce e m ba ŋwɛ̀ embe ndʉ̀' Dɛvìd à m fʉʉ efa rkwe. Ca yu Nsuŋ Mbòŋmboŋ ce m ce fè'shi nè bèe.

⁹ M ce yɛ ŋgɛ' ca mbe shaŋ àmbò ŋwɛ̀ ce e bʉ' lɛ ncir wa'a njo' Nsuŋ Mbòŋmboŋ anà. Ka' a kur mɛ̀ nè bkwàŋ wa'a, àde' a kur blǎa Nyʉ̀ ka'.

¹⁰ M ce yɛ ŋgɛ' ca tɛ bèe ce Nyʉ̀ à ce a bo byemi nè Jisos Krâis, koni ryǒŋ rfi, koni bkù' ce vi be kè mì ka'.

¹¹ Blàa ca vi yu mini. “Sèe ka' kwe sèe Jisòs wèe, sèe ke cu sèe wowèe.

¹² Sèe ka' tɛɛ tatap du ba' àlʉ̀simbùu, sèe Jisòs wèe ke sa' àbee. Sèe ka' kani ye, ye ye ke kani sèe.

¹³ Sèe ka' tɛ ba mini nè ye ka', àde' e kupse efa rba njɛ̀ɛ ŋwɛ̀ ce e yu na ka'. E be kù ba yi yu mini à nfè' wɛɛwɛ.”

¹⁴ Kuushi bèe buu ca, ker cep wowèe à rlii Tata Nyʉ̀ enɛ a fa ce sɛr mnsɛr à mʉ blàa jɛɛ jɛ̀ɛ jɛɛ ka'. Njɛ̀ɛ mnsɛr anà vi tʉr sɛ' ka', vi ke bepsi bèe ce a ce yu'.

¹⁵ Ghèter gee ŋgěe bòŋboŋ nè Nyʉ̀ tɛ e bo yu' rbòŋ nè wɛ̀. Ba ŋwɛ̀ rfà' ce àde' rìtu yi koo ye ka', ker ba ŋwɛ̀ ce e be ce yɛ'ni bèe blǎa mini yɛɛnì.

¹⁶ Fa fa yo cùu njep mʉ̀ mnsɛr ka'. Àde' mnsɛr anà vi gee ŋwɛ̀ riŋ Nyʉ̀ ka', vi lò gee bèe ce a ce sɛr vi a misì mɛŋni Nyʉ̀ mɛŋni.

¹⁷ Njɛ̀ɛ mnsɛr ca vi lò ba àmbò nfur ce e ke lò beeŋger à kòtɛ nà. Bèe mo' efa mʉ̀ ŋgǎa mnsɛr ca yu Hàmɛneyòs ba Fìlɛtòs.

¹⁸ Wowèe a dà' njì, a ce yɛ'ni bèe enɛ bèe à m fʉʉ efa rkwe war. Wowèe a yɛ'ni wa'a a ce gèe bèe mo' a ce tarni yuu ce wowèe a m byemi.

¹⁹ Ka' bèe anà a ce tarni wa'a, blǎa Tata Nyʉ̀ vi yu mini, àtà vi kupsè ka'. Vi yu àmbò kùundap wa'a, a saŋ mbo enɛ̂, “Tata Nyʉ̀ rìŋ bèe ce a yu yì bèe.” A ker saŋ mbo enɛ̂, “Ŋwɛ̀ ce e ka' ce làa enɛ e ce dù àmbùu Tata Jisòs banɛ ŋgàŋ fa kèr gèe buu bbebep ka'.”

²⁰ E ke ba mbe ndàp ŋwɛ̌ ŋgòr, bghee bbòŋboŋ ba mkǐŋ mmbòŋmboŋ ce a gèe nè bco', ker ba mkìŋ ce a ku boo ba nè mboo mi ku ba mbo. A lò lor bghee ba mkǐŋ mmbòŋmboŋ lɛ byee njo nè bkèe, lor mkìŋ ce a ku boo ba nè mboo nà lɛ byee njo nè ŋgǎa ndap.

²¹ Ŋwɛ̀ ka' borni efa rgèe buu bbebep, e ba àmbò bghee bbòŋboŋ ba mkǐŋ mmbòŋmboŋ cà. E yu ŋwɛ̌ nrara ce àde' Nyʉ̀ lor gee rfà' àgho, njobè' e tami nyor à rgèe mfǎ' mmbòŋmboŋ ce Nyʉ̀ ce kòŋ enɛ e gee nà à nfè' wɛɛwɛ.

²² Fa kè gèe ŋgèe rnsùu ka'. Gèe ba ŋgěe yɛɛnì, foosi nè Tata Nyʉ̀, tʉr ntee rkòŋnì ba ntee cumʉnyaŋ. Wɛ gèe wa'a, yi ba enɛ à ce gèe àmbò bèe wɛɛwɛ ce a ce kɛ' rlii Jisòs nè ntee rara a ce gèe nà.

²³ Fa fa yo cùu njep mnsɛr ka'. Nsɛr yu yuu blʉr ce vi ke vʉ̀ ba nè mlap.

²⁴ Ŋwɛ̀ ka' ba ŋwɛ̀ rfà' nè Tatâ, ŋgàŋ fa ba ŋwɛ̀ mnsɛr ka'. E ba ba ŋwɛ̌ nyɛɛnì, ba ŋwɛ̀ ce e rìŋ à ryɛ'nì, ba ŋwɛ̀ ce e kur ntee.

²⁵ Bèe mo' a ka' kani yuu ce e ce suŋ wowèe, e lor nfè' nashi nè wowèe njobè' àde' Nyʉ̀ gee wowèe a kupsè yap ntee lo byemi yuu ce yi yu mini,

²⁶ tɛ wap bfee vi bo kʉti wowèe mbo, tɛ wowèe a fʉʉ enjep taa Satàn ce yi m koo wowèe, a gee wowèe a ce yu'ni ba nè ye nà.