Ñwaè' Beâe Koreèn Ce Embenjïì 5 - Limbum New Testament

¹ Wèr rìŋ wernɛ yèr nyor ce wèr ce cu àgho njep ŋgòŋ na yu àmbò tàp ce wèr ce cu mbo wa'a. A ka' sa'si tàp anà, sèe ku riŋ seenɛ ndap yu mbe bùu ce à bà'ri ba ŋwɛ̀ ka'. Ndap anà à bà'ri Nyʉ̀, à ba ndap ce e be cu nfesè.

² Wèr ce shooŋger sè'ni njobè' wèr ce kòŋ se à ryar ndap ce e yu mbe bùu nà àmbò cɛ̀' ce ŋwɛ̀ à yar à nyòr wa'a.

³ Wèr à ka' ke yar, wèr bo ba mbùuriŋ ka'.

⁴ Àmbò wèr ce cu nè nyor ca njep ŋgòŋ na, wèr ce shooŋger àmbò wèr à byɛ̀' lɛ ntɛ̀r yi ce rìr se wa'a. Yi yu ba enɛ wèr ce kòŋ à rco' cɛ̌' rʉ̀ʉ ca ka', wèr ce kòŋ ba à ryar cɛ̌' fi, tɛ cɛ̌' rʉ̀ʉ yi kupse dʉ̀dʉ̀.

⁵ Nyʉ̀ a ŋwɛ̀ ce e gèe sèe à tamì nyor à rkupsè ca, a ker fa yʉ' nè sèe, àmbò btɛr, yi ce dùŋshi enɛ sèe be koni buu ce Nyʉ̀ à kà' sèe.

⁶ Banɛ wèr ce koosi bsɛ̀ à nfè' mò' ka'. Wèr rìŋ enɛ àmbò wèr ce cu nè nyor ca njep ŋgòŋ na, wèr yu njìsàp ese Tatâ.

⁷ Àmbò wèr ce cu nè nyor ca njep ŋgòŋ na, wèr ce cu ba njobè' wèr à lɛ̀ ntee nè ye, ke' ba njobè' wèr à yɛ ye ka'.

⁸ Wèr ce koosi bsɛ̀ ka', a koŋ yer à rmà'shi nyor ca dù cu à là' wèr Tata wèe.

⁹ Àmbò yi yu na, yuu ce wèr tʉr nje tù yi yu enɛ wèr fa' tɛ nyor boŋ ye, kɛ̀ wèr cu nè nyor ca njep ŋgòŋ na ɛ̀, kɛ̀ wèr à fʉʉ enjo ɛ̀.

¹⁰ Sèe wɛɛwɛ be kè tɛɛ kùntombì nè Krâis, tɛ e bo sa' sèe, tɛ ŋwɛ̀ wɛɛwɛ koo yuu ce yi ghɛɛte à yuu ce e m gèe à nfè' ce e m ce cu nè nyor ca njep ŋgòŋ na, kɛ̀ yuu anà yi m bòŋ ɛ̀, kɛ̀ yi m bep ɛ̀.

¹¹ Àmbò wèr à rìŋ àmbò mnsa' Tatâ, a ce wɛp ye, wèr ce ghèter à rgèe tɛ bèe a kupse. Nyʉ̀ rìŋ njɛ̀ɛ bèe ce wèr yu, mɛ̀ ce kwà'shi mɛnɛ wee wèe foŋ à rìŋ njɛ̀ɛ bèe ce wèr yu.

¹² Wèr ce làa wa'a, a ke' ce ghèter ba à rgèe tɛ wèe bo rìŋ enɛ wèr yu běe mini ka'. Wèr ce tà' ba enɛ wèe koni yuu ce àde' wèe yu' rbòŋ àgho nè wèr, tɛ wèe bo tʉr yuu à rlàa nè bèe ce a ce yu' rbòŋ nè ŋwɛ̀ njo' nta' ce ŋgàŋ tʉr, ke' ba ba njo' njɛ̀ɛ ŋwɛ̀ ce e yu ka'.

¹³ Wèr à ka' ce yɛɛti àmbò bèe ce btu vi ce kar embo wa'a, banɛ wèr yu wa'a njo' Nyʉ̀. Wèr à ka' ba bèe ce yap tu yi yu mbo, banɛ wèr yu wa'a njo' wèe.

¹⁴ Yu ba rkòŋnì Krǎis ce li gèe ntee yi ce lùu wèr à rgèe njɛ̀ɛ buu ca, njobè' wèr rìŋ enɛ ŋwɛ̀ mò'sir ka' kwe à btu bèe wɛɛwɛ, banɛ bèe wɛɛwɛ à kweŋger.

¹⁵ E m kwe à btu bèe wɛɛwɛ, tɛ bèe ce a cu btèe a bo cu nè yap tu ka', cu ba àtu ŋwɛ̀ ce e m kwe a wǎp tù, a fʉʉ efa rkwe.

¹⁶ Banɛ wèr ker ce yɛ bèe ba à mmìr, àmbò bèe enjep ŋgòŋ na a ke gèe nà ka'. Wèr à m ce yɛ Krǎis wa'a à nfè' mò', à ka' ba sè'ni na, wèr à ker ce yɛ ye wa' ka'.

¹⁷ Ŋwɛ̀ à ka' ba àbee a Krâis, banɛ e kʉti ŋwɛ̌ nfi; buu brʉ̀ʉ à mì, à ba ba buu bfi sè'ni.

¹⁸ Cena yu ba rfà' Nyʉ̀. E m gèe sèe wowèe à kʉtì àbee njo' Krâis, a fa wèr rfà' enɛ wèr suŋ bèe enɛ àde' a Nyʉ̀ wèe a kʉtì àbee.

¹⁹ Yuu ce m ce làa yi yu enɛ Nyʉ̀ à m càa embenjì Krǎis a gee a bèe enjep ŋgòŋ na wèe a kʉtì àbee, a ke' ce bè' yàp buu bbebep ka'. E fa nsuŋ ca mba wěr mmbò enɛ wèr suŋ nè bèe.

²⁰ Wèr tɛɛ àtu Krâis, a ce làa buu ca àmbò ce làa lɛ ba Nyʉ̀ seese nè wèe wa'a. Wèr ce bu' mmbo nè wèe àtu Krǎis enɛ wèe kʉti àbee wèe Nyʉ̀ wèe.

²¹ Krǎis à m gèe yuu bebep ka', geewa'a, Nyʉ̀ à m gèe e ba àmbò ŋwɛ̀ ce e m gèe lɛ yuu bebep wa'a, tɛ sèe bo ba byɛɛnì à bsii Nyʉ̀ àmbò Nyʉ̀ yu, njo' ye.