Ñwaè' Beâe Koreèn Ce Embenjïì 6 - Limbum New Testament

¹ Àmbò wèr ce fà' àbee wèr Nyʉ̀ wèe na, wèr ce bu' mmbo nè wèe enɛ wèe fa mà'shi tɛ rbòŋ Nyʉ̀ ce wèe à koni na li bʉ à cicì ka'.

² Nyʉ̀ à làa mbe yě Ŋwà' enɛ̂, “Nfè' ce mɛ̀ m ba à rgèe yuu bòŋboŋ nè wɛ̀ à m ghɛɛ, mɛ̀ fa wa btù' nè wɛ̀. Nòŋ ce mɛ̀ m ba à rjà' wɛ̀ tɛ à bo lùŋ, yi m ghɛɛ, mɛ̀ ja' wɛ̀.” Rìŋ nè enɛ nfè' ce àde' Nyʉ̀ gee yuu bòŋboŋ nè sèe, yu ba sè'ni na. Nfè' ce àde' Nyʉ̀ gee bèe a lûŋ, yu sè'ni na.

³ Wèr ce jepsi ŋwɛ̀ mò' ka', fà dì' ŋwɛ̀ mò' bo làa yuu mo' bebep àmbò ler rfà' ka'.

⁴ À ka' ba koni kɛ koni wèr, wèr ce dùŋshi enɛ wèr yu ŋgǎa mfà' nè Nyʉ̀. Wèr ce dùŋshi wa'a à njɛ̀ɛ njì ce wèr à kur ntee sê, a tɛɛ tatap à nfè' ce wèr ce yɛ ŋgɛ', ba à nfè' ce fùp à koo wèr, ker ba à nfè' ce buu à ka' tap nè wèr.

⁵ Bèe a lìp wèr, a fa wèr à shaŋ. E ba à nfè' mò' bèe a gaŋ wèr. E ba à nfè' mò' wèr fa' jorni, e ba à nfè' mò' wèr tʉr nfè' à rbuumì ka', e ba à nfè' mò' wèr tʉr yuu ye ka'.

⁶ Wèr à dùŋshi enɛ wèr yu ŋgǎa mfà' nè Nyʉ̀ à yer ŋgěe rara, ba à buu Nyʉ̀ ce wèr à rìŋ, ba à njɛ̀ɛ njì ce wèr ce kur ntee, ker ba foŋ à njɛ̀ɛ njì ce wèr ce gèe ŋgěe bòŋboŋ nè bèe. Wèr à ruusi ba nè Yʉ' Rara, a koŋ bèe nè mini-ŋwɛ̀.

⁷ Wèr ce suŋ nsuŋ mini à nfè' wɛɛwɛ, a ce gèe buu ba à ŋger Nyʉ̀. Yer ŋgěe yɛɛnì yi yu àmbò buu bìr ce wèr bo mà' bìr àgho nè Nyʉ̀, kèr tɛ'shi yèr nyor àgho.

⁸ E ba à nfè' mò' bèe a naa wèr, e ba à nfè' mò' a coosì wèr. E ba à nfè' mò' bèe a laa buu bbebep àmbò wèr, e ba à nfè' mò' a laa buu bbòŋboŋ. Bèe a lò lor wèr àmbò ŋgǎa mnde' wa'a, wèr ku ce làa yer yu ba yuu mini.

⁹ E ba à nfè' mò' bèe a lor wèr à buu bcicì, geewa'a, bèe a rìŋ wèr à bdì' wɛɛwɛ. E ba à nfè' mò' a yɛ wèr àmbò bgʉ̌ʉ bèe wa'a, geewa'a wèr ku ba btèe. Bèe a fa wèr ŋgɛ', a ke' yʉ ne wèr ka'.

¹⁰ Wèr yu àmbò bèe ce a ce koosimnse wa'a, geewa'a wèr ce lu'shi à nfè' wɛɛwɛ. Wèr yu àmbò ŋgǎa fùp wa'a, geewa'a wèr ce gèe bèe magòr a ce koni bkù'. Wèr yu àmbò bèe ce a tʉr buu ka' wa'a, geewa'a wèr a tʉr buu wɛɛwɛ.

¹¹ Běe à rla' Korèn, wèr à sʉ̀ti yuu mo' ese wèe ka'. Wèr à mʉ̀' yer ntee a lɛ too nè wèe.

¹² Wèr à cete yer ntee ese wèe ka', yu ba wèe ce wèe à cete ye ntee ese wèr.

¹³ Kʉʉsi nè rbòŋ ce wèr à m ce gèe nè wèe nà, mʉ' wee mntee lɛ btoo foŋ. M ce làa nè wèe àmbò boo wa.

¹⁴ Wèe fa ba àbee wèe bèe ce a yu ŋgǎa rbyemì ka' ka'. Àde' yuu yɛɛnì ba yuu bebep a koo ŋkar à njɛ̀ɛ kɛ? Yuu ce rraa li tʉr à rgèe a tʉ̀'nji yu kɛ?

¹⁵ Àde' Krǎis ba Bɛ̀layàl a ba cǔu mo'sir à njɛ̌ɛ kɛ? Àde' ŋwɛ̀ rbyemì tɛɛ kùu a ŋwɛ̀ ce e byemi ka' à njɛ̀ɛ kɛ?

¹⁶ Àde' Ndap Nyʉ̀ ba yì mnyʉ̀ enjep ŋgòŋ na a ba à yuu mo'sir à njɛ̌ɛ kɛ? Sèe yu ndap nè Nyʉ̀ ce e yu ntèe. Yi ku ba àmbò Nyʉ̀ à làa. E làa enɛ̂, “M be cu a wǎp mʉ, jɛ̀r a wǎp mʉ, ba yàp Nyʉ̀ tɛ wowèe a ba yà bèe.

¹⁷ Banɛ wèe fʉʉ efa wǎp mʉ, tɛɛ jɛɛ. Wèe fa jòo yuu ce yi yu rara ka' ka', tɛ m bo koni wèe.

¹⁸ M be ba tàr nè wèe tɛ wèe ba boo wa, boo mmbaŋrù ba boo bbyèŋge. Cena à làa Tata ce e tʉr buu wɛɛwɛ.”